Schreibaby/Kleinkind

BAS

Händer erfahrig damit. Baby wo monatelang jede tag stundelang brüelt u nie zfriede.

Mis chind isch mittlerwili scho 3 u isch immer no brüelig. Aber vorallem als baby hät mer ihn nie chöne beruhige egal ob flasche, singe, wigele, white noise, nuggi, träge nüt hät gnützt. Agfange hät er am 5i morge u am tag nur bim schlafe ruhig gsi.
Denn ab 4i nami isch wieder losgange no extremer zbrüele.
Jetzt im nachinein frögich mich obs evtl wegem schwierige geburt gsi isch?? (2 täg ileite, saugglocke)
Hät öper au erfahrig damit?
Au schwierigi geburt ka?

Mamelo

Hallo Bas
Mer hends au ned ganz eifach gha es esch nor gschlofe worde wenn mer s baby ometreit hend. tag ond nacht. mer hets nie, wörkli nie chöne ablege schösch esches weder losgange. 5 mönet hemmers metgmacht bevor mer eus externi hilf gholt hend.
höt esch besser.
mögli das es demet zue het i ha psychisch kei eifachi schwangerschaft gha ond be de geburt extrem schnell was jo au ned emmer positiv esch.

i wönsch euch alles gueti

BAS

Was händer denn für externi hilf gholt?
Danke das wünschich eu au

Mamelo

jo also i de erschte 5 mönet hämer x versüech gmacht, ärzt, müettereberotig met weiss ned we velle protokoll womer hend müsse mache, caranio therapie, und osteo. gholfe het nix aber gschadet au ned.😉 ond de semmer ebe no ines paar "erste emotionale hilfe" therapie gange. die hend de mim maa vorallem sehr guet do. i wörd röckbleckend säge das sech ned öppis am 'problem' selber glöst het sondern a eusere istellig zom "problem".

Mamelo

ah was mer au no bez gholfe het esch mi metem thema "high need baby" usenandand z setze

BAS

Und suscht niemert schreibaby ka oder hät?

dixi90

Ich han ou es Schreibaby gha. Noch 4 Mönet isch es kontinuerlich immer es bitzli besser worde. Han ä sehr stressigi Schwangerschaft gha (sehr starki Arbeitsbelaschtig und vöu Stress). DGeburt isch brutal intensiv, aber schnell gsi (4h 42 Min). Ich weiss nid, öbs ä Zämehang hed.

Thea

Mini zweit Tochter hät meh oder weniger die erste 9 Mönet duregschroue… furchtbari Ziit gsi. Mer chas nur ushalte, indem mer sich Hilf und Entlastig holt. Und irgendwenn isches tatsächlich verbi! Sie isch hüt noni e gueti Schlöferin, aber es isch scho vill besser. Sie reagiert extrem uf Veränderige oder uf Schmerze (Zäh sind au ganz schlimm gsi!)

BAS

Und wieso meinsch ischs eso gsi? Hesch e schwierigi schwangerschaft oder geburt ka? Wie hesch der hilf gholt?
Ja ich bin au no traumatisiert vo dere zit

Thea

Nei, weder Schwangerschaft no Geburt isch schwierig gsi. Sie isch hypersensibel und das gits eifach. Mer merkt aber au scho, dass sie extrem vill mitüberchunt und sie isch scho sehr wiit für ihres Alter. Sie wird im August zwei und macht scho 3-4 Wortsätz, sie isst mit de Gable, trinkt us Gläser ohni dass öpis denäbed gaht, malt und hebt de Stift korrekt (so wie en Erwachsnige), sie singt Lieder und zellt scho bis 10 (uf Englisch und uf Dütsch). Sie chan sich - bis uf de Body - komplett sälber ahzieh (au Schueh). Gäbt no meh zum Ufzelle. Mini Schwö isch 1:1 glich gsi und hät en IQ vo 150. Kei Ahnig, öb das bi eusere Chline au so isch 🤷🏼‍♀️. We will see… uf jedefall isch eusi erst Tochter im Verglich völlig abgschlage.. vill langsamer i de Entwicklig gsi. Bi de erste Tochter hani e stressigi Schwangerschaft gha (ha no für mini Awaltsprüefig glernt) und sie hät nach drü Mönet duregschlafe 🤷🏼‍♀️.
Wasi demit säge möcht: ich glaub es gäbt so vill Gründ/Iflüss vo usse, werums so sii chan… mit Sicherheit chan mer das wahrschinli nie säge, was jetzt für weles Verhalte schlussendli usschlaggebend gsi isch.

Thea

Und Hilf gholt hani mer mittels Babysitter, mine Eltere (Chind mal abgeh, au i de Nacht) und min Mah hät au mal e Nacht übernoh. Ich glaube, wenn mer glichziitig no völlig übermüedet und erschöpft isch, vertreit mers no vill weniger.

Gröipschi

üse grösser isch o es schreibaby gsi, vo afang a. hei ou ä kack geburt gha (schwangerschaft isch easy gsi). mit 4 mönet hets aber ufghört u iz isch är ä mega ruhige bueb (fot eifach schnäu afo gränne.
i ha am afang, ouso nach ca. 3 wuche ihn au wuche ä haube tag mine eutere gä, dasi chli ha chönne schnuufe. d nächt si guet gsi, süsch wäri äuä düre dräit. einisch het är 7h eifach gschroue 🤯

Bindli

ich han au es schreibaby gha.. mir hend e horror-geburt gha. notkaiserschnitt mit vollnarkose nach hellp-syndrom und ich bin überzoge, dasses demit ztue het. sie isch de no uf de neo gsi 2 wuche und isch hüt (3jährig) eher e aspruchsvolli und weiss genau was sie wett..
mir hend 9 mönet schreiphase gha. sie het praktisch nüt gschlafe am tag und nüt het öppis gnützt. han mir de ide schreiambulanz hilf gholt.. es isch e schlimmi ziit gsi 😢