Gotti ist sehr kühl gegenüber Gottenkind

farfalla83

Hallo villicht cha mir öper en rat gä, wie ech sel mit dere Situation om go. Mir hend es Gotti wo grad im giche Ort wohnt. Sit längerem esch es sehr en kühli Stimmung wenn sie zum bispel üs begägnet gids nor es kurzes Hallo ond nüt schösch ond de god sie ou grad witer…God null of eheres gottekind zue. Einersiits fend echs för mis kind nid schön ond ou för mech esch das langsam en belaschtig. Ech weiss am breschte wär druf aspräche was los esch, aber mir fallt das sehr schwär….

AnDu88

I kenne das au. Ig ha bi mim Bueb denne zwei Gottis usgwählt und s einte Gotti het sich nach de Geburt vom Bueb sehr vo üs distanziert. Het nur sehr selte aglüte/gschribe und gfrogt wies geit, bsüechli gmacht oder gfrogt zum abmache, isch a keini Geburtstäg cho 🤷🏼‍♀️ dr Kontakt isch nur sehr selte gsi und jo… ig has akzeptiert. Si isch denzumal kinderlos gsi, het halt e andere Läbensmittelpunkt gha…isch vill am schaffe gsi und go reise, i Usgang usw. S Verständnis vo üsem Alltag het gfehlt.

Mittlerwile isch si selber Mami vomene Bueb und mir hei nach sinere Geburt wieder engere Kontakt afo ufbaue. Jetz weiss si selber wies isch, wenn me Mami isch und si het sich de au bi mir entschuldigt wie si dennzumal zu üs isch gsi. Aber i muess ehrlich säge, si het au jetzt no eher es küehlers verhältnis zu mim Sohn… mit minere Tochter isch si ganz angersch - es harmoniert eifach 🤷🏼‍♀️. Es gits halt leider dasme mit gwüsse Mensche nid so „warm“ wird. Isch sehr schad wenns grad s Gottechind isch, aber bi üs Erwachsene isches ja nid andersch.
I bi au nid dr Typ wo so themene aspricht…ha dennzumal au nüt gseit 🙈😅

Pallas

Warum hender sie als Gotti gno? Also mis Gotti isch aghürate gsi und denn nach de Scheidig hani keis meh gha.. denn hend mini Eltere es anders gwählt🙈Ich wür sie au drufah spreche und allefalls es anders neh. Sie isch denn mis Gotti gsi wo mich adoptiert het, isch bis hüt e lustigi Gschicht a de Familie treff

farfalla83

Sie esch en gueti kollegin (gseh) aber dor corona ond dor das das mir mol wäge öpis nei gseid hend, esch es chli komisch worde zwösche üs

vanysch

Ig dänke es isch immer zbeschte weme so sache bespricht. Ig ha e gueti fründschaft verlore dür nid aspräche vo genau so sache. Mittlerwile wirdi vo derä person sogar ignoriert& si macht e riese boge um üs we mir üs zuefällig gseh. Nachem 3. mau ignoriere hani si schlussändlech blockiert. Si hätt o zgotti söue wärde vo üsem 2. ching, hei aber när entschiede (aui zämä) dasses besser isch we mir das lö la sii. Sithär ischs immer komischer worde u äbe, iz säge mir üs nid mau meh hallo.
Mach nid dr glich fähler u red mit ihre. Meistens sis missverständnis wo när zu unnötige soannige füehre u irgendwenn seisch nid mau meh hallo😞

Tanja87

Das isch leider es Thema wo immer wieder uf chund, i diverse Familie. Bim Sohn hemmer s Gotti au gwechslet. Aber mier hends zeme besproche gha. Sie hed denn selber zwei Chind gha, Eheproblem und denn isch es ihre z viel worde... je nach Läbesumständ gids es halt leider, das d Gotti/Götti-Pflichte nümm chönd wahrgnoh werde.
Ich wür sie mol allgemein frage wies ihre gahd. Und denn im Gspröch z Thema ufgriffe, ob sie denn no gewollt isch Gotti z bliibe.
Je nach Person definiert halt au jede anders sini "Gotti-Pflichte".

Ich han 3 Gottechind, nebst mine 2 und ich han au ned zunallne 3 s gliich guete Verheltniss und mache mier sehr oft au es schlechts Gwüsse desswege. Ich versuech aber all 3 mindestens all 2 Monet z Bsueche (wohned all mindestens 90km vo mier entfernt) und öbbis mit ihne z erlebe.