Babytrage ab der Geburt verwenden?

Ängeli

BABYTRAGE ab Geburt
Welli Tragi chönder empfehle wo unde wie en gurt hät, aber glich es weichs tuech fürs baby? Und für d‘haltig vom Baby gsund & guet isch? Wo mer de steg au chan istelle?
Und wo nöd grad es vermöge kostet...
Han bereits vo de tochter es tragtuech, aber wot öpis miteme gurt wo e schnalle hät unde, damits schneller zum alegge isch, da min Maa au viel uf Kind luegt & er süst glaub überforderet isch mit dem binde.

ALOHA

Ich hanmer grad en luemai kauft😍 isch au voll easy zum binde. Bi vorem kaufe schnell verbii wilsmer au wichtig isch dass min mah ned überforderet isch😅www.tragebaby.ch
Es git au de mit schnalle👍🏻Obs es vermöge isch weissi ned😅 isch halt handmade

schaai

@Ängeli mir hend grad letscht wuche E Tragberotig ka und isch genial gsi. mir testet olilias und milamail..beidi eher tür..aber es git bi FB e Tragemami CH gruppe womer occasione chan kaufe..olilias findi super..chasch als half buckke also unde schnalle obe binde..oder milamai..en full buckle obe und unde schnalle aber sau tür..aber wenni di wer investier zersch ine tragberotig es gig soooooo viel uswahl ufm mart ..

schaai

@ALOHA luemai isch glaub dschwöster vur milamai obe une binde gell..finds halt biz müesam wenn dbändel zum binde bim alegge immer am bode lamped..hesch bime full buckle nöd

schaai

ah und @Ängeli idere FB Gruppe chasch au Tragene teils uslehne und teste..chömed die wuche dMilamai über zum teste

ALOHA

@schaai genau ja, dmilamai isch mitm gurt. Ufem bode bambele duets ned🤨 muschs eifach richtig hebe und ned umeschleife loh👍🏻 han extra das mit de beraterin det ahgluege. Für mich ischs perfekt😍👌🏻

Snuggles

Ohh super danke für de post. Bi nemlich au grad am überlege zwüsched milamai und luemai, tragetüecher findi au super ich liebs aber wenni de ganz tag unterwegs bin und mitem öv findis ebe au müehsam zum a und abzie. @schaai musch umbedingt brichte vode milamai😁 @ALOHA han ebe au s gfühl würd mer d ende bim azieh am bode bambele und das isch halt das wiso ich überleg e tragi zuetue voralem im öv. Wie hebsch denn du d bänder und sind die nöd au recht lang?tendiere ebe scho eher zu luemai👍🏻😅 gah glaub die wuche au mal go usprobiere

Mirj

ab geburt ha ich im didytai treit, gits au als haöfbuckel (didyklick) nacher hani en milamai gha (fullbuckle) bi sehr zfriede mit beidne. jetzt trägi aber nur no im tuech und ha drum min milamai verkauft. kauft für 300.- verkauft (tuuschwert) 280.- sind beidi sehr tür (luemai/milamai) aber du chasch sie au zume guete priis wiiterverkaufe.

ALOHA

@Jessi❤;️A-S❤️ bim luemai chasch au en hüftgürtel dezue neh. So hetsch den beides. Dh snormale band und de gürtel mit de schnalle.
Wegem bambele, chaschs eifach hebe. Das isch üebigssach. Kollegin wo en luemai het, sie seit irgendwenn machschs im schlaf😅 bi ihre bambelets au nie abe🙊 fändi au grüsselig

ALOHA

Ab und uf insta postets ame wens die neue ufeladet. Teils gahts soooo schnell und de sind die schönschte weg😅 han am fritig au gad ahglüte zum schnell reserviere dasen am sam han chöne go ahluege. Und de 2. woni na ahgluege het, isch au ruckzuck weggsi🙊

Kira

Ich find kokadi super und eifach zum ahlegge. Unne schnalle und obe binde. Wür aber jetzt für mis zweite en ringsling no usprobiere

mariechäfer

I würder en olilias hulfbuckle empfehle,hed sin priis wird aber sogar i de schwiiz hergstellt,am beste wers aber wennds binre trageberatig selber gasch ga teste,jede empfindet tragine zum trage anderst bequem😉

TiMay

Ich ha en kokadi taitai. Hed au unde e gürtel mit schnalle und isch sehr eifach zum alegge. Isch ähnlich wie de luemai, aber halt ned so tüür.
Ich lieb ne und wörd ne nöm welle härgäh. Vorallem heds mega vill uswahl vode stoff. Und de einti schöner als de ander😍😌

schaai

bim kokadi taitai musch ebe ab me gwüsse alter uf de toddler wechsle und mir wennd ei tragi wome vu newborn bis ende tragalter cha nutze..das isch u.a. olilias und milamai

Avenira

Wens Geld kei Rolle spielt Olilias. Würd direkt verbigah. Isch eh ganz tolli Frau. Bi mir liits momentan ned drin drum hani e Fräulein Hübsch kauft. Bin super zfriede. 😊 und priislich ok. Isch handgmacht in Österich.

Nessa

Maira Tie vo cybex findi mega bequem

ManuP

Ig ha bir eltere tochter zersch ä mysol gha wo zum binde isch (chönntsch ou mit hüftschnalle ga). Isch mir aber mit zuenähmendem gwicht nümme so bequem gsi. När hani ä luemai kouft mitemne schnallehüftgurt.
Jetz hani no grad nöi ä milamai und finde dä ou top.
Beidi tragene chasch ja bis ändi tragealter bruche. Drum fingi isches nid tüürer aus weme zb ä babysize und när ä toddlersize brucht.
Ig trage rächt viu u gärn de lohnt sechs ä passendi tragi.
Würd dir unbedingt zure trageberatig rate, damit für di ds richtige findsch u nid sinnlos gäud usgisch für ne tragi wo dir när nid bequem isch

Snuggles

Sooo ha mich jetzt doch für luemai entschide und eini brucht kauft.Bin jetzt nach paar täg scho verliebt, sowas vo bequem und s zwergli schlaft sogar no besser als im tragtuech👍🏻👍🏻🥰

Mangoo

@Jessi❤;️A-S❤️
Ich bis mer ebe au am überlege eini z poste..mis zweite chunt afangs september ufd welt und de isch de grossi erst 18mt..han e ergobaby die het er ez aber ned so toll gfunde und au nie chöne ofuuse drin will irgendwie de chopf garned gstützt gsi isch..wie isch das bide luemai?

ALOHA

@Jessi❤;️A-S❤️ mega cool😍 ich freu mi au scho weni de chli wurm ih oise luemai due chan😍

ALOHA

@Mangoo det ischer am ahfang sehr guet gschützt wils baby chli isch. Und nacher hesch sones “täschli“ am luemai. Det chasch sones stütztuech useneh😍

ALOHA

da drin versteckt😍 chasch obe bide schultere den befestige👌🏻

Snuggles

@ALOHA ja das glaubi ha au chum chöne abwarte bis de pöstler cho isch und ich die chli ha chöne dein go umespaziere.isch echt au im öv praktisch und schnell bunde😁

@Mangoo ja genau wie d aloha seit hesch d stützi obe und wenns chli grösser wird chasch une s band i die under schlaufe tue denn isch s ruggeteil nomal chli länger. Also ich bin sehr z friede👍🏻😍

schaai

i han hüt de Milamai übercho han aber sgfühl sie isch zkli 😳🙈

LoSo

Schaai für neugeboreni sinds rächd "gross" aber es wird immer besser! 👌🏽sie wachsed ja 🤣🤣

LoSo

😍 eusii muus esch jez 6Mönet ech fend jez de Luemai besser als s Tuech, vorher ischs immer umbekehrt xii 🤣

schaai

@LoSo Aber i chan sie glich inne ne oder wenn sie zfriede isch?

MiaWia12345

@schaai ich ha kein milamai aber normalerwiis chan mer as ruggeteil chli zäma zieh, goht das do nöd?

schaai

@MiaWia12345 meinsch du de Steg enger mache? sRuggeteil hani scho uf newmorn igstellt isch eifach immer no zlang

MiaWia12345

@schaai nei scho sruggeteil, steg gsehni zwenig ufem foti...ha denkt mer chönts we obe wos am träger isch no so zämäzieh, aber demfall nöd...und wänts wie no eimol würsch unne umelitze,also eigentlich verchehrt ume ifädle und dänn umelitze, schwierig zbschriebe, ich suech ä aleitig😄

MiaWia12345

@schaai bi 4:38, ich weiss halt nöd öb das bim milamai goht😊

schaai

@MiaWia12345 jo ich weiss wasd meinsch aber das goht ebe nöd bim milamai..wells no so gürtel dra het wommer ebe ka uf grössi verstelle..

Mirj

@schaai häschs ide oberste schlaufe, gäll? dänn chöntischs entweder s‘ruggeteil einisch umfalte oder mitme nuschi zämä binde so wirds ruggeteil au numal bizli chürzer.

schaai

@Mirj meinsch du det wo träger obe dgmacht sind? das goht jo nöd..s. min finger..

Mirj

@schaai ich meine unä bim stäg. dä gurt umklappe/ drülle oder ebe mitme nuuschi abbinde. es grosses nuuschi im 3egg falte und zämä legge wie zunre lange wurst, usse chnöpfe, dass s’baby uf de wurst sitzt. chunsch drus wie ich meinä😅🙈

LoSo

schaai schrieb: »

@LoSo Aber i chan sie glich inne ne oder wenn sie zfriede isch?

Solangs dier bequem esch und die chli zfride jo klar! Mier ischs ebe sälber ned soo bequem xi 😅

schaai

@LoSo jo find sie ebe wenni sie normal träg au nöd meega bequem..aber mit überkrüzte träger isch viel besser 🙈 hauptsach isch eini vu de türste trage

blüemli89

Ganz klar luemai aber würd mau ä trageberatig machä und teste si hei ja so puppe wo amne Baby ähnlich si! I wet nie meh ohni luemai und fröie mi scho Mis 2 Wunder dinne dörfä z tragä 😍😍💖

LoSo

schaai schrieb: »

@LoSo jo find sie ebe wenni sie normal träg au nöd meega bequem..aber mit überkrüzte träger isch viel besser 🙈 hauptsach isch eini vu de türste trage

Ech fends für ufe Rugge top! Musch luege wen si älter esch, esch der den wohler. s Tuech zum überbrücke bes si grösser esch, esch ke option? oder en hoppediez ( isch us tragtuechstoff aber met em Bütel vorgä, musch nume träger umebinde )

LoSo

ja de priis findi au gstört 🤭🙄