Hebammengeleitete Geburt / Schwangerschaftskontrollen

Frauenmantel

Hey liebi Fraue
Gits unter euch au Fraue wo sich für e hebammegleiteti Geburt und/oder Schwangerschaftskontrolle entschiede hend? Würd mi mega über e Ustuusch mit euch freue.

ALOHA

Aso ich gebäre im spital und mini hebamme inkl. de fraueärztin vo mir isch debii. Fraueärztin wili halbprivat bin und hebamme wili das so mit ihre abgmacht han. Ahschlüssend ischs ziel relativ schnell wider heizgah😅 ich glaube ca 6h spitalufenthalt. Ich muss ufs WC chöne und am kind musses natürli guet gah👍🏻 Aso eh ambulant geburt.
Und de isch d hebamme 2x pro tag bi mir usserd ich bruch sie den no meh. Wie lang weissi ned, denkes bisi sie den nüme bruche😅 aber min mah het na 3-4 wuche ferie. Chaner den sponti entscheide.

Machsches au so? Oder gebärsch dehei nuur mir hebamme?

Frauenmantel

Hey Aloha,
Ich ha jetz 2 Spitalgeburte gha und gang dasmol is Geburtshuus go gebäre mit miner Beleghebamme woni scho kenn und id Schwangerschaftskontrolle gang (abgseh vom Organscreening ide 22. ssw).
I finds mega schön wemer scho vor de Geburt weis wer denn debi wird si, das git sone entspannts gfühl.
Mini bisherige Geburte hani nid in schlechter erinnerig, sie sin efach sehr klinisch gsi obwohl grundsätzlich kei Grund für das ume gsi wär. Drum wetis dasmol (sofern alles guet isch) so natürlich wie möglich halte. Trotzdem bini natürli offe für jedi wendig wod geburt cha neh und us dem Grund froh bini im geburtshuus wos spital nid wiit wer,mir wohne doch bitz usserhalb.
I bi jetz ide 13.ssw und ha bis jetz kei Ultraschall gha. I bi so neugierig uf wenn i das müsli serst mol gspür ❤️

Frauenmantel

Ambulant gebäre hani letst mol unplant gmacht welis im spital efach nüm usghalte ha 🙈😂

ManuP

Ig ha bi beidne schwangerschafte/geburte ä belegshebamme gha.
Die ersti geburt isch bi 33/5 daheime gsi. Ar hebamme und mim maa hetts no grad glängt drbi ds si wüuis nid tschegget ha bzw nid wöue warha dases wehe si etc. Denn heimer när ids spitau müesse und die chlini isch uf d neo cho.
Bir zwöite geburt hei mir üs wöue ufe wäg mache, hett aber nümme glängt u äs hett ou ä huusgeburt gä 😊. D hebamme isch drbi gsi. Mir si de ou daheime blibe das üs so guet gange isch. Dr bescht entscheid. Isch aues sooo entspannt u ruehig gsi. Eifach nur toll.
Mir plane kes dritts chind aber fausi ungeplant nomau schwanger würdi, de würde mir ä huusgeburt asträbe mit „üsere“ beleghebamme.
I finges u toll hett me bir geburt öpper drbi wo eim scho kennt u genau so begleitet/leitet wie me sich das gwünscht hett

pippa

Hoi Frauemantel
So schön. 😊 Jo ich han e Huusgeburt gha und Betreuuig durch dHebamme ide SS und im WoBe ussert ab und zue en Ultraschall bi de Gyni. Mir wohned ide Stadt 5min vom Spital und dört bini au agmeldet gsi für de Fall...isch alles guet gange und ich han mich durch dHebammene super guet begleitet gfühlt. (Han au es Wiili gsuecht...) hans mer aber immer offe gloh jederziit andersch z'entscheide oder s'akzeptiere wenns doch andersch chunnt ...würs wieder so mache...wobi sWoBe hani zimli usefordernd gfunde au für de Partner, aber immerhin hemmer euse Rhythmus chönnä läbe☺️

ALOHA

@pippa ischs dies erschte gsi? Wieso ischs für dich und ein partner eh useforderig gsi? Magsch chli verzelle🤗

Mirj

ich ha 2x im geburtshuus gebore, für es dritts chönti mir ä huusgeburt vorstelle. bim erste hanis WoBe im geburtshuus gmacht bim zweite bini nach 48h hei. ich ha nachem organscreening (ca 20ssw) d‘undersüech nur no bide hebamme gmacht und ide 36ssw bim gyni nur go luege wied plazänta liet.
finde mit me guete umfäld & hebamme ischs WoBe dihei sehr ahgnehm.

pippa

@ALOHA jo mis erste.😊 jo welli ich die erste zwei Wuche vom Bluerverlust und au süscht ziemli erschöpft gsi bin und er alles drumherum hett müesse manage, denn no ab und zue Bsuech wo hin und weg gsi isch vom Bebe statt zhälfe und die Chlii wo all 1.5h trunke hett...sie hets super gmacht. Ich bin vom Schlofmangel eifach nümme so fründlech gsi wenn öppis nid so glaufe isch und derzue no stäändig hungerig🙈🙈😜😄 aber mer hends überstande und mängsmol au chli chönnä gnüssä, würd eifach de Bsuech nur no iilade wenns grad öppis mached, choche, putze, iichaufä😁

ALOHA

@pippa ach soo😍 aber de partner het au ned möge mal öbis koche oder gschnell go poschte? Chamer das alles ebe nani so vorstelle🙊😅Und magmer nachere wuche nani go poschte gah mitm kind? Oder mal suuge oder es bad putze?

pippa

@ALOHA dochdoch er hett alles gmacht, hett drum mir mit de Chliine nid soviel mögä helfä...ich han nix mögä nochere Wuche min Kreislauf hett nid mitgmacht. (Bluetverlust isch zimli ade Grenzä gsi...) Noch zwei Wuche bini denn glaub amel scho so 40min use...aber halt lieber use statt go postä🤗 Und üsi Chlii isch nie im Chinderwägeli zfriedä gsi nur wenn mer sie treit hend und denn au nur für 30Minute. Und putze mit ihre vordra findi hüt no ziemlich streng🙈 Aber ich glaub es chunnt sehr ufs Chind drufa und wie Geburt gsi isch. Vilicht simer eifach chli Umständlichi😂

ALOHA

@pippa uiui das tönt ned guet mitm bluetverluscht😳 danke viel mal fürs brichte. Sehr spannend😍

pippa

@ALOHA wie isch denn din Partner iigstimmt? Hesch es unterstützends Umfeld?

Frauenmantel

Hey danke euch allne ☺️
Aso Wobe weti umbedingt dert mache...mit baby und 2 chliichind dehei gsehni dä mit de erholig nid eso 😂🙈

ALOHA

@pippa er isch so hilfsbereit und wür alles für mich mache. Drum heter au so lang ferie ihgä und chans au easy na verlängere😍Familie isch au sehr hilfsbereit😍 schwiegereltere wohnet 5min zfuess vo ois weg und mini eltere hend ferie au extra verschobe😍Und fründin vom brüeder schafft uf de geburtsabteilig und kennt sich mit stille top us👍🏻

ALOHA

@Frauenmantel das verstahni👍🏻 ich denke bim 2. würis mir au überlege im spital 2-3 täg zbliibe😅 au weni ned gern im spital bin.

Frauenmantel

ManuP: Ui heftig...vor dem hani au bitz respekt jetz bim dritte 😁wobie, gäll wenns so schnell got denn sels so si und denn isch au das s richtige. I wet au dasmol so langs got mit de wehe dehei bliebe...mol luege obi mi denn no cha überwinde mi ufe weg zmache. Eusi hebamme isch aber zum glück huusgeburthebamme, aso würd sie i dem fall sicher au zu eus cho 😂🙈

Frauenmantel

Aloha: Das mitem huushalt etc chasch vorher wfach noni iiplane. Es git Fraue die sin grad wieder topfit, i ha au es zitli bruucht zum mi iifinde und s stille cha am afang scho recht adpruchsvoll sii. I finds au extrem wichtig nimmt mer denn hilf a, d wuchebett ziit isch sone schöni ziit und mega wichtig fürd mami-chind bindig❤️