Arbeit - Wie lange in der Schwangerschaft?

bearbeitet 6. Juni, 12:21 in Schwangerschaft
Wie lang und wieviel heit dir gschaffet ir ss?

I bi jetzt de im 6. monet und schaffe ab hüt nur no 50% wöui starki buchschmerze ha vor allem am nami vom ständige sitze. Leider isch mi buch de scho teilwiis relativ hert worde... so das mi dr FA scho reduziert het. eigentlich schaffi gern und ha vor ka sicher bis august/september dürezieh 🙈 ha irgendwie es schlechts gwüsse.... 😓

Kommentare

  • Ich schaffe momentan im 8.Monet no 100% , ha au immer es schlächts gwüsse gha & drum no kei arztzügnis welle.
    Aber ich glaube das isch vo Frau zu Frau unterschiedlich, mir gahts bis anhin no rächt guet,drum schaffi au no.
    Aber wenn du scho so schmerze hesch isch es doch völlig verständlich :-)
  • Ech han i beidne Schwangerschafte erst im 9. Monet afah chürze uf 50 %. Han en Bürojob. Und mini Schwangerschafte sind - usser die bekannte Beschwerde wie Rögge/Steissbei-weh - ohni Problem verloffe.

    Mer chan ned verallgemeinere wenn mer set höre/chörze, chund ganz ufd Schwangerschaft
    und Person drufah. Ech erläbe be üs im Betrieb aber halt au Fraue, wo gärn vorhär scho chli „dehei bliebed“, obwohls velecht nonig so akut wär. Aber denn liids ja au bem Frauenarzt öb är das unterstützt.

    s‘Wichtigste esch dass es am Mami und Chind guet gahd - ufgrund desse sell mer individuell entscheide.

    Alles Gueti wiiterhin 🍀
  • Mach dir keis schlächts gwüsse! Das isch jo nid ohni grund bi dir und wennd jetz efach witer machsch und denn vorzitigi wehe bechunsch seit dir im Fall au niemer danke. S wichtigst isch jetz dass es dir und dim baby guet got. Hets denn negativi reaktione geh oder wieso hesch es schlächts gwüsse?
  • @Frauenmantel nenei das scho nid aber i glaub niemert het freud wenn ä mitarbeiterin scho so früeh weniger schaffet 🙈 und bi ebe stellvertretenti teamleiterin und assistentin vo mim chef. Mi chef vermisst mi äuä scho recht und drzue hei die angere sicher jez au chli meh zdüe was mir halt es schlechts gwüsse mache 😖 aber i weiss, jez zöut nur mis baby und i.... und i wot sicher kei vorzytigi wehe riskiere! Drum het mi dr FA au scho reduziert....
  • Das chunt sicher guet. Süst chasch es jo mol aspreche,vilicht klärts sich denn jo au und du fühlsch di besser. S schwanger si und chinder becho ghört halt efach zum läbe dezue 😏
  • Es isch scho verrukt das mer ide CH es schlächts gwüsse Muess ha als Schwanger, wenn mer nümm Chan schaffe😥 findest truurig das es immer o lüüt gid wo eim es schlächts gwüsse ob bewusst oder unbewusst gänd😒

    Ich Han abem 7. nur no im Büro gschaffet (bi Susch ide Pflege, Spitex, tätig) aber es isch eifach zu asträngend gsi, is auto Ine, use, 4 Stock laufe, Kliente usem Bett mobilisiere, stützstrümpf aalege usw
    Chund ganz uf d Frau, d ssw und de Bruef drufah...
    Lueg guet zu dier und dim chliine Baby.
    Wie d Frauenmantel seid, seid der schlussendlich niemmert Danke...
    Hebs guet🌼🌸
  • Sorry die Autokorrektur 🤦‍♀️
  • Ich bin jetzt ide 30.ssw mit zwilling schwanger und ha jetzt ufghört schaffe. Han au es mega schlächts gwüsse, aber schlussäntlich gahts um gsundheit vo de babies und mir.
    Ich gfinds au schlimm dass mer ide CH muen e schlächts gwüsse ha wenn mer nüm chan schaffe!!@Tanja87 gseh das gnau wie du!!
  • E fründin wo au schwanger isch het mir erst grad verzellt dass ihre chef gfunde heig, wenn sie dehei bliebt wege ss-beschwerde zbsp wenns ihre schlecht isch denn darf er das vode ferie abzieh 😱i ha jo scho vieles ghört und erlebt aber das het mi glich schockiert! Gots dem no?! Das würd jo heisse, wennd e mgd hesch und nid schwanger, denn gots unter chrank. Ide schwangerschaft muesch aber glich go schaffe, wels jo vode ss chunt 🙈
  • In Dütschland isch e Schwangeri sowieso ab de 34. ssw im Mutterschutz, denn mues sie sich au nid rechtfertige. Ich find das richtig so. Wie oft im Läbe isch me denn schwanger? Es set doch jedi Frau d Möglichkeit ha sich uf ihres Baby und ufd Geburt vorzbereite ohni es schlächts Gwüsse zha.
  • Genau so gsehni das au @Frauenmantel👍
    I dere Hinsicht sind mier ide Schwiiz scho rächt Hunde drii😒
  • Findes ir CH au vou Katastrophe! Abr me muess chli ufpasse mit vergliche i üsne Nachbarsländer wöu in Frankrich z. B. ischme ab de 34 SSW „beurlaubt“ defür duret de MU-Urlaub nach de Geburt nume 8 Wuche 😬

    Di Nordische Länder (Schwede etc) si meeeega mit Müettere u Familys 👌🏻. Det chönnt sich d‘CH e Schibe Abschnide.
  • @Frauenmantel ds darf ihre chef gar nid! Ah ferie darf gar nüt abzoge werde, hoffe si laht sich nid la verunsichere vo dem! Er darf höchstens wen er anstatt 14 muetterschaftsurloub 16 oder 18 wuche ahbietet, darf er wen si vorem termin chrankgschriebe wird die abziehe resp.kürze! Und für öbis het er ja ä taggeldversicherig für sini mitarbeiter🤦🏼‍♀️ finges tragisch! Klar findes ou tragisch wen ä frou d ss charte zieht und weg jedem seich eine uf krank macht! Da isch haut nähr chli d Quintessenz drus... ä AG wo schlecht uf schwangeri reagiert het wahrschinlich scho schlechti erfahrige gmacht! Gwüssi sache wie rüggeweh, mau chli ä herte buch oder es ziehe oder d symphyise wo meh macht isch haut „normal“ u ghört dr zue! D frag isch d hüüfigkeit wo gwüssi beschwerde uftrette! Ihr zwöite ss bini sogar lieber ga bügle aus deheime wüs im büro wie ferie isch gsi!
  • Sabi81, i ha ihre gseit dass er das def nid darf! I hoff sie wehrt sich!
    Jo klar, es git sicher au Fraue wo s ss si nutze zum scho früeh dehei bliebe, ABER i chönt mer guet vorstelle, dass das vieli mache well sie Angst händ dass sie bis zue Geburt ane müend go schaffe wenn alles guet isch und spensum nid scho früener kürzt wird. I säg nüt degege wenn e Frau seit sie wet schaffe bis zur Geburt, ghört me jo no viel, aber i find das darf jedi selber entscheide. I has gfühl wenns au bi eus so greglet wär dass es e muetterschutz säge mer ab de 34.ssw gäbti, manchi Fraue nid scho vorher würde um e chürzig vom Pensum etc bitte, wel sie wüsste dass sie no ziit für sich werde ha bevor s baby chunt. Was i dermit wet säge, isch dass es bi eus meistens au als ruhigi Chugle schiebe agluegt wird wenn e Schwangeri die letsti ziit vor de geburt wet dehei bliebe und sich ihrem Nesttrieb wiedme statt go schaffe. Dass das ganz es natürlichs Verlange isch und zum schwanger si dezue ghört, interessiert leider niemer ,was ich sehr schad find.
    Zuedem isch erwiese dass sich stress uf s baby im Buch übertreit, und es isch stress hochschwanger go schaffe wemer nüm mag und sich nid wohl fühlt (au wemer e gsundi ss het.)
    I bi mitem dritte schwanger und 100% Huusfrau...mol luege, momentan mag i no guet (ussert die 1-jährig viel umeträge🙈), aber i wird def no uf Hilf vo mim maa und Familie agwiese sie.
  • Also ich find wenns eim und am baby guet goht, chan mer problemlos bis am schluss schaffe, ich find das mit ziit ha für sich sött kein grund si zum nüm go schaffe...mer hät au ziit für alles anderi wänn mer schafft...alles ä frog vo dä organisation...ich bin au ganz klar de meinig äs wohl vom mami und am baby isch äs wichtigscht, aber wenn alles guet isch söll mer au bis am schluss schaffe...und ich find vil nutzed äs schwanger si us und drum sind darbeitgeber au immer skeptisch...
  • @miawia12345 findes sowie so schlimm wenn en Frau d Schwangerschaft als "Krankheit" aluegt... Genau weg derige sind wie du seisch d Arbeitgeber so skeptisch... Scho schad...
  • bearbeitet 10. Juni, 11:21
    also bi de erste ssw hani abm 6mt nur nuch 50%gschaffet da mir ä bewohnerin so i buch ginget het dasi starki vorwehe bechu han, defür eigentli bis zur geburt ( am tag mini stunde gschaffet aschlüssend go gebäre😂),
    jetzt bi de 2te ssw händs eifach gfühl gha dasi schu nuch 7-8 schweri lüüt mache, daher hani zum mich schütze au im 6te mt gseit nur nuch 50% und abm 9mt sogar 100% eifach au zum mich schptze willi nüm ha mögä und recht beschwerde gha han. Hät gern länger wieder gschaffet, aber Klima hät vorralem nümä gstumme ( stress, alles söllä mache ect.)

    Finde jedi Frau söll uf ihres Buchgfühl losä
  • Ich bi de Meinig das jedi Frau döf selber entscheide wie vel Ziit sie för sich brucht oder wet vor de Geburt! Redt jo niemer devo das mer sich mues chrankschribe loh...macht jo au kei FA wenn mer seit i hät gern nochli Ziit för mech! Aber es git jo au no d Möglichkeit vo Ferie. I bin jetz im 6. Monet und han 4 woche vor de Geburt au no Ferie igeh dasi die Ziit nochli chan gnüsse. Min chef isch voll uf miner siite und unterstützt das! Und so hets au kei nachteil förs Team. Und wenns eim wörkli ned guet goht denn söl mer au keis schlechts gwüsse ha wenn mer chrankgschribe isch. Und scho gar ned sel mer sich met anderne vergliche. Jedi schwangerschaft isch andersch. Jede Arbetgeber isch versicheret för so fäll. Ich finds tragisch das es müetere git wo kei verständnis hend wenns eim i de schwangerschaft ned guet goht nur wel mer selber en super ss gha het...🤦🏼‍♀️
  • Wänn mer das mit ferie cha löse und das für dä arbeitgeber au stimmt keis thema, aber mer isch mer hät au pflichte im arbeitgeber gegeüber solangs eim guet goht und äs git gnueg fraue wo das nöd so ernst nämäd und sich chrank schriebe lönd obwohls nä no guet goht...we gseit sobald dgsundheit vom baby oder dä frau gfördet isch, keis thema, dänn söll mer dihai bliebe und sich schone
  • Ich han bis 4 Wuche vor Geburt 100% gschaffet mit würkli viel arbet. Bin elei gsi im Gschäft. De Muettermund isch immer chürzer worde.

    De Chli isch denn au 15 Tag früehner cho als erwartet. Het irgendwie keine danke gseit 🤷🏼‍♀️ isch aber no guet gsi, ha mir nie richtig Gedanke chönne mache weg de Geburt und s Hebammegspräch hani au nie gha.

    Mi Fa isch au strickt geges chrank schriebe gsi. Ich find er het mi dörfe reduziere. Mi Chefin isch wie de Aff am Berg gstande woni grad päng nömm cho bi.

    Ich würd eifach s Gschäft usblände und a dich dänke. Im Nachhinein gsehsch das denn sicher au so 🍀❤️
Hey! Babyforum.at ist eine moderierte Community die auf Sicherheit und Anonymität wert legt. Ein Großteil der Gruppen, Themen und Beiträge sind nur mit einem Nutzerprofil zugänglich. Melde dich kostenlos an!

Triff Mütter aus der Schweiz Zürich Ostschweiz Zentralschweiz Nordwestschweiz Mittelland Genferseeregion Tessin Ausland