Kind mit einem Muttersöhnchen

Viopeaches

Hallo zemme, bi neu da und hoffe dasi vellicht echli Rat bi eu finde, da ich zurziit recht am verzwiefle bin. Zu de Situation...zum da erkläre mussi chli wieter ushole.Ich bi 28 und siteme Jahr mit mim Fründ (35) zemme und wohne au bi ihm und sinere Muetter (wegem Studium isches die beschti Lösig gsi). Er isch Chinese und het jahrelang in China glebt eifach arbetshalber. Vor ca. 4 Jahr het sini Muetter da i de Schwiz en schwere Unfall gha und er isch retur cho zum uf sie luege. Es gaht ihre aber guet und sie het absolut ke ischränkige und cha alles allei mache. Am Afang hani denkt, dass er eifach vorrübergehend bi ihre wohnt bis es ihre wieder guet gaht, so hetters mir dozumal au gseit womer eus kenneglernt hend. Schnell hani aber gmerkt dases nid so isch. Sie chocht und wäscht für ihn und tut ihn au so richtig bemuettere. Bis jetzt hani ja au na einigermasse demit chöne läbä, wenn etz nid das andere Problem da wer.
Au da muni etz e biz wieter ushole. Im Juni hani erfahre dasi schwanger bin (mis Verhüetigsmittel het na 15 Jahr de Geist ufgeh, freget mi nid wie🤷‍♀️). Jedefalls hani dozumal e Kontrolle gha und bin ca. i de 7te Wuche gsi (gnau hends es nid chöne sege, da ich uf Grund vom Verhüetigsmittel nie e Periode gha han). Es isch für mich au de Gedanke wegere Abtribig im Ruum gstande da ich na im Studium bin. I de angebliche 11 Wuche hani namal es Beratigsgspräch gha und da hettmer denn ken Herzschlag meh feschtgstellt. Uf die einti Art bini bitzli erliechtered gsi, da mir die schweri Entscheidig mit Abtribe oder nid abgno worde isch, vo wem au immer. 2 Täg speter hettmer denn mösse e Usschabig mache. I dere Ziit währed de SS hemmer natürli denn nüme verhütet. Jedefalls hets nach de Usschabig gheisse es chan bis zu 12 Wuche gah, bisi wieder e Periode bechume. Guet han denn gwartet und denn e Kontrolle gha. Und siehe da alli bzw. de FA und ich sind total schockiert gsi. Ich bi direkt wieder i de 12 Wuche schwanger gsi ohni dasi Sex gha han. Er het sich da nur so chöne erkläre, das min Körper scho vor de Usschabig wieder e Eizelle produziert het und die befruchtet worde isch. Da ich das so für es Wunder halte, isch für mich e Abtribig nümme i frag cho. Jetzt bini zurziit i de 14 Wuche. Jetzt aber zu mim aktuelle Problem. Ich ha mim Fründ gseit, dass mir e eigni Wohnig ha mönd (finanziell wers für ihn keis Problem). Ich hanem gseit, entweder er kümmered sich drum oder ich wird wieder zu mine Eltere zie woni viel meh Platz hetti für mich und de chlini Zwerg. Er het denn gmeint, dasi sini Kultur ect. nid respektiere und dases normal isch mit de Eltere bzw. i dem Fall mit de Muetter uf lebziite zemmezlebe und das er ja denn mit de d'Muetter ufs, Chind luege chenti (Da ich ja au wieder studiere muess). Das het sich für mich so schlimm agfühlt und es sind so viel Ängst ufe cho. Ich mein sis Mami isch ja e netti aber sie het ja selber ihre Sohn selber mit 3 nach China abschobe, da es in China normal isch das Grosseltere Erziehig übernehmet, und ihri Bildig isch alles andere als fortschrittlich. Das merki drah, dass sie so Sache seit wie, in China gits kei Fehlgeburte, bi de Geburt Schmerze ha isch nid normal ect. Es fühlt sich so ah als ob mis s'Chind nur usträge und er das mit de Muetter gross zieht. Das isch wükli e Horrorvorstellig für mich. Uf die einti Art wetti ihn au nid zwinge zum uszieh, aber für mich wür es Zemmelebe mit de Muetter jetzt i dem Zuestand nüme i frag cho. Ich weiss zurziit wükli nid wasi mache sell. Au wenn er de Entschluss fasst zum trotzdem uszieh, hani s'gfühl, dass denn sicher na wieteri Problem uf eus zuecho werdet. Da ich wieter studiere muess und er denn jede Tag zum Mami renne wür oder sie bi eus hocke wür und da null Abstand oder Privatsphäre sie wür. Ich ha jetzt scho das Gfühl als obmer mir denn quasi mis Chind "wegneh" wür und mis Chind nachher na zu sinere Muetter Mami seit. Ich weiss die Ängscht sind vellicht unbegründet aber zurziit höred mini Gedanke nid uf umezchreise. Das isch alles neu für mich und ich hoffe vellicht hend ihr en tolle Rat für mich.

AnDu88

Ig bi nid ganz ide gliche Situation gsi wie du, da ig denne nid schwanger bi gsi. Aber ig bi dennzumal wo mim Maa (damals no Fründ) si Vater gstorbe isch, isch er vo Züri zrügg hei züglet und ig bi mit ihm mit zu ihre go wohne wäge understützig etc. Aber nacheme Zitli hani gmerkt das geit so nid witer, kei Privatsphäre und me füehlt sich nur als Gast und nid wie dehei. Das hani mim Maa denne au so gseit aber er het partout nid welle uszieh will er sis Mami nid allei het welle loh. Churzum hani gseit i sueche mer e Wohnig was meega strit gä het aber i has dürezoge. Nachdem i uszoge bi, hani knapp 10mönet allei gwohnt bis er de ENDLICH gseit het er zieht mit mir zäme.
I würd dir rote, mach de Schritt und zieh us! Eso isches kei Lösig und nid zuemuetbar…du wirsch so nid glücklich wärde.
Wünsche der alles gueti ❤️

Miriii

Hallo Viopeaches

Dini Situation isch nomol en anderi, das do 2 Kultur zämächömed. Ich kenne das sehr gut da das bi aus die Familie au de Fall isch (2 verschiedene Kulture).

Es isch bi de Chinese ganz normal dass s sech sGrossmami ums Enkelkind und de Haushalt tuet kümmere während dEltere goend go schaffe.

Do hets ganz viel Vorteil und aber au Nachteil.
Du hetttisch ganz viel Hilf im Haushalt und dis Chind wäre super versorgt. Du Messtisch weder Kita zahle no muesstisch di ums Putze diehei kümmer oder Esse choche. Du choenttisch mit dim Partner wahrschindli au a date nights go und sis Mami würd uf euches Chind luege.
Das sind super Vorteil.

Nochteil: Glaube ned dass das sChind am Grossmami Mami würd sage. Aber logisch wär en engi Bindig do, da die beide de ganz Tag zaeme wäred. Früehner in Mehrgeneratione-Hushält ide Schwiiz isch dBindig zu de Grosseltern sicher au en engeri gsi als sie das Huet de fall isch.
Glaube dass mer als Frau die Schwiiz sehr unabhängig sind und so en Hilf wie du sie choenntisch ha villicht tooo much isch?

Fakt isch eifach dass din Maa / Partner halt unsere andere Kultur chonnt- und au in China ufgwachse isch wenn richtig verstande han? D Männer det (eigentli in einige Kulture) sind sehr uf ihri Mutter fokussiert, will sie für die Mutter us Respekt bis as Lebensende wand do si.

Eigentlich isch Dini Situation ganz en eifachi. Du muesch dich frage was möchisch du? Wo chasch du en Kompromiss igo? wie wiit chasch du go? Wie stellsch du der Dini chlini Familie vor? und chan das au es anders Konzept sie, als die Konzept wo mer so ide Schwiiiz kenned?

Ehr choennted au en Kompromiss mache (beidi) und sege: Zeme e neui Wohning neh und a de Taeg X und Y wenn du studiersch isch s Chind bi de chinesische Grossmueter. So het d Großmuetter Chance ihri Rolle als Grossmueter z erfülle und din Maa/Partner Chan sech um Sini Mutter au so kümmere.... Und du hettisch Oper wo sech gute um dis Baby/Chind kümmere wenn du weg bisch.....

Mer muss für en anderi Kultur Verständnis ha. Und do debie sech selber treu bliebe....

Ich wünsche viel Sonne & hoffe ehr träfed e gueti lösig wo gute fürs Baby isch und für de erst vo de Fam.

Ps: sorry weg de rechtschriibig, das System isch de Horror

Miriii

Ha no paar Sache vergesse

Also das isch au en entscheidig fürs lebe...... und deshalb muss mer das au us em Chind sintre Sicht aluege. Was isch au gut fürs Chind.... ?? Wenns Chind nur mit 1 Kultur ufwachst wird's denn irgendwann die andere Siite vermisse...

De fakt wie du schwanger wurde bisch tönt würkli wie es wunder Wie schön isches dass das chline herzige Baby hett solle siii

Ich glaub isch würd am Fründ das uf en guti Art nomol sege dass es der wichtig isch dass ehr als chlini fam euen eigene Space Bruched.... ehr aber uf de Grosssmueter ned wend verzichte etc....

Das chonnt sicher guet. und im worst case Szenario hesch du zum Glück immer no Dini Eltern wo here choenntisch. Aber ich persönli finde dass mer am China lieb alles sett versuche.

AnDu88

Aso nur will me trennti wohnige het, heisst das no lang nid, das ds einte Grosi s Chind nie wird gseh oder nid wird dörfe betreue.

Mir si au e zwei Kulture-Familie (Türkisch/CH) und mini türkischi Schwiegermuetter wohnt im Block näbe dra und hüetet d Chinder wenni am schaffe bi oder Termine ha und mir gsehnd beidi Grosis sehr oft (mehrmols pro Wuche) und d Bindig zwische Enkel/Grosseltere isch au sehr gross und au schön.

Aber zäme i einere Wohnig isch eifach too much. Will d Schwiegermuetter wird de Hushalt und alles immer so füehre wie si das für richtig findet, iirichtig ide Wohnig entscheidet si, Erziehig wird au immer wieder e Stritpunkt si…Meinigsverschiedeheite zwischem Partner wird au vo ihre Mitdiskutiert wärde.. so isches zmindest bi üs. Wäge däm - enge Kontakt Ja, aber e gmeinsami Wohnig - Nei.

Viopeaches

Danke eu für die viele schnelle Antworte, ich hoffe etz dasi alli frage beantworte chan^^.
Ich weiss, dases natürli au en Vorteil hetti aber ganz ehrlich, dass willi gar nid. Es isch mis Chind und ich wett au min Huushalt woni so gstalte chan wie ich wett und wo au ich mich drum kümmere und mich au wohl fühle. En grosse Punkt isch natürli au Privatsphäre, ich meine zurziit lebemer 2te imene chline Chinderzimmer wo ja au na alles Sache vo de Muetter drin sind. Ich ha det lediglich en Teil vo mini Chleider und nid mal die hend alli Platz. Klar es sind 2 Kulture und irgendwo durre mussmer ja au Kompromiss igha chöne aber ich bi nid bereit mis ganze Lebe für sini Muetter z'opfere. Ich meine ich han au e guets Verhältnis zu mine Eltere und gseh sie meistens 1-2x alli 1-2 Wuche und süscht hemmer au ab und zue es Tel. und wenn natürli irgendwas isch bini ja au sofort da, aber bi ihm isch das anderscht. Er chan keini 15min vo de Muetter weg wohne, sie isch sin komplette Lebensmittelpunkt. Praktisch nüd isch ohni sie möglich. Ich han wükli im Dezember na eimal und au s'erschte Mal mit ihm zemme id Ferie welle bevor euses Chind da isch, aber er isch denn grad wieder uf d'Idee cho sini Muetter mitzneh. Ich han eifach nüd mit ihm allei und fühl mich meh als 3te Rad am Wage. Zu de andere Frag, er isch teils teils in China und Schwiz ufgwachse und het immer chli pendlet, da sin Vater au Schwizer isch. uf die frag abe, wie ich mir das ganze vorstelle... sis Chind setti ab jetzt s'wichtigste i sim Lebe si und er setti au verstah, dass mir 3te Kernfamilie sind. Für mich wers absolut normal dasmer Grossmuetter eimal i de Wuche gseht und sie au mal zum Esse iladet oder sie au mitem Chind mit in Zoo nehmet, aber nid das sie jede Tag vor de Türe staht oder er bi Ihre isch und sich wieterhin bemuettere laht und sie allei ufs Chind luegt. Für mich isches wichtig, dass au er Verantwortig übernimmt und uf euses Chind allei luege chan, denn er isch schliesslich de Vater und het au Ja dezue gseit. Grossmuetter isch für mich eigentli da zum es Chind verwöhne so wiemers ja i de Chindheit au alli erlebt hend..hoffentli^^. Ich will uf ken Fall en Keil zwüsched beidi Schiebe und Grossmuetter sett natürli wichtig si aber me setti doch irgendwo e gsundi Grenze ha. S'Problem au, wenni mit ihm mal über das rede wett, denn blockt er ziemli schnell und relativ agressiv ab. Er het sochli die Istellig, entweder akzeptiersch es oder gasch. Ich wett nid s'lebe lang a sini Muetter bunde si, denn ich wett na soviel mache, er weiss au dasi mal uf Weltreis wett für ca. 3-6mt. und er selber weri ebe au de Typ für so epis aber da wird eso nie möglich sie. Mir werdet uf Dütsch gseit immer a de Wohnort vo de Muetter bunde sie, selbst bi de Wohnigswahl/Jobwahl ect. soviel hanged devo ab und ich bi nid bereit mis ganze Lebe scho i Stei gmeisslet zha. Für da bini eifach nid de Typ dezue, wemmer sich au vorstellt, dasi eigentli nie ha welle Chinde ha und eher so de Freedom-traveler Typ bin. da isch natürli für mich jetzt au e enormi Umstellig.

Viopeaches

na was vergesse..
Vo minere Site us staht ja au nid im Ruum, dass mer sich grad komplett trennt, da isch denn aber im Endeffekt sini Entscheidig. Vellicht isches ja au möglich, dass er bi de Muetter blibt und mir eus gegesitig au bsueched. Klar, isches alles andere als e gueti Lösig aber immer na besser als nüd. Ich weiss ich muss au en Teil vo ihm akzeptiere, aber er derf nid vo mir erwarte, dass ich das Lebe genau eso mitmache. Nur well er sis opfered mussi nid s'gliche mache, aber genau da erwartet er uf e Art und Wiis.