trotzen

JennyHelin

Momentan isch mini chli rächt ahsträngend 🤭 und ich weiss nie wie reagiere bzw. Han angscht weni flasch reagiere. Sie fangt ah mich zschlah oder rüehrt mir sache ah .. das macht sie aber nur bi mir 🤷‍♀️ wenn sie mi wot schlah dan hebi ihre hand und säg Nei das duet am Mami weh und den chunt au mal es luts Nei wenns wider macht... mängisch gats de oder sie raschted uns und fangt ah schreie... ih dere situation bini de mängisch hilflos ... wot sie gern id Arme neh und tröschte weiss aber ned ob das de richtig isch ... sie isch erscht 19 Mönät alt und ich ha mängiscjs sgfügl sie isch isch scho ide trotzphase 🤨🤔

AnDu88

Ig cha dir s buech „Mein gewünschtestes Wunschkind treibt mich in den Wahnsinn“ wärmstens empfähle. Es het mer soo d Auge göffnet was i somene chline Menschli inne vorgeit und wie riif ihres Hirni i dene Situatione isch.

Die Gfüehlsstürm (wie ig si fasch lieber nenne) begleite brucht au vo üsere Site us vill energie genauso wie bide chline.
I dem moment het mi chli komplett zue gmacht er het nüt me ghört und nur „gwüetet“. Ig bi bi ihm blibe, ha gluegt daser sich selber oder mir nid cha weh mache, ha probiert d Gfüehl z benenne, ha gseit dasi verstoh daser hässig isch und dasi do bi wenner mi brucht. Wenn dr afall düre isch gsi hetter mi umarmt und brüelet, de hani ihn eifach ghebet. Meistens ischer de vor erschöpfig igschlofe. Es isch sehr kräftezehrend und me het oft zgfühl me machts falsche, aber bi üs isch das bis jetz dr richtig wäg, er isch jetz 3,5 jährig.
Oder was au chasch isch alternative abiete, anstatt spielzüg schiesse, söll si chüssi oder plüschtierli schiesse, a bode stampfe oder ines chüssi haue 🤷🏼‍♀️
Guets dürehebe, es geit verbii 😅

Sabel89

Mini chli isch genau au 19 Mönet gsi und es isch ähnlich wie bi dir. I ha gad so e psychologischi Berotig gmacht au no weg andere Sache aber döt isch au das Thema gsi. Sie hättmer viel Tipps geh und i sprich etz amel au Gfühl a und seg i verstoh dass du hässig bisch und versuech ifühlsam zsi. Wenn sie mi schloht gibi ihre e Alternative und seg ihre sie söll z.B is Chüssi schloh so nimmsch du ihri Emotione Ernscht und dMöglichkeit diä usezloh. Da macht sie denn au. Mengmol probiert sies denn nomel denn gubere wieder e Alternative oder denn segi amel da findet sMami nöd schön und so wött sMami etz nüme mit dir spiele/ esse oder wasmer mache sind und denn gangi chli weg vo ihre afach so dass sie mi no gseht und denn isch ide Regel guet. Und wenn sie denn so afangt teubele z.b wili nei seg versuechi au Verständnis zeige für ihri Gfühl und seg au dassi da verstoh etc und loh sie afach teubele und blieb aber konsequent. Am Afang ischmer da uh schwer gfalle aber mit de Zit gohts. I ha afach gmerkt dass wenni sie wott hebe i dere teubeliphase wirds viel schlimmer. Und mit dene Sache hemmers echt guet im Griff. Oder Ablenke isch au immer guet.

Sabel89

Ahh und wa sie mir au no grote het. I ha denn viel no e schlechts Gwüsse gha wilmer hald mengmol usegfutscht isch dass sie mi närvt i dem moment dassi da tue umformuliere und seg mi nervt dass du sesse am bode rüehrsch oder dis momentane verhalte närvt mi etz gad. So beurteilsch du nöd person sondern sVerhalte vo ihre. Da hetmer au seeehr gholfe

Luki_Christen

@Sabel89: Di Ahsatz isch uf jede Fau guet. Mir hei öppis ähnlechs imene Kurs für gwautfreii Kommunikation ahgluegt. Zersch bennensch das, wo di stört, aber ohni e wärtendi Ussag z mache. Denn seisch, dass es di stört oder verletzt u am Schluss, was du dir wünschisch. So geisch vo dir us und machsch ke Ahgriff ufd Person. Das hiuft extrem.

Sabel89

Jo da glaubi. I hami hüt gad au ertappt wieni ganz andersch reagiert han alsos eigentli ha wölle und es isch nu schlimmer worde. Es macht so viel us

JennyHelin

Ja es isch bi mir au ned eifacher wordä...
Sie tested mi mim. Extrem us 🤭 es Nei schätzeli das isch ned guet das duet am Mami weh ... und chlaps macht sis wider... und lacht

Weni ihre es chüsi gibä den knallts sis mir ah ... ich gang de meischtens usem ruum und lah sie de zu mir cho ...
Das klappt am beschte und den git sie mir de eh kuss und wot kuschele ..

Aber das gat öps 2-3 täglich so ...

Oder au ide Migros uf de Bodä ligge chan Sie au scho guet 😅 ... uf das warted glaub jedes Mami ...