Baby 13 Wochen schläft nur an der Brust ein

veki88

Hallo zämme,

Mini Tochter (13 Wuche alt) schloft nur an dr Brust nach em Stille i. Dementsprechend schloft sie au nur in unserem Bett.
Wenn händ ihr de Schritt mitem Kinderbettli gmacht und wie?

Mir händ sie sehr gern bi uns im Bett. Allerdings hämmer Bedenke, dasses spöter schwieriger wird, dass sie allei in ihrem Bettli schloft- und au ohni Brust.

Danke im Vorus für euri Antworte!

AnDu88

S wichtigste - Solangs für euch stimmt, wieso ändere sones chlises Bebe brucht di no ganz fest 🥰
Üse junior schloft no bi üs im Bett, er wird bald 4i und het bis fascht 3 d Brust gha zum ischlofe - Tagsüber und ide Nacht heimer scho längers abgstillt gha. Ha denn aber schwangerschaftsbedingt komplett abgstillt (es het 3 täg lang zobe bitteri Träne gä) aber nachdem het er ohni problem allei chönne ischlofe, er het jetzt mini Hoor woner duet hebe zum ischlofe.

Dini Muus isch no soo mega chli und si brucht das sicher no. Aber wenns für di nümme stimmt - was au völlig ok isch! denne wärdet dir e Lösig finde. Wird am afang vilicht schwirig wärde und Träne gä...de muessme halt eifach ushalte und begleite ❤️ vilicht es neus Ritual ifüehre oder de Papi bringt si is Bett und git de guetnacht Schoppe?

Alles gueti ❤️

Jeaninne

Mini glai isch bis 6,5 Monet voll gstillt worde und IMMER UND NUME an dr Brust igschloofe. Wo mir denn uf e schoppe ungstellt hän, het sie immer dr schoppe bruucht zum ischloofe.
Elai ischloofe goht erst syyt ca 8 wuuche will sie syyt denn w Nuggi nimmt.

Mir hän sie nie bi uns im bett ka, will mir das nyd hän welle. Ich ha sie oft in unserem bett in schmoof gstillt und wo sie den tief und fest gschloofe het in ihres bettli glegt.
Mit öbe 3,5 monet isch sie in ihres zimmerli gange und denn hani sie im sessel nebe ihrem bettli gstillt und wenn sie ofuust het abglegt. Das het am afang bitz dra gweehne und mehrfach probiere bruucht.

Wenns fyr di abr no stimmt wenn sie bi euch schlooft, denn los sie bi dir! Wie d AnDu88 schriebt, es muess einzig und elai fyr euch stimme!

Miette

Hallo. Das kenni sehr guet. Mine chli het das öppe bis zer 18. wuche au so gmacht. Irgendwenn isch denn zischlafe au ohni stille gange.
Mier hei üse chli eifach immer sobald er igschlafe isch, in sis bettli (in üsem zimmer) ta. Müess sege, dasi eifach besser gschlafe han, wener nit mit im bett pfüselet het. (Und han kei platz gha für es bistellbett 🙈). Irgendwenn ischer denn nimme igschlafe bim stille. Mier hei denn eifach so chli als ritual agfange zersch bettfertig mache, stille. Nachem stille z‘kuschel, denn wener müeder isch worde hani ne is bettli gleit, nuscheli gä, zspielührli agstellt & denn ischer ipfüselet. Mal is guet gange, mal hani ne lang muesse trage bis ipfüselet isch. Aktuell ischer 6.5 mt. alt und wier tüe wieder ischlafstille 😉 sit ca. 1 wuche. Er bruchts grat wieder.
Zudem simer vor 6 wuche züglet und hei denn grat entschide daser sis eigend zimmer berchunt. Klappt supper. We är aber nu chli meh nechi brucht, darf er au bi üs im bett schlafe.

Ich würd sege es git keis richtig und falsch. Sie isch ja au no so chli & brucht eifach die nechi. Es muess aber für alli passe. Wener zgfühl heit, dasers gern mal anders probiere möchtet, de probierets mol us. Vili chat der papi sie mol chli i schlaf wiege oder ier ligged alli gmeinsam ab und probierets so... 😉Los uf dis gfühl, du machsch das sicher super 😊👍🏻

AnDu88

@veki88 Du hesch glaub underem falsche Post zrügg gschribe hani gseh 😊

Glaub mer, de Papi oder d Grosseltere wärde e Wäg finde si zum schlofe zbringe. Vertrau ihne und dim Baby, i weiss es isch schwer am Afang. Aber au es Baby wo nur d Brust nimmt, wird 2-3h ohni di uscho ❤️ meistens „faste“ si i dere Zit bis s Mami wider chunnt. Alternativ chönnt me au abpumpti Muettermilch oder Pulvermilch im SchnapsaBecherli gä oder miteme Löffeli (muesch mol go google) wenn si de Schoppe nid näme.

Ig bi denne au is Rückbildigsturne gange zobe, bi ca. 2h weg gsi, ha mi Sohn vorher no gstillt und bi denne gange, Papi und Sohn hei kuschlet und er het meistens i sine Arme pfüselet woni zrügg cho bi. Es het au mol träne gä, aber er het ihn denne eifach begleitet und umetreit.

AnDu88

Bi mir ischer immer nur ade Brust igschlofe, andersch ha ig das nie gschafft am afang.

Mis Mami het z.B. au gschafft ihn nachem i schlaf träge i sis Bettli z legge, was bi mir nie klappet het. Genau so ischer bi mim Maa eifach so im Arm oder uf de Brust ipfuset - bi mir kei Chance. Bide Schwigermuetter hetter amigs 3-4h am stuck chönne schlofe, bi üs dehei het das nid klappet 🤷🏼‍♀️
Jede findet sin Wäg und d Babys wüsse halt wenns Mami ume isch und wenn nid 😂 sobald ig ide nöchi bi gsi hetter nur no Mami welle.