Schlafen in der Krippe und Einschlafstillen

Fränzeli

Liebe Mamas und Papas
Gerne würde ich von euren Erfahrungen profitieren. Mein Sohn (8 Monate alt) ist in der Eingewöhnung Krippe. Er geht bald zwei Tage pro Woche in die Kita. Ihm fällt es schwer in der Krippe einzuschlafen. Bis jetzt waren mein Partner oder ich immer dabei, wenn seine Bezugsperson ihn ins Bettchen gelegt hat. Er hat nur geschrien.
Zuhause stille ich ihn zum Einschlafen. Auf verschiedenen Plattformen und Büchern habe ich gelesen, dass Babys sehr wohl unterscheiden können, ob sie von Mama (stillen) oder anderer Person (nicht stillen) ins Bett gebracht werden, darum habe ich mir da auch keine grossen Gedanken gemacht.
Bei der MuVä-Beratung haben sie mir empfohlen, nicht während der Eingewöhnungszeit das Einschlafstillen abzugewöhnen. Das wäre zu viel für ihn. Heute hat mir die Bezugsperson in der Kita gesagt, ich darf ihn nicht mehr Einschlafstillen oder das Stillen zum Beruhigen verwenden.
Was habt ihr für Erfahrungen gemacht?

Sonnenblümchen

Zum Thema stillen kann ich nichts sagen aber bei uns hat es im Bett anfangs auch nicht geklappt, da haben sie ihn jeweils in den Kinderwagen gelegt, bzw am morgen ist er eh jeweils auf dem Spaziergang im KiWa eingeschlafen. Die kleineren nehmen sie auch in Trage. Vielleicht klappt es so?

Lyaa

Bitte nöd ufhöre stille, ich denk nöd dass er wegem stille nöd cha ischlofe dötte, ischlofe hät mega vil mit vertraue ztue und dass muess er jo zerscht mol ufbaue und umgebig kennelerne. Ich finds au nöd guet wänn ihr däbi sind bim ipfuuse i dä kita, dänn denkt er sich was söll das smami isch do und ich sött im bett schlofe? Und suscht ebe wie au scho gschriebe worde isch, wage oder trage i dä kita

Nadine91

Das mitem Vertaue glaubi au. Mi Sohn isch mit 6 Mönet zur Tagesmuetter cho. Am Afang het er bi ihre au nit in Schlof gfunde.. und wenn, denn ischbdr oft sofort wieder ufgwache. Bi uns deheim isch dazumal so gsi, dass mir ihn hend müesse umetrage zum ischlofe. Ha oft au zum ischlofe gstillt und denn hön mr das ersetzt mit umetrage. D Tagesmuetter het denn ihre eigene Wäg gfunde und schaffts jetzte, dass er ellei in sim Bett ischloft. Chas ame immer noni glaube.. will bi uns klappt das nit oder noni

Nadine91

Will drmit sage, dass dies in dr Kita zimli sicher anders mache wie er sichs gwohnt isch.. aber dass es au sehr guet cha si und dass er so cha lerne au uf e anderi Art ischlofe. Dr Remo Largo wo s Buech Babyjahre gschriebe het seit: D Vätere, d Grosseltere, die andere Betreuuigspersone maches anders wie d Muetter und das isch wichtig und gfallt de Babys/Kinder oft au.

Fränzeli

Danke für euri Antworte. Alles wo ihr sägef, hani so au glese, ghört und so ghandhabt. D‘realität isch denn plötzlich anderst gsi. Sie händ mir hüüt gseid, dass ich ihn nüme dörf ischlofstille oder ihn dörf ad de Brust beruhige. Aber es beruhigt mi zghöre, dass es bi eu denn klpped hät. Es hät mi nume so trurig gmacht, vo allne siite hani nume ghört, dass das falsch isch.

BlueBerry🫐

Ich still min chli au zom ischlafe. I de Kita oder au d Grosseltere händ ehn ometreit oder Chinderwägelet zom ischlofe, da het halt zersch ächli omgwöhnig brucht för de Chli (ond het au ned fonktioniert wenn ech ome gsi be, han wörkli weg müesse si). Mettlerwile chönd sie ehn eifach helegge zom schlofe, wa bi mer ned fonktioniert, bi mer will er gstillt werde schösch gehts eis Theater 🤪Wie scho gseit, muess s Chind halt zersch Vertraue id Betreuigsperson ha ond de klapped da. Nor Zyt loh..

Sonnenblümchen

Chind chönd sehr guet unterscheide wo und mit wem was wie gaht. Au scho ganz früeh. Und d‘Kita hät dir sicher au nöd zsäge was du in Sache stille dörfsch und was nöd. Sie müend e lösig finde wo für s‘chind passt, es git gnueg alternative!

JaMa88

Find i jetzt au chli amasend vo de Kita da so z‘säge/z‘verlange bzw z‘behaupte dass es a dem ligt.
I cha nur vo mir säge, euse Chli isch 5Mönet alt gsi womer dIgwöhnig gmacht händ und i ha no voll gstillet. Und si händ halt für sich e Wäg müesse sueche/finde wies ischlofe i de Kita funktioniert, do ha ich au nit chönne hälfe, höchstens säge was dehei oder so ame funktioniert (Wage, Tragi, wiegele). Ich bi au nie debi gsi wo sis probiert händ.
Si düend en bis hüt glaub nie is Bettli legge zum schlofe sondern eigentlich immer im Wage.
Ich due hüt no ischlofstille am Obe (jetzt isch er denn 11 Mönet alt).
Ich dänk au, dass es für ihn schwierig isch z‘verstoh wieso er jetzt det sött ischlofe wenn du jo ume bisch. Villicht probiere ders mol ohni euch im Zimmer. Händer denn scho e Trennig gha, i find das fast wichtiger, das das guet klappt. SSchlofe chunnt vo ellei 😁Aber lo di nit lo verunsichere und still sicher nit ab, nur will die das säge.

Viel Glück…

Sonnenblümchen

Ah ja das findi au na en wichtige Punkt, ich bin zum iischlafe bim iigwöhne nie däbi gsi. Das händs immer ohni mich gmacht. Glaub das würd scho en rechte Unterschied mache.

Fränzeli

Danke für die viele Antworte! Mich hätts au iritiert, wo ich debi han müsse sie bim Ischlofe. Da klapped bi de meisste ned bi öppertem anderem, dass s‘baby ischlofed, wenn s‘mami diheime isch. Wie sölls denn ide krippe go.
Gester händs mi s‘erste mol hei gschickt. Denn ischer au igschlofe. Wo ich ihn gholt ha, sinds am Zmittag esse gsi. Drei Betreuuerinne und babys. Han denn wieder ghört, was ich dihei ned dörf mache. Was alles falsch isch. I han mich so gedehmütigt gfühlt. Nochher hani gfoged, wie es denn ide nacht isch. Wenn ich nühm dörf ischlofstille und wenn ich ned dörf s‘chind mit stille beruhige, ob ichs denn dörf ide Nacht stille, wenn er ufwacht und brüelled. Ihre Vorschlag isch gsi, am chind abpumpti mumi zgeh. Denn hani nume gseid, dass ich seb en Witz fänd und dass ich das eifach ned in Ordnig finde. Mir händ es langs Gspröch gha. Han gfunde, dass mich das alles sehr verunsichered und ned mit dem übereinstimmt, wie ichs us de Fachliteratur kenn und s‘für mich en mega hammer isch. Sie hät denn au recht verständnis gha. Mol luege obs jetzt echli besser wird. D‘chrippe hät en guete Ruef und mir händ au kei anderi wahl. Es wär jo ned eso, dass es chrippe wie sand am meer gid. Und eigentlich find ich ihre umgang mit de chind sehr schön. Es hät mi nume so verunsichered. Han s‘gfühl übercho ich säg en absoluti rabemutter, ich halte mich as Buech Artgerecht. Mir sind bis jetzt super gfahre und händ en gsunde und ufgweckte bueb.
Bin jetzt froh, zghöre, dass das alles normal isch, dass d‘chind ziit bruched und blieb bi mim eigede Stil.

AnDu88

Du machsch alles richtig ❤️ wäge dem ufhöre z stille isch au kei Garantie defür dases nachher besser klappet mit ischlofe, überhaupt nid.

Die chline chönne sehr guet unterscheide, mi Maa het üse Bueb denne au ohni stille chönne is Bett due also sötti das e anderi Betreuigsperson au chönne - uf ihri art und wiis.

Nadine91

Hä.. die vonere Krippe hän dir doch nit zsage was du dörfsch und was nit?!

Eline22

Dini Krippe wott sichs selber eifach mache. Und ratet dir zu so seich. Entschuldigung. Ich finde sie müend ufs Kind igo und ihre eigeti Weg finde. Bi eus isch das so.