Isch das normal?

liora

hoi zämä.
ich han scho sehr lang en chinderwunsch gha. wo denn alles passt het, hez au ziemli schnell klappet. sit ichs aber weiss dasi schwanger bin freui mi gar nöd so wieni immer denkt ha werd i.. oft gspühri e tüüfi trurigkeit und unsicherheit. i weiss zwor das da da isch woni scho imer ha wele.. aber mich drüber freue oder mich mitm baby vebunde fühle tueni nöd so oft.. bin ez ca. ide 8 ssw..
het irgendöper ähnlichi erfahrigä? fühl mi total abnormal.. ha mir die ziet immer so schö vorgstellt..

wär dankbar um es paar antworte..
lg liora

Kringel

@liora hi liebs. Ich bi jetzt mitem 2.Wunder schwanger. U ich ha am Afang au gar kei Freudegfühl gha wie bim 1. Wunder. Obwohl i mir sehr es 2. gwünscht ha. Ha mi immer hinderfragt obs e Fehler gsi isch, obi das packe mit 2, obi nid doch zalt bi,...
Aber mach dir nid zviil Gedanke. Das si nid dini richtige Gfühl, das si dini Hormon wo grad alles ufe Kopf stelle.
Ersch jetzt wo dÜbelkeit langsam ufhört u sich dHormon iipendlet hey, chani mi richtig freue.
Glaub mir, die Gfühl chöme no. U überhaupt wirds no ganz viil Gfühlskaos geh ir Schwangerschaft.
Fühl di drückt... U gratuliere ganz herzlich ☺️🍀

AnDu88

I verstoh di sehr guet und dis empfinde isch nid abnormal, meistens wird das ebe verschwige will me s gfühl het me darf doch nid so empfinde. Es isch aber leider nid immer alles so wieme sich das vorstellt, so rosarot und judihui 😅

Ig ha selber sehr lang e tüüfe und starke Kinderwunsch gha, 6 langi Johr hani druf gwartet bis mi Maa endlich gseit het er isch parat fürnes Baby. Und denne woni de lang ersehnti positivi Schwangerschaftstest ide Finger gha ha, bini irgendwie eifach total gschockt gsi, ha kei freud empfunde i dem Moment. Ha nur dänkt „scheisse, jetz chani nümme zrugg, jetz isches tatsächlich sowit, was machi jetz…bini würklech scho parat fürnes Baby usw“ jensti Gedanke simer dure Chopf gschosse. Und i muess der ehrlich säge, die Gfüehlslag het sich irgendwie dur die kompletti schwangerschaft zoge…hami au nid würklech verbunde gfühlt mit mim Chind es isch mer so fremd vorcho alles. Ig bi sehr gärn schwanger gsi, ha d chindsbewegige gärn gspürt und alles drumume aber die tüüfi liebi und verbundeheit hani nid gha au nach de Geburt nid. D Geburt isch sowieso total fremdbestimmt gsi - passend zur gfüehlslag. I bi komplett überforderet gsi mit allem…ha nur no brüelet tagelang.. bi den au ine Wuchebett depression gheit und ersch nach öbbe 3-4 mönet hani langsam agfange mis Baby so richtig z liebe und die tüüfe Muettergfüehl z entwickle. Und das alles Dank minere Hebamme, si het mer soo gholfe.
Ig wett dir kei Angst mache aber es isch wichtig dass du drüber redisch - ig has nid gmacht und me het gseh wies usecho isch. Bitte bitte red mit öbberem drüber, Fraueärztin oder Hebamme, Müettereberotig, Husarzt etc. Es duet guet wenn me das alles cha ablade und wäge dem nid als schlächti Muetter abgstämplet wird ❤️

Mini zweiti Schwangerschaft hingäge isch s pure gägeteil gsi - dasmol würklech alles rosarot und judihui 😅

I wünsche dir alles gueti, falls möchtisch darfsch mer au privat schribe.

liora

@Kringel danke viel mol für dini Mitteilig. tuet mir so guet zghörä das i nöd di einzig bin. da mite hormon und das da nöd mini gedanke sind gsehni voll ih. es isch wie knall uf fall cho und würkli i vestoh mini gedanke überhaupt nöd, chum nöd drus woher si chömed.

und au dir @AnDu88 Danke für sTeile vo dinere Erfahrig. i bi so froh zghörä das i nöd di einzig bi und dasi wege dem nöd gad e schlächts mami werd si. i nimm mir beidi euri rotschläg zherze. i loh mir und mim körper nochli ziet, werd ez eh no en monät verreise und abo imo den, wenis bedürfnis ha, drüber rede und kai angscht ha dass da schlecht chent si. falls mir denn abo imo no glich got werd i evtl uf professioneli hilf zruggrife. und au e hebamme werd i mir denn sueche

danke eu beidne viel mol! sone Forum isch richtig hilfrich

Gröipschi

mir ischs bir zwöite schwangerschaft so gange. ha mir soooo fescht es zwöits gwünscht (meh aus i denn ds erschte ha gwünscht), es het grad igschlage u i ha mi 0 gfröit. ga o ke luscht gha, irgendöperem z verzeue, dasi schwanger bi. öpe ir 8. ssw isch uscho, dasi ä schiuddrüese ungerfunktion ha u ha müesse tablette nä,när isch d schtimmig chli besser worde 😅 aber ha mi o nie so verbunde gfüeut mit däm baby, u wos am et het gheisse, i müess ileite, hani grännet 🙈 aber chum isch mis bebe uf dr wäut gsi, hanis innigscht gliebt.
wasi hingäge bim erschte so nid ha gha. es isch do gsi, u i bi weder überwäutigt vo mine gfüeu no grad vouer liebi gsi. bi fasch chli enttüscht gsi u ha mi gfrogt, obi normau bi 😬

wasi wott säge, es git kes richtig u fautsch, kes normau u nid normau, es isch aues individuell. uf jede fau liebi mini 2 jungs vo härze, egau was ir schwangerschaft u geburt isch gsi. aues guete 💚