Tagesmutter gesucht ab ca. April 2024 (Stadt Zürich)

Miss_KK

Hallo Zusammen

Wir suchen für unseren im Dezember 2023 zur Welt kommenden Sohn ab ca. April 2024 eine liebevolle Betreuung. Da wir beide voll berufstätig sind und dies auch bleiben möchten, sind wir auf der Suche nach einem liebevollen und flexiblen Vollzeitmami in der Stadt Zürich (Nähe Kreis 6), welche auch unseren Sohn im familiären Umfeld mitbetreuen möchte (gegen angemessene Entlöhnung selbstverständlich).

Wir würden uns über Kontaktaufnahmen freuen!

EJC

ich bi zwar nid vo züri, aber du machsch das super, dass du scho e tagesmueter suechsch. die sind würkli rar. mir hend jetzt nach 7 mönet suechi, endlich eini gfunde. und eini i de nöchi. aber ich empfehl dier,
über tagesmueter verein zgo. mir hend paar privat abüterine aglueget und sind zum teil schockiert gseh. über de verein weissi, dass die gwüssnigi aforderige decke münd. glaub das do isch für züri: https://www.tagesmutter-verein-zürich.ch/?gclid=EAIaIQobChMI0unCrvqkgAMVTeF3Ch2UQQ2YEAAYASAAEgJDTPD_BwE

viel glück binde suechi und alles gueti binde genurt im dezember.

Miss_KK

Danke vielmal für din Erfahrigsbricht! Ich find de Gedanke ebe schön im Sinn vo "Women support Women": Ich find jedi Frau sell das Modell chöne wähle, wo für sie stimmt und ich fänds uschön öper zfinde zum sich gägesiitig chöne dadebi unterstütze. Ich weiss für mich, dass ich de Typ "Working Mom" bin und nur wird glücklich sii, wenn ich chan schaffe. Ich suech nachere Frau wo de Typ "Full Time Mom" glücklich macht - und wenn sie denn im liebevolle und familiäre Umfeld au uf euise Sohn chan ufpasse und ich sie finanziell chan entlaste (so, dass sie ebe viellicht nied us finanzielle Gründ müsst 1-2 Täg go schaffe) fänd ich das mega schön! Aber we will see, obi privat so öper finde, wo denn schlussendlich au zu euis passt En Krippeplatz hemmer uf alli Fäll mal reserviert.

EJC

bitte gern. ich ha das gliche au probiert und bi gscheiteret. ha i einere als nanny de job abote mit bvg, ktg und bi sie gar dahei go hole und bringe. sie het aber ihri chline jobs nid welle ufghä und isch müed gseh und het sich nid würkli möge ums baby kümmere. bis jetzt hani 3 nannys imene halbe jahr kha. sie unterschätzet ebe es baby. die tagesmueter wo mer jetzt endlich hend, isch selber 10 jahr unternähmerin gseh und sie hüetet scho es baby. drum gohts. aber, es ha si, dass du meh glück als ich hesch. ich wünsch es dir uf all fäll. söst falls ihr englisch chönd, kenni nannys wo halt nume englisch redet. ich druck eu duume und liebe gruess

Miss_KK

Oh, das wär unett, wennd mer die englisch-sprachige Nannys chöntisch nenne - allefalls per PM. (Chum i dem Forum nanig so drus 😅) Danke vielmals!

chio

Also ich wird im Dezember selber Mami und han scho hüfig ide Chliikindbetreuig jobbt. Chume vo Winti, das wer nöd grad Stadt ZH aber viellicht passts ja glich.

Da ich denn mit Baby deheime bin, wers natürlich super wenni au was dezueverdiene chan und grad no d Erfahrig han vom eigene Kind. Daher hetti au alles nötige deheime umestah für es Chliikind/Baby.

Es chan natûrlich guet sii, dases vode Entfernig her zwiit weg ish vo euch, aber ich wer uf jede Fall interessiert!

LG Vanessa

greenguapa

Miss_KK schrieb: »

Hallo Zusammen

Wir suchen für unseren im Dezember 2023 zur Welt kommenden Sohn ab ca. April 2024 eine liebevolle Betreuung. Da wir beide voll berufstätig sind und dies auch bleiben möchten, sind wir auf der Suche nach einem liebevollen und flexiblen Vollzeitmami in der Stadt Zürich (Nähe Kreis 6), welche auch unseren Sohn im familiären Umfeld mitbetreuen möchte (gegen angemessene Entlöhnung selbstverständlich).

Wir würden uns über Kontaktaufnahmen freuen!

Hoi

Ich selber bin Betreuungsperson Tagesfamilien (Tagesmutter) angestellt bei GFZ. Wir arbeiten mit der Stadt Zürich zusammen und bieten deshalb subventionierte Plätze an. Ich selber wohne & arbeite im Kreis 3, ist whrs. zu weit weg für dich. Aber falls dich das Thema interessiert und du mal unverbindlich reinschauen möchtest in eine GFZ-Tagesfamilie, wärt ihr herzlich willkommen.
Liebe Gruess
Sarah