Empfehlung für Trage ab der Geburt

Summer84

Cha mer öpper e gueti Trage empfehle ab Geburt? Euse Chli isch 2 Wuche alt…danke🤗

Miette

Ich bin en riiiese Tragebaby Luemai/Milamai fan! Trage min chli sit der Geburt & jetzt immer no (isch jetzt 2.5 jahr alt). Isch schwiizer handmade & jedes stuck es unikat. Dementsprechend halt tür.

Chli en günstigeri alternative wäri es Marsupi (hani fo miner hebamme zum usprobiere übercho, findi au super) oder fo fräulein hübsch hani sehr vil positivs ghört.

snowangel

Ich han de da und findes echt super 🥰

https://www.baby-walz.ch/de/p/ergobaby-omni-360-cool-air-babytrage-4-tragepositionen-p1556246

Falls aber unsicher bisch, würi zerscht go probiere welli dir und dineri chli besser passt... Ich han oft tragi ka wo für anderi mamis guet gsi isch aber für mich de Horror... Viel Glück bim finde! 🍀

Sonnenblümchen

Mir händ e Limas gha bim erste, die hät au min Ma mal brucht und han für s‘zweite au wieder e Limas gholt. Han ganz am afang e Kokadi gha aber mit däre bini nöd z‘recht cho

aenderli

Mir hend für am Afang e Ergobaby Embrace gha und sind mega z‘friede gsi. Sie isch liecht, agnehm vom material her, s‘baby hett nöd zu heiss gha und sie isch eifach gsi zum au elei alegge. Chani nur empfehle

Zireael

Ich ha au die vo Ergobaby Embrace es isch so en liechte Stoff wie es Tuech aber du hesch das Gewickle nöd sondern normali Schnallene. Hends bi Babyone probiert und kauft👍

dixi90

Ich wörd dir ä Trageberatig as Härz legge, z.B. tragefrage.ch
Denn chasch di düreteschte mit/ohni Baby, chunsch sie nochhär hei über zum Teschte und dUswahö träffe.

Trini

min tipp: probier zerscht d tragine z teste. mer cha sogar online zom miete bstelle… ech be zerscht metem tragtuech onterwägs gsi ond de hani binere kollegin kokadi tragi gseh, onde schnalle ond obe zom bende ond be mega fan vo dere gsi, ha de nochem teste occassion eini kauft. vor de gebort hani en manduca neu kauft ond die hani erscht noch jöhrig afo bruche, well mer gwössni istellige ned hed chöne mache…

JennyHelin

Muesch echt teschte ...
Ich ha au eh Ergobaby kauft ... leider bini de gar ned zschlag cho🤭 und han mi den id Bondolino verliebt und mini chli hät sich dert au mega wohl gfühlt 👍👍

Unä mit chlätverschluss und obä zum bindä.
Ich empfihle eh immer eine zum obä Bindä da es sich besser ah chind und dir ahpasst.

Und unä ebe die mit chlätverschluss oder mit schnallä..

AnDu88

Ig ha bi mim erste Chind de ErgoBaby adapt gha und bi überhaupt nid z schlag cho mit dem…kompliziert zum amache, extrem unbequem und s Baby isch nid schön dinne ghöcklet.

Bi minere Tochter hani de MySol vo Girasol dörfe probiere und de grad uslehne. Bi meeega begeisteret vo dere Tragehilf. So weich und am Baby apassend, es wachst au mit 🥰 plus isch sehr simpel ide Awändig, einisch zweimal alegge mit Hilf und de chames guet allei wenn me weiss wie. Es gits au mit ere Schnalle anstatt Bändel für umd Hüfte. Ufem Rugge trage isch mit dem au kei Sach…. Und zum wäsche eifach bi 40° id Maschine gheie ohni Weichspüeler 👍🏼

https://www.familien-bande.ch/MySol-Caribe

Eline22

Ich wür au e tragberatig empfehle. Die chönd dir sicher au tipps geh wie mer im summer treit. Ich wür zum bispiel kei trage im summer neh mit polsterte träger... Isch mir z heiss. Wenn kei beratig bechunsch isch wichtig das de steg chasch verstelle und s chind sicher i de anhockspreizhaltig isch. Mit em rucke zu dir, also s gsicht weg vo dir, wird au nöd empfohle.