Thema Tod, 5,5jähriger fragt oft danach

AnDu88

Hoi zäme
Vilicht heit dir glichligi Erfahrige gmacht…
Sit es öbbe 2 wuche isch s Thema Tod bi mim Sohn rächt presänt. Er frogt vill drno, wett wüsse ob er wird stärbe und ob mir (Papi, Mami, Grosi, Urgrosi etc.) au müesse stärbe und vor däm het er sehr Angst. Und will sis einte Urgrosi vor öbbe 1 Johr gstorbe isch, frogt er au oft wo dass si denn jetzt isch.

Ig ha ihm das denn so erklärt, dass de Tod zum Läbe drzue ghört, es öbbis ganz natürlichs aber truurigs isch. Aber normalerwis stärbe Mönsche erscht wenn si ganz alt oder schwär chrank si (anderi Umständ hani mol ussegloh). Und dass mir no ganz ganz lang zäme wärde sii als Familie.

Gester het er aber sooo fest afo brüele plötzlich sicher öbbe 1 Stund. Woni ihn gfrogt ha was los isch seit er, dass er Angst het zstärbe. Ha ihn natürlich in Arm gno und wieder das Thema mit ihm besproche aber es isch öbbis wone rächt starch begleitet im Momänt.

Heit dir glichi Erfahrige gmacht? Wie gönd ihr drmit um? Was verzellet ihr eune Chinder?

Mayla

Hallo @AnDu88 i ha gseh dass du no kei antwort übercho hesch. I ha kei kind i dem alter und bi au kei psychologin. I findes guet wie du sis aliege ernst nimsch, zuelosisch und erklärsch. Es isch sicher schwierig wenn so gedanke bim kind im kopf kreiset und eifach verdränge machts nöd besser. I wür hoffe dases e phase isch und ihn so guet wie möglich vo schöne sache verzelle woner am tag erlebt hen, waner no vor hen zum zeme mache, öpis zum lache, was schön isch a de welt und de erde, wie dnatur e wunder isch und so hoffe daser interesse dra het und dur das weniger zit a de tod denkt.. da machsch vilich au scho, wenns extrem wird würi professionelle rot afroge.

AnDu88

@Mayla Merci für dini Nachricht :-)
Jo es isch halt es Thema wo schwierig isch, wills au nid würklech „grifbar“ isch für die Chline. Aber es isch sicher nur e Phase, das weissi. Mir isches uf jede fall sehr wichtig, dasi ihn ernst nime und i wett mit allem ehrlich si zu ihm au halt bide weniger schöne Themene.

Vilicht dönts au grad chli krass (missverständlich), wasi gschribe ha. Es isch nid so, dasses de ganz Tag Thema isch, eher so all 3-4 täg woner wieder froge het und vill möchti wüsse übere Tod. Er isch süsch e sehr fröhliche, glückliche und halt neugierige Bueb wo eifach au sehr sensibel isch. Er isch eher dünnhütig wenns um gwüssi sache goht.
Er frogt au z.B. obs Urgrosi scho alt isch und wenni säge jo, de wird er truurig und seit daser nid wett das si jetz stirbt. Und au bi üs frogter wie lang dases no goht bis Papi und Mami alt si 🙈🙈🙈

Es hätt mi ebe no wunder gno, obs anderi Mamis do inne het wo das Thema au grad hei.

Crystal

Hoi👋🏻 i ha zwar das thema nid bi mim sohn oder no nid, aber villech würd äs büechli häufe zu däm thema? U i finge du machsches genau richtig, ihn tröschtä u erklärä u bir wahrheit blibe u haut villech o zuegäh das du nid weisch wenn das öper stirbt, das das niemer weiss u dir villech mängisch o säuber chli sorge macht? Das är merkt das das haut o drzue ghört u das är nid allei isch mit sire angscht vorem tod

Crystal

Das ha i mau düräblettärät wo mis grossmuetti gstorbe isch u äs büechli gsuecht ha, aber denn hani ds gfüu gha dases für mi dazumaus knapp vierjährige ds gnau isch u ha de eis gno wo meh ä gschicht isch…aber villech chasches mau imnä ladä oder sogar ir bibliothek düreblettärä

D3by

Heii
Ich chan richtig guet nache fühle! Eusi Gross wird jetzt denn bald 7i und het au vor ca 2 Jahr so en Phase gha wo si Angst gha het dass alli wo si gärn het sterbed. Denn sind au so Sätz cho wie "Ja demfall stirbt s Grossmami jetzt denn well sie isch scho alt und ihr sind au scho alt, denn sterbed ihr au und denn bin ich ganz ellei"
Bi eus isch es aber nur en Phase gsi und isch denn mit guet zuerede und so widr verbi gange.
Vonere Wuche händ mr eusi Chatz müesse ischlöfe well sie sehr Chrank gsi isch und jetzt isch es widr ufcho dass sie bi allne Tier und bi allne Mönsche wett wüsse ob sie gsund sind oder sie au sterbed.
Ich finde du machsch das richtig mit erkläre und tröste au wenns das sehr schwierig isch!
Ich ha gmerkt dass mr sehr schnell i d Versuechig chunt zum säge dass öbber ned stirbt zum s Chind i dem Momänt beruige. Das sett mr abr unbedingt vermide, well wenn die Person denn sterbe wür wärs doppelt so schlimm für s Chind.
Bi eus isch denn d Frag ufcho was denn nach em Tod isch. Mir händ ihre denn erklärt dass das niemer so genau weiss. Dass es Lüt git wo dänket mr chunt widr uf d Wält oder mir chunt im Himmel oder oder oder. Abr dass mir eus sicher sind dass es dene Tierli und dene Mönsche det guet gat.
Ich dänke dass das eifach zur Entwicklig dezue ghört. Aber wenn ihr euch unsicher sind wür i das au uf jede Fall bim Chinderarzt odr so aspräche!
Ich wünsch euch ganz vil durchhaltevermöge!