Eingewöhnung für Fremdbetreuung 🍀

Satsuma

Hallo Zäme 🙋🏻‍♀️

Ech fange im Februar weder för 3 Täg afo schaffe ond mini Tocher (bald 6 Mönet) werd den ei Tag vo minere Muetter, ei Tag vo mim Vater (mini Eltere sind gschiede) ond ei Tag vonere Tagesmuetter betreut.
Momentan semmer no am igwöhne. Leider hed mini Tochter no recht Mühe ohni mech ide Obhuet vo mine Eltere zsie. 🙈 Bide Tagesmuetter hemmer jetzt no kei Trennig versuecht. 😅
Was hend ehr so för Erfahrige gmacht bim Frömdbetreue? Heds au scho öpper erläbt, dasses gar ned klappet hed ond me hed müesse abbreche?

Ech be gspannt uf üchi Erfahrige 😉

momofgilrs

bi uns hets nid klappt… bi aber nid druff agwiese gseh so früeh, dh hän mr eifach s „alleige lo“ abbroche und uns sehr oft alli zämme troffe, dass si mehr vertraue het chönne fasse…
kurz vor jöhrig isch es denn stundewis guet gange… dh woni wieder gschafft ha hän mini eltere am nomi 2-4h gluegt und denn het mi maa chönne übernäh… und am WE wenni gschafft ha het au mi maa dr ganz dag gno und das isch guet gange….
je älter si wird desto besser klappts… si goht mittlerwile mega gärn, aber säit au wenn si wieder hei will 🤣 zb übernachte will si bis hüt no uff kei fall (si isch gli 3.5j)
aber muess si jo au noni solang mir nid druff agwiese sin….

Satsuma

@momofgilrs Danke för dini Erfahrig 😊

Schint ned so es wiet verbreitets Problem zsie??! 😅🙈
Söscht no öpper wo sis Baby wäred de Frömdel-Trennigsangstphase hed müesse lo Frömdbetreue lo?

LouC

hallo satsuma bin grad per zuafall uf din bitrag gstossa. suacha au erfahriga. wia klappets jetzt mit schaffa und betreuuig? i bin momentan in genau dia glich situation.

Satsuma

Hallo @LouC also mer hend denn gmerkt, dasses so kei sinn macht well üsi Tochter grad ide Frömdiphase steckt. Mer hend üs denn nor uf Tagesmutter konzentriert (well sie emmerhin 2 täg cha abdecke) ond sie denn 3-4 mol pro Woche bsuecht. Esch sehr ufwändig gsi aber es hed sech glohnt. 😊 Sie esch jetzt bereits en ganze Tag bide Tagesmuetter gsi wo ech gschafft ha.🥳
Met mine Eltere fangemer Schritt für schritt a, dasses denn ab März söt klappe. Die Täg wonech jetzt ned cha go schaffe well mer kei Betreuig hend decked mi Ma ond ech ab, hend freitäg igä 😅🤷‍♀️ ech dänk üsi Tochter esch met 3 neue Betreuigspersone öberforderet gsi, obwohl mini Eltere beidi sie scho stondewis ghüetet hend.
Wie gseht denn dini Situation us?

LouC

@Satsuma freut mi sehr, dass es so guat klappt mit da tagesmami.👏🏻 i schaffa au 40% ab märz und miar hend schu vor da geburt entschieda, dass 1 tag mini mama und 1 tag mini schwiegermama z baby hüatet. han miar nia gross gedanka gmacht dass es nid funktioniert, wieso au? ma gseht jo immer nu wia anderi es au ohni problem schaffend zum kind abgeh.😵‍💫 momentan klappts überhaupt nid respektiv zproblem isch dass es nid mit anderna schloft - und as baby wo nid schloft muassi diar jo nid sega wia guat glunt dass es isch.😅 hölle! müasst z baby nid schlofa am tag, würs ohni problem go mit da betreuuig. das wo du gschriba hesch, hani imfall au schu denkt. evtl. wär nur 1 witeri bezugsperson besser gsi als grad 2 neui.🧐 aber das jetzt da oma‘s sega - oje i gsehn schu d gsichter und an grossa strit.😂

Satsuma

Oje ech verstoh dis Problem guet @LouC. Die chline send onusstehlich wenn sie ned schlofid. 🙈 Wie alt esch denn dis Baby? Ond wenn Grossmüettere gönd go spaziere metem Kinderwage, klappet denn schlofe au ned? Also ech ha d'erfahrig gmacht, dass mini chli wenn sie so rechtig müed esch, au a frömde Ort cha ischlofe. Verussetzig esch eifach es Bettli oder ähnlichs ond ehri kuscheldecki. 😉 Chömed denn die Betreuigspersone zo euch hei?
Mer send jetzt met Corona dehei die kommendi woche, das heisst mis Baby werd ned zor Tagesmuetter chöne go 😬 ech hoffe mer müend denn ned weder vore afo. Ond das met mine Eltere klappet jo au emmernoni 🙈
Mängmol frogi mi öbs die rechtig entscheidig gsi esch weder go zschaffe. 🤔🤷‍♀️😩
Ou jo, das esch mer au scho lang und breit öberleid de Grosseltere zsäge, dass es ned goht ond mini chli evtl sogar 3 Täg vode tagesmuetter betreut werd. 😏 Aber ech brenges au ned öbers herz, sie freued sech so. 🥰Obwohls jo eigentli oms wohl vom baby goht.
Sit ech mami be hani schnell gmerkt, dass mer nöm alles cha plane ond zemli flexibel muess sie zom schnell en neue Plan schmiede wenn öbis ned klappt 😅🙈 ned emmer eifach.