Papakinder - wenn das Baby/Kind den Papa bevorzugt

BAS

Hät öper au es chind wo eher papi chind isch und es au so usdrückt dass er papi lieber hät?
Wie fühleder eu a 2. Stell zsi?
Händer das scho mal versuecht zändere zum meh bindig mitem chind chöne ufbaue?
Es duet scho sehr weh:(

snowangel

Hey liebi BAS wie alt Isch dis chind?

BAS

Er isch jetzt bald 4 jährig und phase chas glaubi nöme si will scho sit 2,5 eso.

snowangel

Ok, min sohn het am afang nix welle unterneh mitem papi, isch mega müehsam gsi au für mich, willi nüt für mich ha chöne mache. Aber mir händ mal de tipp vom Kinderarzt becho dassi mal usm hus gahn und de chline allei mitem papa dihei lahn Sache unterneh woe bädele esse geh etc etc. So merkt de sohn ebe au dass de papi das au so guet chan wies mami. Es isch schwierig gsi am Anfang er het sich dagege gwehrt aber es her irgendwenn guet klappet.
Es isch nöd dass er dich nöd lieber het als de papi, sundern dass isch für ihn sini ersti Bezugsperson das hend chindee und isch völlig normal 💜 gib ihn ziit es wird scho no cho, immer wieder versueche sache mit ihm unterneh ohni dass papa debi isch. Damit er dich kennenlernt...

Ab und zue wet min sohn nüt mir mir mache und denn wieder voll nur mitem papi sie, sit euse 2 te sohn uf dwelt cho isch erst recht will er gmerkt het sbaby brucht mich... Aber es besseret sich wieder sit er gseht dee chlinste fangt ah chli me selbstständig spiele.

Mach der kein Druck du machsch das sicher guet! Und din sohn liebt dich sicher genau so wie de papi, nimms nöd persönlich 😊💚🍀

BAS

Danke so lieb vo dir ❤
Hmm ich glaube ebe würkli dass ich die 2. Person bin und das duet weh. Ich bin jede Tag mit ihm dihei ich bin smami obwohl das doch selbstverständlich sett si daas mami nr. 1 sett si isch papi nr 1. Er chan sich bestimmt au meh mitem papi identifiziere (autos, töff findet spannend) er isch au kei chind wo gern büecher liest oder so er will action u das binich ned u chanich au ned vo herze büete( ich hasse autos, töff etc.) u ich warte halt scho sit 2,5 jährig u jetzt denn wird er 4i u darum denki isch jetzt eifach abgloffe. Sehr angst dass 2. Chind au so wird:(

Mamelo

Fühl di dröckt, i be mer also au secher das din sohn di genau glich gern het ebe au well er jo so vell ziit zäme verbrenget, die verbrenge der jo au ergendwie zäme.

Hmm also be eus gets keis nummer 1 ond nummer 2
Mer send beides eltere ond mache beides. Mol spreng i öber mi schatte ond spele metem ritter oder pirate ond mol esch de papi de wo metem em bett liit ond es gschichtli vorlisst.

Chöntsch der de vorstelle mol öber din schatte springe ond met ihm au öppis rechtig auto oder töff z mache?

BAS

Über dschatte springe scho aber papi hät autos als hobby, nimmt en mit zum putze etc. Also wüssti ned wie über dschatte springe und denke ich strahle das au ned us/darum hätti er sicher ned so spass mit mir. Villicht muess mers au ned erzwinge?

Mamelo

Erzwinge das er es "mamichend“ werd? Nei, da sowiso ned.
Chönt mer jetzt vorstelle wenn er de ganz tag nor a der chläbe wörd ond au zobe nüt vom papi wösse wett wär jo au ned guet. I be mer we scbo gschrebe secher das er di genu so fest gern het

snowangel

Vlt chasch ja öpis anderes finde wo eu zwei gfallt selber autos paschtle us Karton oder suscht en sportart wo ihr chöntet zemme mache ?

Miette

Liebe BAS
Ich fühle mit dir. Mein Kleiner ist sehr Papa orientiert. Bei uns ist es halt so, dass ich grössenteils zu Hause bin, da ich Teilzeit arbeite. Bevor unser zweites Kind geboren wurde, hat der Papa ein Tag in der Woche auf den Kleinen aufgepasst. An diesen Tagen wurde ausschliesslich Spassiges mit dem Papa unternommen. Wenn ich zu Hause bin, kann ich leider nicht zu 100% auf den Kleinen eingehen, da ich halt noch Alltagsdinge, Haushalt… erledigen muss. Ich denke, deshalb verbindet er Papa halt mit Spass. Wie ich bei dir lesen konnte, geht es in dieselbe Richtung. Er wählt halt altersentsprechend die Person aus, mit der er mehr Spass verbindet 😉. Ich bin der Meinung, dass er sowohl zu dir wie auch zu deinem Mann eine sehr starke Bindung/Beziehung hat. Hinzu kommt, dass du wohl mehr da bist und er die sicherheit bei dir hat, sich zu 100% auf die zu verlassen.

Ich werde nichts an dem ändern & geniesse es, dass Papa so eine Enge Beziehung zum Sohn hat. Mein Sohn weiss, dass er zu 100% auf mich zählen kann & ich immer da bin. Das ist meiner Meinung nach am wichtigsten 😉.

malguggn

Ganz ehrlich, i ha ZWEI Papichind und findes völlig okay 🤷‍♀️ I weiss jo, dass si mi gliich ou gärn hend. Dr Papi macht die spannendere Sache- mit mir ischs wohl ehner langwilig 😅 Gniesses aber mängisch sogar, wenn d Chind am Papi chläbet und i öpis für mi cha mache. I würd versueche, mir da ned z vil Gedanke drüber z mache... Vor allem ischs ou ehner ä Vorteil, wenns zweite Chind da isch und du villech meh Ziit für das bruchsch.

Niggeli

Ich han zwei Mamichind und uch wünschti mir mengisch sie würded me am Papi chlebe. Ich glaube es het beides vor und nachteil. Han mal en guete Text dezue glese, woni finde erchlert beid site guet..
https://www.gewuenschtestes-wunschkind.de/2015/05/warum-lehnt-mein-kind-mich-ab-was-kann-man-tun-wenn-das-baby-den-papa-ablehnt.html?m=1

BAS

Okey lutem text hani wohl sini bedürfnisse ned gnueg chöne erfülle sondern vater? Ich bin 2. Bindigsperson. Gseh das ned so als vorteil, sondern dass ichs als muetter verseit han😂 hoffe de text isch ned wahr😔

Niggeli

Ou nei das tuet mer leid! Han nöd wele dasd s Gfühlt hesch hegsch verseit! Das isch sicher nöd so. Ich hans eifach so verstande das sich d Chind meistens zum einte Eltereteil me „hizoge“ fühled und dases au mit mehrere Chind nid bi jedem die glich als 1. Bezugsperson muen si.

BAS

Nei glaube chan ja eh ned si dass de papi alli bedürfnisse vor mir erfüllt hät wenn er ja 100% am schaffe gsi idch u ich 100% dihei eigentlich🙈

snowangel

BAS ich denke Mietter hets uh mega guet erklárt und stimme ihre voll zue.

De papi schafft au 100 er hilft mer zwar am firabig wükli viel mite kids und au mir mamis machet am tag viel hushalt so dass mir nöd jederzit chönt mit ihne spiele...aber ich denkes dass isch au alters bedingt vom chind. I dem alter fangets ah usefinde was sie wükli gern hend und sie hend viel gemeinsami interesse.

Es git spielarte wo de papi mitem sohn macht wo eifach nöd glich isch wie wenn ich mitspiele. Das hani vorallem bi mini muetter gmerkt.. mini muetter spielt mit min sohn auto und verzehlt e riiiesige gschicht debi so " oh nein hilfe polizei Auto, lego brück isch zemmebroche!! Ohhh yee da chunt de Helikopter und rettet eus und blablabla" min sohn bliebt völlig fasziniert und lost und grinst debi.. wenn ich das mit ihm mache seit er immer :" nei mami du weg" 😂😭 ich chas au nöd mini fantasy verschwindet wenni so sache muess erfinde und er langwillt sich er wet vo mir nüt mir ggöre wenn mir bim mami sind..
Und es isch völlig okaz und schön und so chanis usnutze und mitem chlinste öpis mache... Au wenn de partner mitem ältere sohn spielt nutzis immer us und mache öpis für mich oder de hushalt.
Wenn de partner ja schafft isch er wieder voll smamichind...

Es het nöd mur damit ztue wer all bedürfnisse erfüllt, schind weisst eifach ich mache das am liebste mit mami oder das mitem papi.
Woner früener chrank gsi isch her er nur mich welle will ich gwüsst han was er brucht, jetzt weisst de papi au so viel und plus gaht er mit ihm is bettli und lueget zemme filmli und gnüssets ikuschlet im bett, ich derf ihn nöd emal aspreche wenn er chrank isch will er das eifach nöd wet und er wet nur de papi ha..

Min sohn tuet nur gern mit mir spaziere oder paschtle dihei, sini autos derfi nöd alange usert de papi... Bädele tuet er liebwr mitem papi will er meischtens dbadekugle oder badesalz derft ha und spiele derft..

Dis chind unternimmt sicherlich au gerne einiges mit dir, vlt muesch es nur usefinde was genau das isch...

Und denke dra du häsch ja jetzt no es baby, de grössere weisst dass du nöd immer grad für ihn chasch öpis mache sundern dass du au mal de chlinste muesch unterhalte und deswege suecht er sini nöchi jetzt bim papi aber das het überhaupt nöd damit ztue dass er dich nòd liebt oder nöd gern mit dir sache unternimmt.. gib dir und dim sohn zit, es chunt wieder eso wie du es dir vorstellsch..
Und gnüss sowit es bitzli din neugeborene er brucht dich au jetzt 😊💜

Wo er nur mich het welle hanis echt ahstrengend gfunde und ha oft mitem partner umezickt debi het er sich so vieel müeh geh mit ihm öpis zmache aber die chline wüsset halt scho was sie wend und sie meinets nöd bös.. 💚

AnDu88

Es duet weh, verdammt weh abglehnt zwärde vom eigene Chind…das Chind wome so lang underem Härze treit het. Do füehli mit dir zu 1000%! Aber gib nid dim Chind schuld für die Zrüggwiesig, oder au dir. Du bisch keis schlechts Mami und du hesch scho gar nid verseit deswäge.

Es isch jetz halt so, i eure Situation isch jetz Papi Bindigsperson Nr. 1… aber due di Frust über d Zrüggwisig nid am Chind usloh und dues au nid miide deswäge resp. zieh di nid zrügg. Entweder suechsch öbbis wo du mit dim chind gmeinsam hesch, woder dranne chönnet schaffe/zämewachse oder du probiersch d Situation so zakzeptiere wie si isch. Ig i dinere Situation würd probiere d Asichtswiis z verändere is Positive und nid is negative… süsch machsch di selber kaputt und di Frust, entdüschig und dini Wuet tribt di nomeh weg vo dim Chind. Probier die Bedingigslosi Liebi ufzbringe für dis Chind und nid d Liebi wo du schänksch ane gägeleisitg z hänke…wöu denne isch si nümme bedingigslos. Vilicht hesch selber us Chind vill zrüggwisig erläbt und das risst alti Wunde uf…

I wünsche üch sehr, dasder üche Wäg findet und vergiss nid, au wenn nid Bindigsperson Nr. 1 bisch, liebt di dis Chind trotzallem ❤️

🦋Farfalla

Liebi @BAS

Ich han au zwei Papi Chindä ... diä chliner ganz extrem. Sobald er da isch bini luft🥲 und au is bett bringe dörf meistens nu de Papi zurziit.

Ich verstah dini entüschig & das di au trurig macht.. i ha mängisch au recht müäh dämit.

I versuechs afach z akzeptiere au wenns nid immer eifach isch. Dä Papi macht halt würkli meh dä Globi und diä spassige sachä.. viellicht isch das bi eus en grund 🤷🏼‍♀️

Öppis positivs hets 😀 wenn i wäg möcht gits niä es theater.

Fühl di druckt🥰

BAS

Isch no interessant wie vielne müettere es ja ähnlich gaht, hättich gar ned denkt!