Geburtsvorbereitubg & Wuchebett

1995

Hoi zäme

Churzi frag was hender alles gmacht gha für d vorbereitug vo de geburt? Bi mir isches bald sowit und eich hani denkt gha mache en KS aber jetzt hemer eus doch für eh natürlichi geburt entschiede und da ich kein geburtsvorbereitugskurs gmacht han, fühli mich grad chli hilflos und bin vo tag zu tag nervöser. Übernächst wuche isches sowit…

Was empfehled ihr mir z mache für d vorbereitig vo de geburt & was wird alles benötigt fürs wuchebett?

Irgendwie herrscht ih mim chopf grad eh panik und hans gfühl bin so planlos😭

Dabke für eui erfahrige!!

Lilamama

Hey @1995 zerst mal: däfsch di freue, Geburt isch cool☺️ wichtig findi, zwüsse was du wetsch und was nöd. Ich wür dier rate das alles ufzschriebe und im vorgspräch im spital z bespreche und det abgeh (mitem nötige Vertraue und Respekt de Hebammene gegenüber). Bhalt d Verantwortig bi dier, gib sie nöd ab. Nur so chasch du selbstbestimmt gebäre. Informier dich über de ablauf vonere Geburt, was für möglichkeite häsch i dim spital (badwanne, hocker, weli schmerzmedis gits usw.).
Besprich mit dim Partner wie er dich unterstütze cha (weli infos cha er em Personal det geh demit du dich uf d Geburt chasch konzentriere, weli massagetechnik hilft binere Geburt, vor was muen er dich schütze..)
Täsche früehzietig packe, bruchsch nöd viel züg findi.
Hoffe das hilft
Häsch no konkreti frage?☺️

Mayla

Also panik isch nöd guet für geburt, i wür vilich no en online kurs mache und youtube videos luege, de gynaeko.logisch isch en frauearzt mit viel infos https://www.richtigwissen.de/geburtsvorbereitung-kurs oder https://die-friedliche-geburt.de/ je noch dem was dir zueseit. Wichtig füre geburt findi i de eröffnigsphase dasmer ruhig und tüf schnufet, den isch s baby immer guet mit surstoff versorgt, mit dim körper mitmache / bewege was sich richtig afühlt, nöd veklemme oder sich degege wehre, den heissts au kiefer entspanne.. frog au bi dine verwandte wie d geburt gsi isch, wie lang das gange isch, gohts eher schnell, is holprig gsi.. i denk den chamers am ehnste abschätze. Fürs wuchebett, i denke erholig, baby kennelerne, viel trinke und guet esse wegem stille, wenig plän 😅👍

Juno

Hesch du scho ä hebamme fürt nachbetreuig?
Mini het mir ä Liste fürs wuchebett geh. S wichtigste hani eigentlich gfunde, dass öpper da isch wo di understützt. Aso esse macht, iechauft, zuelost. Zudem hets mega ghulfe dass t hebamme cho isch und gluegt het, und mir gwüsst händ mir chönnted sie immer fröge.

Mir händ chli esse vorbereitet, zb au Brot/Gipfeli und chli bolo und so sache iegfrore und chüälpads, still tee, wucheflussbinde und stillilage und chnabersache/lieblings ässe gchauft. Denn hämmer eus würkli zruggzohe und s acho z 3te und s kennelerne gnosse.

Han selber en ks gha, drum chani zur Geburt nüt sege, abr die Panik, ned ready z sie/was vergesse, mösse vorbereite kenni.

Schlussendlich chunnts sowieso meistens anderst als mers sich vorstellt, guet isch wemmer über das gfühl rede cha und understütze wird. Mir het damals mega ghulfe mit de hebamme z rede, sie het mir t Angst gnoh und mich mega zuversichtlich gmacht Mini hetti au so privatkürs abotte, wo sie heichunnt und me als Paar genau uf sich abgstimmt geburtsvorbereitig cha mache. Das het ich glaubs gmacht wenns kein ks geh het. Villicht chönntsch ja mit dinre hebamme no es gspröch ha? Und gnüss die chugelziit no so guet wies gaht. Lass di verwöhne, triff fründe und las es uf di zuecho, das chunnt ganz bestimmt guet🤗

LillyFee

Mach dir nit z vil sorge, sisch nu jedes baby uf d wält cho😉ich bi bewusst sehr uninformiert and geburt gange und bin sehr froh druber gsi. werde glaub au nie meh so entspannt ane geburt gah😂😂😂

während der geburt si immee hebamme da, di hälfe dier z.b bim schnufe oder zeige uf was meh chan mache etc. und du chasch nu so guet vorbereitet sii chunts anderst
denk dra da si so vil spezialiste für dich da wo dier jederzit hälfent 🍀