Milchmenge steigern

Himmugüägäli🐞

Hallo Zusammen!
Wie haben ein wenig Mühe, oder das Gefühl, dass unsere Tochter genug Milch bekommt. Wir möchten nicht mit Aptamil zufüttern.
Haben schon vieles ausprobiert..
Abpumpen, Tee, Globuli, Massieren…
Was hat bei euch geholfen, die Milchmenge schnell und nachhaltig zu steigern?
Gibt es ein Medikament welches hilft?
Vielen Dank für die Hilfe oder Tipps!

snowangel

hallo! Wiso meinsch das sie zwenig milch het? Wie alt isch dini chlini mus?
Also ich chan der vo mini erfahrig mal sege, min chline het mit 4 mönet nüme welle us de brust trinke will er gmerkr ka het usm schoppe trinke isch eifacher, also het er brust verweigert..
Ich han aber witerhi welle Mumi geh und ha bis zu 12 mal am tag milch abpumpt. Also es isch en rise stress gsi, es isch leider immer weniger milch usecho. Das het damit ztue dass sugverhältniss vom baby und die pumpi sehr anderscht sind. So hets mir damals mini Stillberaterin erklärt ka. Ich ha die türsti meleda pumpi und no anderi ka und keine het besser pumpt..
Ich han ebefalls tee, globulis, massage probiert, was ich no gfunde han das mir ghulfe het sind malz getränke.. (Karamalz) oder Malzpulver in milch uflöse.. weiss aber nöd ob du karamalz gern häsch..
Dank dem hani bis zum 5te monat chöne no chli abpumpe aber leider au immer weniger und weniger..
Suscht kennich leider nüt me wo milchbildig steigert usssert... Viel Stille.. eifach mit stille dra blibe und ich denke dass isch die natürlichscht und besti art zum me Milch arege.

Ich hoffe ganz fescht dasses besser klappt für eu 🍀💚

AnDu88

Dini chlini wird jetz öbbe 1-2 mönet alt si oder? Nimmt si gnueg zue und bislet si mehrmols täglich? Falls ja, chas si dass si Clusteret oder süscht vilicht grad öbbis het. Aso bi mir het nüt gnützt wasme cha inäh fürd Milchsteigerig…ha gfühlt alles probiert, s einzige was mer gholfe het isch, s Bebe so vill wie möglich asetze, hut uf hut kuschle, e gang abeschalte und probiere dr druck use z näh. Stress isch dr „Milchkiller“ nr.1 😅
Aber i cha der nur as Herz legge das thema mitere IBCLC Stillberoterin direkt azluege, machsch e Termin und de cha si di währendem stille berote und luege wie dr gwichtsverlauf isch vom Bebe etc.

Alles gueti 🥰

Himmugüägäli🐞

@AnDu88 Ja du hesch rächt, di chlini isch 6 wuche alt. Si het mehreri nassi windle am Tag u verlangt fast jedi stund t Brust. Mini Hebi meint nach 1 monat söt si 1kg zuegno ha. U üsi chlini het nach 5,5wuche 900gr. Zuegno woni mir gad sorge gmacht ha ob öpis ni stimmt..🥺 isch üses erste Kind. Mi het o dünkt das alli Huusmittel zur Milchsteigerig ke bitz helfe.. het mi rächt kränkt

AnDu88

Dass si stündlich d Brust verlangt cha durchus normal si, de duet si selber d Milchproduktion arege, chasch süscht mol "Clusterfeeding" google. Es isch sehr verunsichernd wenn me liest oder ghört, dass sones chlises Bebe nur all 4h sött trinke, was absolut falsch isch... Es git Babys die chöme, so wie dini, stündlich und meistens isches au nur e Phase wo wieder besser wird. Aber süsch isch si e zfriedenigs baby? Aber wichtiger isch, wie gohts dir körperlich/mental i dere Situation?

Bezüglich Gwichtszuenahm heissts (gem. Tabelle vo Swissmom) dass d Babys im 1. Lebensmonet durchschnittlich 130g-200g pro Wuche zuenäh sötte und dini Chlini isch ja mit 900g i 5,5 Wuche no i dem Schnitt inne. Het di Kinderarzt öbbis dezue gseit?

Probier würklech mol nüt zmache ussert mit dinere Muus z kuschle und z stille, si im Tragetuech z träge (falls möglich) täglich churz e bitz a di früschi luft und vermiid alles wo di selber duet stresse umgib di nur mit Sache wo di guet füehlsch demit. Hushalt isch i sörigne Momente zweitrangig fürs ässe gits sicher öbber wo für euch cha choche oder de halt Lieferdienste oder di Partner macht der öbbis Parat füre ganz tag. Ig ha meistens e riesigi Schüssle Birchermüesli im Küehlschrank gha woni eifach ha chönne go ässe Eifach luege dass so wenig ufwand wie möglich hesch.

Wenn du selber aber es schlechts gfühl hesch und dänksch es stimmt öbbis nid, luegs würklich mit ere Stillberoterin wo zertifiziert isch (IBCLC oder DAIS oder vode LLL) a. Es cha dir dete sehr guet gholfe wärde und au dini Sorge und Ängst gno wärde... und die Fachpersone mache nüt anders als Stillendi Fraue z Berote.

AnDu88

Du und di Körper leischte unglaublichs im Moment, das darfsch nid vergässe! Mami, du hesch vor kurzem e chline Mönsch gebore und euchi Tochter het di zumene neue Mönsch gmacht... du machsch e wahnsinns Job und du hesch jedi Unterstützig verdient. Es isch e sone grossi veränderig wo passiert, vorallem nachem erste Chind... es isch nid immer eifach.<br>

Himmugüägäli🐞

@AnDu88 Merci für dini liebe Wort! Es isch eso si isch scho es gäbigs bebeli aber si schreiit viel. U nachem stille het si ging no es grosses sugbedürfnis, aber nuggi findet si doof u schiessts gad use.. u de hani dür das de iidruck becho dass si z wenig milch bechunt. Cha leider o nur mit 1 brust stille.. di ander het praktisch nüd dinne u isch viel chliner..
Chani bi LLL e beratig gratis ha o ohni gruppe , weisch du das?

momofgilrs

bi de LLL chasch di eifach duretelifoniere… die wo zyt het nimmt ab und wenn nid denn nid… die schaffe ehreamtlich…
milch steigere goht am beschte durch stille stille stille… so oft s baby will…
ich würd si an beidne site lo suuge/nuggele, velicht regts jo denn au no mehr aa… und hutkontakte (also du & baby blutt) kuschle & stille hilft au…
aber mit so 6-8wuche pändlet sichs laaaangsaaam ii mit dr milchmängi und denn sin d brüscht nüm so prall wie am afang…

Eline22

Wie gahts dir und de chline? Hets sich dini milchmengi gsteigeret?

Eline22

Nimsch no irgendwelchi Vitamine? Git ja extra söttig für d stillzit.

aenderli

E wiiteri Variante zum usprobiere wäret suscht na rein pflanzlichi Kapsle mit Bockshornklee zum iinäh. Und Rivella zum trinke 😊

S_F

Bockshornkleesame und Femaltiker hend mir mega ghulfe zum steigere☺️