Breiverweigerung nach Magen-Darm Grippe

Dana

Hallo mitenand!

Eusi Tochter 7M hät e Mage-Darm-Infektion hinder sich und ich im Moment wieder ufem ufstiigende Ast.

Mir isch klar das es Baby längeri Regenerationsziit hät und en Moment länger bruucht wie bi Erwachsene sich z'erholä. Sie trinkt (ich stillä nümä) weniger wie vorher, Brei jeglicher Art verweigeret sie. Egal ob Frücht, Gmüäs oder Getreide. Was sie herzhaft isst sind Maispops.

Mir bütet ihrä immer wieder das aa, wo sie normalerwiis mega gern hät und nöd na stuehluflockernd würkt.

Gits öpper wo mir cha sege, wie lang dases bi eu gangä isch, bis eui Kind wieder normal gässä händ?

Liebs Grüässli und es sunnigs Weekend.

StePau_ZH

Hallo Dana, mir gahts ähnlich. Mini Tochter isch au 7mönet alt und isst am liebste Maispops, de Rest, egal was es isch verweigeret sie. Au sie het ei wuche lang nur durchfall gah, hans gfühl sit do a isches extremee worde. Gern wart ich au uf en ratschlag vo anderne mamis mit erfahrig.

Liebi Grüess
Stéphanie

Dana

@StePau_ZH Hoi Stéphanie
Und wie isch's bi eu? Nimmt eui Tocher Breili wieder?

Eusi hät hüd wieder welle, also 1 Wuchä nach Infektion😊

StePau_ZH

Ja so langsam aber sicher chunts wieder, aber immerno sehr zrughaltend. Hesch du eifach wieder alles geh wie vorher?

Binaaa

Min chline hets gliche gha.. 1 wuche komplett zrug ufs fläschli, ha den eifach langsam jedi mahlzyt wieder ersetzt, so wie am afang, nach ca. 1 monet isch wieder normal gsih.. Eifach immer abiete, irgendwenn klapps weder

Dana

Hallo ihr zwei @StePau_ZH u_ZH und @Binaaa

Ja Binaaa häsch rächt nach eme Monet isst sie scho wieder fascht alles.😊 Ussert Banane, die hät sie nümä gärn!😅

Hoffä das bir Dir Stéphanie au wieder alles besser klapped!😊

Danke eu für euri Antwortä!☀️