Starke PMS

Sti

Liebi Frouä
Lidä sit Jahrä unger starcher PMS. Während em Zyklus hani di ganz Palettä. Heftigi Schmärzä im Chrüzberich, extremi Aggression vor dr Mens und när so starchi Bluetigä dassi völlig KO bi.
Äs git Monat wos chli weniger schlimm isch u serigi wos ganz bös isch.
Iz isch wider einä vo dä schlimmä.
Dr FA het mir Schmärzmedis verschribä, aber di nützä nid viu. U ig wet ou nid immer Medis näh....
Cha das langsam ächt nüm, das macht mi kaputt.
Kennt ds öper vo euch? Und was hilft euch?
Merci fürs "Zuelosä"

Mirj

ich bi au ä liedensgenossin - monet für monet.. ich liede under übelkeit, teils au mit erbräche wärend de mens - da hilft mir leider gar nüt, medis gege übelkeit chömed postwänden use. gege die heftige buchkrämpf und schambeischmerze nimi mängisch dafalgan wänis gar nüm ushalte. sus duni tape oder ich ha es fraueküsseli wo extrem guet tuet. ha das mal ide oberstufe sälber gmacht und es nützt immer no. bettfläsche duet mir au no guet, aber chasch ja nöd immer mit de bettfläsche umälaufe😏

Mirj

das bruuchsch zums küssi sälber mache 😊

Sti

Liebi Mirj
Tuet mir leid muesch Du ou so lidä.
Gäu würklich häufä tuet nüt 😟
Bsungers schlimm si so Täg wi hüt. Mi Ma schaffet, bi allei mit dr Chlinä, 21 Monat. Si versteit natürlich nid dasses mir nid guet geit.
Wet am liebschtä is Bett ligä u Dechi übärä Chopf zie u wartä bises dürä isch....
Merci füre Tipp 👍

Pinny

😆ich han amel all 3-5 täg extrem kopfschmerze (bi so mega lärmempfindlich denn)...nur scho wend d chind vor freud umenand lachet 😩tätschts mi fast...und mini buchkrämpf...da fühlt sich so ahh als ob öper die ganz ziit mir in buch ineboxt...verlüüre soviel bluet (d ärzt hend mer mol gseit dasi eh scho fast z weng bluet für min körper ha...aber wenni mini mens ha...verlüüri viel z viel bluet und bi drum so halbtot - während de mens mueni extrem viel issehaltig esse - aber da schaffi fast nöd, weli denn so halbtot kei apettit uf esse ha, sondern eifach nur schloofe will) und bi denn amel so müed...

Mir hilft eigentli amel krüütertee usm eigene Garte, Salbi vo Thailand (weiss ned gnau was det dine isch - benutz sie au selte) und am obet wenn de maa da isch...leit er mi is bett und duet mer s wärmeküssi ane oder sonen buch-ruggewärmer...d schmerzmedis nimmi nur wenns gar nüme goht (da ich fast nur us eigene natürliche Mittel lebe : NaturHeilkunde scho siit ich es kind bi...langets scho wenni nume 250mg dafalgan nimm)

Das mit dim chind chani nohvollzieh...ganz ehrlich...wenn ichs nüm packe und schlofe muess...denn legi sie beidi is bettli und mach tür zue - mini sind 17mönet alt...und denn schlof ich und sie spielet im bettli mitenand oder schlofet au

Mirj

@Sti du armi! hoffe es isch jetzt wieder chli besser worde bi dir? bi mir sind immer tag 3&4 die schlimmste..
hetsch kei nachberi, tante oder fründin wo chönt ufd kind luege? ich gfind wänn mer so plagt isch, sött mer döfe here ligge. ha au scho mim maa ahglüte und gseit er mües hei cho. (er cha zum glück au homeoffice mache und schafft dänn am abig wänd kind im bett sind) aber das isch notlösig, zerst fragi öper im umfeld ah.

Sti

@ Mirj: Nid würklich, aber iz isch mi Ma daheim u är het morn frei. Bis am DO geits mir de sicher besser.
Ja, söt äuä mau öper fragä für's hüetä. Isch mir aubä drum nid so rächt...
Mir schlaht das ganzä langsam immer meh ufs Gmüet. Si Jahrä immer dr glich Sch..... Ha eifach immer meh Müeh.
Sorry fürs Gjammer, geit Dir ja glich.

Sti

Gueti Besserig aunä Lidensgenossinnä 😖

Mirj

@Sti, ich hoffes fescht für dich! es bringt doch nüt wänn dich so quälsch. öper würd sich viellicht freue mal uf dini chlii zluege?
ich bi grad erstuhnt, eigetli hetti hüt min „schlimme“ tag gha, aber ha weder buuchweh, no übelkeit, no sus öpis gha hüt. hoffe dases so blibt🤞🏻findes übrigens gar nöd schlimm, wänn öper ander jammeret - mir gahts ja glich und ich cha dich sehr guet verstah! wämer chli jammere chan, fühlt mer sich doch nacher meistens au bizli besser. geteiltes leid ist halbes leid😉

Sti

@ Miri
Drückä fest Dümä dasses bi Dir so blibt.
Hesch de Du immer glich schlimm oder variert das mängisch ou vo Monat zu Monat?
Ja gäu, mängisch wet mä eifach chli jammärä. Eifach damit gjammeret isch.
Wünschä Dir ä schönä Tag.
Lg

Mirj

guete morge @Sti, leider ischs nöd so blibe und d‘buuchchrämpf händ gester znacht ahgfange und sind hüt morge au no da... es isch nöd immer glich schlimm, bzw nöd immer alles zämä, jede 2monet isch unagneh wänni de lang zyklus ha.

Sti

Oje, gueti Besserig. Hoffä Du chasch di chli schonä hüt. Drückä Dümä dasses gli dürä isch.

corina

Ich känns au und ein bis 2täg vor de mens bini immer total aggro und känn mi teils gar nümme🙈 es bringt mi alles so schnäll ufd palme es isch ächt zum 🤮 ha letschti en artikel gfunde dass en chline protzentsatz unter dere schwere form vo pms liedet, bin froh gsie dassi nöd elleige bin😊 mit de wächseljahr hörts dänn uf, nöd würkli e lösig aber schön zwüsse dass es nöd s läbelang so wieter gaht😊

corina

Und ich nimm mönchspfäffer zum stabilisiere