Kinderwunsch 2021

meki_33

Hallo mitenand, als stilli mitläserin in diverse sites, hani dänkt i mäld mi au a und tusch mi ändlich us mit lüt wos ähnlich goht wie mir. Ich bi 29, bald 30😣 sit 2 johr kw leider erfolgslos.. zurzit im erste zyklus mit letrozol, 7. zyklus Metformin (sit märz 21 erfahre dasi Pcos han mit Insulinresistenz) Spermiogram vom maa, alles i.o.. nit das es mi stört das es guet use cho isch.. nur ligts problem allei an mir was mi rächt fertig macht.. verstönd ihr wasi mein??….

Zurzit ES plus 14.. Test vo hütt negativ - alles schei…

Wäm gohts au glich oder ähnlich? Ich verzwiifle..

Freu mi sehr über zahlrichi Nochrichte!!
Lg
Meki

tna

Hallo liebs ha dich i hibbel gruppe erwähnt..
Mir sind au sit 1 jahr am üebe.. doch bis jetzt no nüt🤷‍♀️

meki_33

Danke.. due mich sehr gärn drzue gselle🥰

Jani

Hey mir sind sit 10 mönet am übe, au ich hand pco und bi zurzit uf natürlichi art am das ganze in griff z becho.

minggi

Hallo @meki_33, ich cha dier guet nachefühle. Tuet mr leid dases nu nid klappet het. Ich han 2.5 jahr ghibblet. Jetz en scho fast 6mt alts wunder näb mier. Bi üs isch alles guet gsi, kei ursach gfundä wordä. Das hets schwär gmacht z verstah wiso es nid gaht. Du weisch ah was es liit, das stuck gwüssheit verhilft üch, so wüsseder wo ahsetze. Medizin cha scho vieles. Es chunt scho guet. Gib nid uf, lueg eifach guet zu dier, es darf dich nid kaputt machä. Mier het akupunktur sehr ghulfe. Bi den au im 2. Zyklus mit akupunktur schwanger worde. Das chunt scho guet 😉

meki_33

@minggi Danke für dini nochricht. Jo 2.5 johr isch ächt lang, obwohl wenn me zrugg dänkt me sichs gar nit vorstelle ka, das es scho so lang nit funktioniert und eim släbe glich zu schnäll vorkunnt. I weiss zwar nit was schlimmer isch, dursach zkenne und eini isch vorhande oder es existiert gar keini und me weiss es nit wieso snit klappt.. das duet mr ächt leid dass es so lang bi euch nit funktioniert het.. ich ka mi sehr guet dra erinnere woni im märz zum FA bi will mini mens 3 mönet nit ko sinn und ich ziemlich sicher gsi bi dasi schwanger bi. Ich ha dört nit mol e sst gmacht ka, willi nit so dr typ gsi bi wo testet oder sache am körper duet nochverfolge oder mässe etc. Ich mit mim unsinn glaub, das bruch ich doch nit. Mir verfähle eifach immer nur dr zittpunkt, an das ligts ganz bestimmt… naja falsch gedacht.. analyse eierstock voll zyste, evtl. Endometriose.. wird schwer kinder zkriege.. ich bi dört use gloffe und ha eifach nur no welle in es loch versinke. Aber zurzit verkraftis no rächt guet. Ich lis halt viel und ha vo vielne fraue gläse, das es glich klappt het au wenns halt mit hilf passiert isch..
was passiert bi däre akupunktur genau? Was genau leitets das es zunere schwangerschaft wird? Hani jez nonie ghört und dönt sehr interessant. Wie viel mol hesch das miesse mache?
Lg

meki_33

@Jani Hesch denn du die Diagnose vom FA überko? Wie gsehts denn mit dinere Schilddrüse us oder Insulinresistenz? Ich würd ufjedefall dere Sach guet nochego, süscht gohts dir wie mir und du stohsch nach 2 Johr immerno so do wie ich (jede isch natürlich anderst, aber ich mach mir sehr vorwürf wieso ich nit friehner bi go zeige)
Lg

Jani

@meki_33 also i ha diagnose im August vo dä Gyn becho i ha kei insulinresistenz und d schilddrüse isch no im ok bereich.
Ich bin im nöche Kontakt mit mine Ärzt und mir versuechet jetzt eifach mit ernährigsumstellug und natürliche produkt min körper wieder in fahrt z bringe. I han u Schlechti bluetwert gha wo aber mitlerwile wieder besser sind und ich han sit absetzte vo dä pille jetzt s erste mol ohni nohelfe e periode becho 😊

meki_33

@Jani Das tönt doch scho mol alles super.. dörfi froge wie alt das du bisch und isch das dr versuech fürs erste kind? Das dperiode schomol isetzt das isch doch scho mol sehr guet. Ich ha amigs zykle vo 3-4 mönet….

Jani

Also ich bin 26gi und es wär s erste genau .
Also i han ez 190 täg gha im letschtä zyklus, und i ha vor guet 2 wuche alles umgstellt, also ich esse gluten zucker und milch frei

minggi

@meki_33 oje das tönt alles au nid schön. Es sind langi 2.5 jahr gsi. Bi viel down gsi. Kolleginne fu mier hend i dere ziit 2 chind becho. Mier hend ide KiwuKlinik ä insemination gmacht ohni erfolg, das het mr den de bode undr de füess gnu. Ich han nüm möge, das isch de ziitpunkt gsi woni gfunde han ich muess was ändere. Ha den psychologischi hilf gholt und ebe akupunktur. Ide akupunktur hends mier gseit das mini gebärmuetter chalt sig und de körper so gar kei energii fürne ss. Bi den 2x ide wuche gange und het den glii klappet. Han au den e problemlosi ss gha und bi jetz es überglücklichs mami und hoff natürlich den irgendwenn ufnes gschwüsterti...🙂

meki_33

@Jani Oh sehr guet.. ich ha no chli mieh mit alles umstelle.. sött jo au uf vieles verzichte.. aber wie seit me so schön step by step..☺️

Jani

jo i ha au no mega müeh und s esse momentan isch recht eirlnig 😂

meki_33

@minggi A was.. wow sehr interessant, dass die tempi etc so chönne usefinde und das es e problem könnti gä wenn die nit warm oder so isch. Dass das FA nit au könnt usfindig mache?!
Bisch denn erst kürzlich schwanger gsi oder sinder bereits uf n2 am hoffe? Sorry fallsis irgenwo überläse ha.. ☺️

minggi

@meki_33 ja us schuelmedizinscher sicht isch alles ok gsi. Chinesisch medizin schaffet ganz anderst. Sie hend das mit mim puls, abtaste und minere zunge usegfunde. Sehr faszinierend die traditionell medizin. Ich han im April e bueb gebore, im moment verhüetemer no, aber nurnu bis ändi jahr da mier nid wüsset ob mier das glück zum schwanger werde numal derfet erläbe

meki_33

Wow ächt mega krass. Het denn dini FA dört ahne verwiise oder hesch du das sälber „iigfädlet“? Wie isch das eigentlich nach dr geburt, wie lang muess me do warte bis mes wieder ka probiere? Ich glaub mit däre situatin und lange wartezit wohni jez ha würdi sofort wieder starte.. aber ebbe me weiss es erst wenns denn au sowitt isch.. dörfi froge wie alt du bisch?

minggi

Ich han das sälber ihgfädlet. Aso nach kaiserschnitt empfählets es jahr z warte. Ich han aber normal gebore drum dörfti eig sofort starte. Han ai lang dänkt das mier das so wärdet machä, jedoch hani ez glich chli wellä wartä zum de chli nu chli gniesse. Ändi jahr wärdemers den aber eifach lah drufah cho und hoffe mier hend numal sones glück🙏 bin im April 29gi worde.

meki_33

Ich hätt eifach chli schiss dases nomol so lang goht.. aber me weiss jo nie wies chunnt.. aber freut mi das du jez dis mami sii chasch gniesse und denn demnächst wieder❤️

MamAnnigna

@meki_33Es duet mir leid zghöre dases nonig funktioniert het… au mit dä zyste und ev. Endometriose.

Ich han Endometriose Stufe 3 gha und au immer wieder Zystene. Mir hend üs druff igstellt dases schwer wird zum Schwanger werde, wenn nöd sogar Chinderlos blibe… insbesondere da ich 5 jahr lang starki hormon han müässe neh (spiral plus pille) und drum hani mi entschiede (uf Empfehlige vo minere Physio, wo viel Patientinne gha het mit dä glich Stei im Weg, wos denn schnell funktioniert het) zum Akupunktur mache. Und es het au nachemen halbe Jahr klappet..Mir hend üs allerdings au kein Druck gmacht und gseit mir nehmets wies chunt, und das denki het au mitgspielt.
Es duet weh wenn all um dich ume Babys überchömet, aber gib nid uf.
Ich chan dir würkli Akupunktur empfehle. Weiss ez nöd vo wo das chunsch, aber im Ruum Winterhur, chani dir d‘Nancy Ribi impfehle.

Blibt stark und viel Glück eu.🙏🏼

meki_33

@MamAnnigna Danke viel mol für dini Nochricht.. do ich mi noni genau befasst ha mit endo (weiss noni genau, ob ich das zuesätzlich au ha) kenn ich au dstufene nit so richtig. Was genau isch dstufe 3? Und wie het mes bi dir usegfunde? Hesch du miesse e buchspiegelig mache mit ops und alles drum und dra?
Ich gohs au langsam a, nur ha ich halt vor 2 johr dänkt das es viel schnäller würdi go und ha vo all dene krankheite nie was ghört geschweige denn, das ich so öbbis könnt ha.. nach 2 johr probiere und immer wieder entüscht zwärde isch halt nit immer eifach. Aber ich bi ruhig und zeig au nit immer wie sehr ases eim beschäftigt und au chli angst het, obs je mols klappe wird??
Jetzt hani scho mehrmols über die akupunktur gläse und muess sage, das würdi gärn emol ahgo. Muess mi nur no informiere, wär mi do überwiist oder an wär ich mi do genau wände muess?
Ich wohn im Thurgau, Winti isch halt scho chli witt vo mir. Aber ich dänk do miessts sicher au lüt ha, wo das mache.

Was mi no interessiert, us wellem grund hesch denn miesse spirale plus pille nä? Wege dr endo oder het das e andere Grund?

Lg

•Elefäntli•

@meki_33

HalliHallo
Han grad gläse das du usem TG bisch vowo denn gnau, i het dir e gueti adresse wo KK anerkannt isch für id Akupunktur 💪🏻

MamAnnigna

@meki_33Dur das, dasi Jahrelang glitte han bide Mens, isch denn ä Ärztin endlich mol uf dä Gedanke Endo cho und het mi im Spitol für ä Buchspiegelig ahgmolde. (Nur so hesch gwüssheit obs hesch oder nöd) Es git 4 Stufe.
So viel Hormon hani müässe neh weg dä Endo, das si nöd gad wieder chunt. Und han aber au zu dem Ziitpunkt kein Partner gha, dasme gad hetti chönne sege mir legget los mit chind.

Grundsätzlich meldisch di selber ah bide Akupunktur. D’ Elefäntli, hani gseh chan dir öbert hoffentlich ide nöchi empfehle.

meki_33

@elefäntli ich kumm usem Bezirk Arbon. Kasch mr die mol duure gä? 😊 danke dir!

meki_33

@MamAnnigna und bisch du denn vo sälber diräkt schwanger worde ohni hilf? Oder wie isch das bi dir verlaufe nachem Zittpunkt wo ihr entschiede händ das ihr jez es kind wänd? Würd mi sehr interessiere, wies genau ablauft mit Endo oder wie lang ases ka go..
Lg

MamAnnigna

Ja, bin ohni hilf schwanger wordä…
Han dank dä akupunktur, en regelmässige zyklus au übercho gha und zwei mönet nach dä entfernig vode spirale uf natürlichem weg schwanger wordä.

Aber mi darf nöd vergesse, jede körper isch anderst.

•Elefäntli•

merki_33
chasch du mir evt privat schriebe evt chumi d nochricht öber

meki_33

Es het glaubi nit funktioniert😂 aber so wieni do ummenand gläse ha wärde sie das jetzt demnächst iihstelle?!.. hoffe mers mol☺️

meki_33

So ich ha jetzt mini letzti tablette letrozol iigno und hoff sehr uf es entwicklets eili.. letzt monet hets au klappt und bi sehr zueversichtlich, das es dä monet au wachse und schlüpfe wird. Jetzt muessi warte bis am Mittwuch zum US. Ich hoff das es dä monet ändlich klappt🍀🍀🍀❤️❤️❤️

lachuli

I druck dir ganz fest Dume 🍀
I bi jetzt am hibble.. ES 5 🥰

meki_33

Es wird spannend🍀🍀🍀

meki_33

Druck dir natürlich au ganz fescht duume!!!

lachuli

Danke @meki_33

bireweggli

Hallo liebs, chader hoffnig mache! Ha insulinresistenz schilddrüese underfunktion, zystene, hämochromatose und be jz met 42gi s zwöite mol ss ohni grossi hilf. Blöd gseid „gottvertraue“ und vertraue e dine körper ha!
Hend nochem erste chind met 37gi en fg gah de alli diagnosene und es herts johr therapie wäge de hämochromatose und 4 mt noch therapie endi beni ss worde und jz ssw34.
Gib ned din traum uf und versuech ned z verzwiefle au wenn das ned immer eifach esch und mer au die gfühl döf zueloh ubd läbe.
Han chranio und vorallem akupunktur regelmässig bsuecht, vell yoga gmacht für mich.

meki_33

@bireweggli Danke viel mol für dini Nochricht het mi ächt hütt sehr ufgstellt. Ich ha aber no so viel froge. So wie ich richtig verstande ha hesch du kei pcos oder? Und wie lang händer fürs erste kind brucht? Hesch du drvor scho gwüsst dass du all die sache hesch oder erst drnoch? Das mit hämochromatose hani nonie ghört muessi nochär grad mol google.. und ufgä diemer sicher nit.. nur gits halt die verflixte täg wos eim eifach nüm guet goht mit all dene termine und ständige kontrollene und immer uf de zittpunkt sex zha etc. Also klar, ich bi erst im 2. zyklus mit letrozol (ha jo au erst sit zwei mönet e eisprung) aber die letzte zwei johre hoffe und entüscht zwärde kani jo au nit eifach vergässe wills gar nit hett könne klappe.. Aber me weiss nie, vielleicht isch dä monet, unsere monet☺️☺️

meki_33

Also, ich ha hütt mi erste kontrolltag ka nach 5 täg hormone iinää. Letzti tablette hani am Sunntig iihgno. Hütt hani e Follikel links 14 mm und e Follikel rächts 9 mm ka😊😊😊 eileiterdurchlässigkeit isch au prieft worde und isch alles in Ornig.. i freu mi riesig drüber und hoff das die no wachse und am fritig luege mr denn ob mr scho könne mit ovitrelle uslöse.. bi sehr gspannt und sehr zueversichtlich🍀👍🏼❤️

bireweggli

Bem erste chind hemmer 8 mt gha.
Bem zwöite chind sofort aber verlore ubd jz bem dritte chind 2 johr.
Nei kei pco aber luut de ärzt sehr es grings risiko welli au all 2 woche 6 dl bluet ha mösse abloh und mi körper es frack gseh esch. Aber äbe met 42gi heds jo trotz allem klappet. Und mini kollegin mit pco schilddrüese useoperiert und insulinresitenz esch au ss worde noch 2 johr, und niemert hed ere das no glaubt