Schwangerschaftsbeschwerden

Sunnebluememeitli

Hey zämme
Ich bi aktuell ide 21 ssw. Eusem Würmli gaht sowiit tiptop jedoch mir eher weniger. Ich ha immer mee Ruggwee und mir isch wiiterhin am morge schlächt und muss mi eig fast jede Tag übergee. Ich schaffe aktuell ufm Notfall ide Pfleg und es isch recht stressig und wenns lauft den hani zimlichi Buchschmerze.
Zudem chumi oft Chopfwee über und chami schlechter konzentriere. Ich bi jewils so kaputt dasi eigendli hei chume und ga go schlafe dasi am nöchste Tag überhaupt mag ustaa zum go schaffe. Jetzt weissi nöd obi söll mim FA alüte und sege dass es nüm gaht mit schaffe wie gseend ihr das? Het öpper erfahrig mit schaffe ide Pfleg als schwangeri?

JennyHelin

Also ich ha ide Pfläg gschafft.. und dur min sehr tüfe Bluetdruck hani au nümm so lang chönä ... bin sogar wärend ich öpert duschet ha im Badzimmer zämmeklappt... ich ha jedoch welle schafte und mich gschämt zum was am arzt säge ... also mi de getraut ha hät er mich zerscht uf 50% abegstuft ab de 22 ssw.und de ab de 30ssw 100% chrank gschriebe.. ich würd eifacht offe mit dim Frauenarzt rede.. und de chunt das scho guet 😘 alles gueti witerhin

Miette

Huhu. Ich schaff au ir pfleg (anästhesie). Han au zimli tiefpünkt gha, bi regelmässig vor patiente kollabiert. Mier is aber susch recht guet gange (natürli au totmüed gsi & rüggeweh gha, aber das ghört ja derzue). Han müesse iner 32. ssw. Reduziere han zersch 75% gschafft denn ihr 36. uf 50% und nacher grat ihr 37. miesse 100% deheim blibe (han heftigi symphyse- und ischiasbeschwerde bercho, dasi nüm han chönne laufe).

Ich persönlich find 21 ssw. Recht früeh zum grat loh chrankschribe... gell, geit denn doch no ziiiimli lang bis dis baby da isch. Mier isch am schluss woni 100% deheim bi gsi fasch decki ufe chopf kiit. aber das muess natürli jede selber wüsse. Vili chasch ja mol uf 50% reduziere & luege wies der denn geit. Oder du suechsch zgspräch mim arbeitgeber.

__Yamila__

ich han au so ruggeweh gha und mir het de ssgurt oder stützgurt gholffe. akupunktur chan au no kli understützend würke. oder kinesiotape. gueti besserig

Taila

Ich würd das unbedingt mitem FA bedpräche. Es bringt niemertem öppis, wenn du dich da durequälsch. ich ha das i de erschte SS au gmacht und bin nur en halbe tag usgfalle und am schluss het mer niemert danke gseit.
jetzt i de zweite SS hani mi scho rächt früeh 1 lektion (bin lehrerin) la chrank schribe.

nutella92

I schaffe o ir Pfleg (bzw aktuell Muetterschaftsurloub) u ha ab der 25. ssw gmerkt dasi nümme 100% cha.. ha aglüte u sie het mi problemlos 50% chrankgschribe. Das si welte gsi! Mir ischs sooo viu besser gange. Du muesch zu euch luege! Es seit niemer merci- vor auem ir Pfleg nid bi ner ab der 37. zu 100% chrankgschribe gsi.

Juli88

Taila wieviel Lektione schaffsch denn du? Und werum nume 1?

Taila

ich schaffe 10 Lektione und ha mi eini la chrankschribe, wili suscht vo 8-17 Schuel hetti a ein tag. ich hetti ebe no en zwüschestund vo 15-16. So chani scho am 15 statt am 17 hei ga😅

Taila

ah und über de mittag hemmer no sitzig. det chani mi also au ned usruhe und bin eigentli immer scho am 7i am morge i de schuel zum no züg parat mache

Juli88

Ui jo das isch mega streng 🥴 han au so täg gha. Jetzt isch min schlimmst 7 Lektione. Aber es isch sust en ruhige Tag. Vo dem her gahts guet.