Sohn 3 Monate sehr schlechter Schläfer...Austaisch/ Tipps?

_Flor

Hallo Zäme

Ha e Sohn wo im Juli 2023 gebore isch u sueche Ustusch mit anderne Eutere wo o e extrem asträngende Istig hei ka aus Eutere, wöu zChing sehr schlächt gschlafe het.

Mi Sohn schlaft wenns hööch chunnt ir Nacht 2h am Stück, sehr säute mau 3h bis 4h. Das si aber sehr grossi Usnahme.
Dr Schlafmangu tuet mire Psyche u Geduldsfade gar nid guet.. u i ha z Gfpehu, dassis nid viu länger prestiere, wenns so witter geit...

Hetts hie Eutere wos o so geit bzw. isch gange u Interesse amne Ustusch hätte?
Mi würds interessiere wie dir drmit sitt umgange und ob dir öppis usegfunde heit wo euch ghulfe het?

Mir hei gfühlt scho aues usprobiert...
Mi Ma unterstützt mi so guet er cha unter der Wuche, da er aber muess ga schaffe, muess er logischerwiis zu Schlaf cho...

Bi gspannt, ob sech öpper mäudet. 😊

Lauraannah

hii, fühle mit dir. euse chli isch afang juni 2023 uf d welt cho, und schlaft max. 2h am stuck ide nacht. zur zyt eher so 1,5h🫠
ich weiss ehrlichgseit nöd was degege mache, ich han mich demit abgfunde, dasser en schlechte schläfer isch und probiere s beste drus zmache. ich pfuse ez amel sin erste morge schlaf namal mit nachm zmorge. so isch zwar de halb tag scho gloffe, aber was willi mache🤷🏻‍♀️🫠 min ma wacht nöd eimal uf ide nacht 😂 aber er chönt sowieso nöd gross öpis mache, will de chli eig nur ade brust ischlaft.
chander leider drum kein tipp ge, nur guets durehebe und ich hoffe sehr, dasses bald besser wird🙏🙏

melanieF

Hoi zämä.
Üse sohn isch iz 16 mönet.
Er het bis guet 8 mönet düre tag nur immer 30 min gschlafe u isch när für öppe 2 stung wider wach gsi. Das isch när bis am abe so wittergange. Dür t nacht hetter ou immer öppä 2 stung am stück gschlafe u ni länger.

Bis hüt schlaft är ni lenger aus 3 stung am stück.

Mir hei ou div probiert u für mi isch immer klar gsi dasi ihn ni wot la grännä zum ischlafe.
I finde das isch eher es trauma aber das mues jede säuber wüssä.

Mir hei ou mau mit de ärzti es schlafprotokoll usgfüllt zum luege wenn schlaft är wie viu um chli es system inezbringe.

I ha sehr viu gläsä über das schlafe u es när ou agno das är äbä schlächt schlaft. Z chind macht es ni äxtra. Ide chind isch verankeret dases guet isch wensi ni 10 stung düreschlafe. Idere zit würde si ihri gfüel nach hunger, nöchi ect ni chönne usdrückä u das wär eigentläch läbensgfählech. Nur für üs erwachseni isches extrem ahsträngend.
I bi de ou immer mit ihm ga pfuse derü tag u am weekend hani ou tolli unterstüttig vom mah ka.
Iz isches haut eifach normau u mä gwöntsech dra.

De ultimativ tipp kenni ni und gitz ou ni. Da müesst dir us fämeli ä wäg finde das es öich aune guetgeit.

AnDu88

Mi Bueb isch mittlerwile 7i und schloft znacht wiene Stei 😂 ig chönnt es Glas lo gheie näbe dra und er verwachet nid.

Aber vor 6,5 Jahr hätti das nie glaubt, dass dä Fall mol wird iträtte bi ihm…. Ig füehle absolut mit dir mit. Die schlaflose Nächt, i bi am Endi gsi!! Wie mängisch hani us verzwiiflig znacht grännet, willi eifach nümme ha möge..kei Chraft me ha gha. Hami stäntig gfrogt was nid stimmt mit ihm, anderi Banys schlafe düre und er nid. I kennes nur zu guet. Er het die erste Wuchene/Mönet max. 2h am stück gschlofe plus no das ständige Nuggele ade Brust..hane so guet wie nie chönne löse. Zudem hetter duurend Körperkontakt brucht. Eifach so Ablegge hani ihn nid chönne. Es isch e seeehr intensivi Zit gsi. Ha denne mit 7wuche ca. müesse zueschöppele will er nid zuegno het. Das het es bitz gholfe, aber er het trotzdem d Brust welle zum schlofe.
Mit de Wuchene wo vergange si, isches langsam besser worde…d Abständ hei sich immer meh vergrösseret.
Was mir aber am beste gholfe het, isch d Situation eifach z akzeptiere… truurig aber wohr! es isch wies isch, ändere chames nid, zum schlofe zwinge scho gar nid. Ig has au so gmacht wie d @Lauraannah i bi de s erste Morgeschöfli go mit aneligge. Mir si selte vorem Mittag usem huus die ersti Zit. Oft bini au tagsüber zu mim Mami gflüchtet, dasi au tagsüber e chlei ha chönne go häreligge und si währenddesse de chli het chönne hüete.

Es schiint unwahrschinlech im Moment und die Ussag hani zu dere Zit selber au ghasset… aber es wird besser ❤️
Wünsche der vöu chraft und guets durehebe.

Angii85

Min Grosse isch mittlerwiile 3 und gsd letzt nacht ischer eifach mal wider 2.5h wach gsi... ja dezue hani ni s baby 5 mõnrt alt wo all 2h d brust will im moment .
De gross het scho immer schlecht gschlafe, s bessrret aber immer meh.. ziitewiis isch er all halb stund ide nacht cho und er isch keis stillkind gsii.. ich has denn eifach akzeptiert und denn ischs au gange.. e anderi wahl hesch eh nöd..

aenn

Hallo @_Flor

Aso du bisch definitiv nöd ellei! Bi eus isches au eso, dass euse 4 Monet alte buebi nöd lenger wie 2-3h am stuck schlaft🤷🏻‍♀️ aber ich denk das isch so früeh no völlig normal und au okay! Klar isches streng und e umstellig zum alte läbe. Aber mir schaffed das! Und wenn eusi manne eus am wuchenend chönd unterstütze isch das ja scho vill wärt🥰

Und ja mengisch sind d täg strenger und d geduld seehr chli. Aber es chömed besseri täg🥰🙌🏻

_Flor

Merci viu Mau für eui Erfahrige u Brichte.
Tuet guet z ghöre, dass me nid allei isch mit dem Problem...

I has no nid gschafft, z akzeptiere, dass es so isch o wenis nid cha ändere, i gibmir all di Mühe woni cha.. I ha scho immer Schlafproblem ka.. u wenn mi Sohn 1h Schlaft, de schlafi 30min wes hööch chunnt, wöui lang bruche zum ischlafe.. i bi närvlech ziemlech am Ändi u weiss nid wini mit dem Frust söu umgah... 😔 I schlafe sitt 3 Mönet aube nid viu länger aus durchschnittlech 1h am Stück u das verma mi Körper langsam eifach nümme... Ja, düre Tag peobiere z schlafe, wenn er schlaft. Aber da er nume 30min schlaft, isches es Ding der Unmöglichkeit...mir fäut der Schlaf dürd Nacht...
I weiss, i chas nid ändere, dass er sone schlächte Schläfer isch, aber i bi total erschöpft...
I ha scho mit dr Chinderäeztin,mit der Ostheopathin u der Müetter- & Väterberatig gredt... Würklech häufe cha irgendwie niemer...i empfinde eifach z viu Frust. 😕
U z schlächte Gwüsse wäge dem es schlächts Mami z si, gitt mir irgendwie der Rest... 😥

AnDu88

Du bisch wäge däm sicher keis schlechts Mami, dini Gfühl und dini Bedürfnis si genauso wichtig.

Wasi der no cha empfähle isch https://www.1001kindernacht.ch

Due di doch mol mit ihne i Verbindig setzte, das si Fachlüt was de Kinderschlaf betrifft.

daisy19

i cha dir voukomme nachefüele! bi mir ischs relativ ähnlech, si isch iz 7 mönet aut u schlaft meistens düre tag immerno nur 30 min u ir nacht chunt si ou meistens au 2 stund u brucht mengisch ou widr ihschlafbegeleitig drzue. mir hiufts, geng widr drahzdenke dass es für si ou streng isch. und zb dr hushalt haut chli la schliife u düre tag eifach das mache wo eim guet tuet u energie git 🌼

daisy19

u es schlechts mami bisch weg dem sichr nid! hani natürlech bi mir ohscho denkt, aber du chasch ja ou nur guet zu dim chind luege wes dir ou guet geit ☺️

_Flor

@Ansu88 Merci viu Mau füre Link vo 1001kindernacht u de liebe Wort!

@daisy19 merci für dini Erfahrig z teile u der tolle Nachricht.

Da hesch du recht.. i gibi mis beste, sött aber o luege, dassi nid geng über mini Grenze gah..

Tanja87

Ohh das kenni zu guet. Mini Tochter, im Februar wird sie 5i, isch au eso en Brustnuggeler und Kontaktschläferin gsii. Brust bruucht sie Gottlob nümm 😉🤣, aber schlafe tued sie immer no bi eus im Familiebett. Ich has au lang ned chönne zuelah und akzeptiere, da all immer gseid hend das ihri Babys allei schlofid im Zimmer und au 3 bis 4 Stund am Stück... es macht eim fertig und Schlafmangel isch de Horror... hettsch denn d Möglichkeit s Baby mal für ne Nacht zu de Grosseltere z geh? Oder du mal es Wucheendi usswerts go pfuuse, das dich eso mal chasch chli Erhole?