Wutanfälle

Dana

Hallo mitenand

Eusi Tochter, 14 Mönet, hät sit neustem immer wieder mega Wurtafäll wenn mer ihrä Grenze setzt.
S'Problem isch nöd das sie wüetig wird, sondern dass sie sich, will sie nöd weiss wo anä mit de Gfühl, sich selber id Hand bisst, min Partner und mich will bissä oder aber z.b inen Fläschlideckel bisst.

Mir lueged mega, dass mer ihrä e Ja-Orientierti Umgebig für sie schaffed, mir lönd sie usprobiere und machä. Sie söll ja au lerne und viel Idrück becho. Aber sobald mer e Grenze zieht, dreit sie mega durä.

Mir isch bewusst, dass sie na sehr chly isch und dass sich das na ändere chan. Trotzdem hani Angst, dass sich das uf duur manifestiert und sie nöd lernt die Wuet kanalisiere. Mir erchlered ihrä immer wieso sie öppis nöd därf. Klar, sie verstaht nanid alles..

Kännt das Verhaltä öpper? Und wenn ja, wie sind ihr mit dem umgangä und isches effektiv e Phase gsii?

Würd mich sehr wunder neh!

Danke für eui Antwortä und evtl Inputs!

Liebs Grüässli😊

AnDu88

Du bisch nid allei, jedes Chind durläbt die Phase… es paar intensiver als anderi. Mini chlini (2 jährig) het das au, si chlemmt, bisst, haut üs und schiesst au mol sache nach üs oder ihrem Brüeder😂 aber meh als Begleite und ushalte, erkläre - gfüehlt 10‘000x am Tag - chame nid. I hebe denne meistens ihri Händ liecht fest, sodass si niemerem cha weh mache und probiere so ruhig mit ihre z rede erkläre dases nid geit öbberem weh z mache. Probiere alternative z biete, a bode stampfe, is chüssi haue/bisse..klappet au nid immer glich guet. Gfüehl benenne und die au akzeptiere, dass si die hei. Si dörfe hässig/frustriert si und das au useloh aber halt eifach ufne anderi Art.

Was mir bi üsem grosse gholfe het isch s Buech „das gewünschteste Wunschkind treibt mich in den Wahnsinn“ es het mer d Auge göffnet und mer ufzeigt was i somene chline Chopf eigentlich vorgeit. Es si au Situatione beschriebe usem Alltag und wieme drmit cha umgoh. Wichtig isch au z wüsse, es Chind handlet nie gäge üs us böswilligkeit sondern nur FÜR sich selber.

Und glaub mer, die Wuet wird immer weniger wärde, d Frustrationstoleranz immer grösser und je riifer si wärde, desto besser chame die Wuetafäll abfoh und mit ihne rede. Si isch no sooo chli, das ganze foht jetz ersch a und lehrt dass si e eigeständigi Person isch und ihre eigeni Chopf het. Minere erfahrig no duure die Phasene vo 1,5-4 jährig aber es wird immer besser wärde, du lehrsch dis Chind au immer besser kenne und merksch wie/was si frustriert. Alles liebi für euch ❤️

tinana

cha das buech sehr dezue empfehle.

Sonnenblümchen

Völlig normal ♥️ isch e Phase und gaht und chunt wieder. Das wird eui na paar Jahr beschäftige. Sie müend na soviel lerne, Emotione erchänne, dämit umgah, ushalte etc. und ihri eigeni Persönlichkeit finde. S‘empfohlene Buech findi au super und hilft mir sehr, luege immer wieder mal dri

Dana

@AnDu88 @tinana & @Sonnenblümchen

Danke eu für's Antwortä. Ja dases e Phasä isch weissi, ich han irgendwie denkt, das chund erst spöter. Es isch immer beruhigend z'ghörä, dases anderne au gaht. Den fühlt mer sich nöd allei mit sim "Problem".

Ich wird mer s'Buech demfall na kaufe. Bin gspannt! Danke für de Tipp!😊🌼