Was machi falsch: Stille oder anders Bedürfnis?

Annika2023

Hallo zäme

Ich bi am 1.8.23 s erste Mal Mami worde.
Üsi Annika isch eher e lebhaft und sehr e aktives Baby. Ich still si voll.

Hüt isch mal wieder sonen Tag wonich mich als Mami echt hinterfrööge...

Mini Chlii het sit es paar Wuche d Ahgwohnheit dass di sich immer wieder ablöst vo de Brust oder weg dreht, egal ob de Milchspendereflex scho iigsetzt het oder nid. Si brüelled und wirkt sehr unglücklich. Trotzdem hani h s Gfühl dass si Hunger hät.

Ich büt ihre denn mehrmals d Brust nomal ah und probiere ob si vilicht eifach ungeduldig isch oder d Brustwarze nid guet cha fasse. Oder gib ere di ander Brust oder wechsle d Stillposition.
Wenn si trotzdem nid trinkt denn check ich alles andere übliche. (Windle, Heiss, Chalt, Müed, Nöchi)

Si hät grundsätzlich immer d Hand im Muul oder de Duume und suugt mega stark.
Hüt hani 2h lang alles probiert.
Je nachdem wasi gmacht ha het sie sich immer mal wieder churzziitig beruhigt, au mal glächlet de zwüschet oder churz gspielt, aber schlussendlich denn doch wieder brüelet.
Kei Ahnig was los isch...
Schlussendlich isch di denn doch no ad Brust, aber ich ha si möse "festhebe" bis si richtig trunke het.

Normalwiis wenn si würkli Hunger het trinkt si sehr konzentriert und ruhig.
Aktuell lueg ich au immer dasmer wenn möglich ines ruhiges, abdunklets Zimmer gang. Oder de Kopf mit me Nuschis abdecke.
Ide Nacht hemmer das Problem weniger, isch aber au scho vorcho.

Cha öper helfe??

Schmetterling

So interessant!!! Mini esch am 02.08.23 ufd Welt cho und das Problem hemer sit paar Täg au.. jedoch mit de Fläsche.. ich hoffe esch nur en Phase ...

Lauraannah

chan nu us eigener erfahrig sege (mami worde am 2.juni 23) dass euse das mengisch au macht 2-3 täg und denn isch wieder alles normal. ich stille au voll und es git immer wieder ‚möödeli‘ wo denn paar täg ahaltet und denn isch wieder normal.
vlt druckt es fürzli, vlt iwo es zähndli 🤷🏻‍♀️ solang sie sus happy isch und guet/normal zuenimmt würimer nöd allzu viel gedanke mache💜

Crystal

Gratuliere zersch Mau zur Geburt vor Annika😍 hingerfrag di nid, i bi sicher du bisch äs super Mami u du machsch, so wi du aus beschriebsch, genau aus richtig. Du probiersch aus us wo mir o wär i Sinn cho. Äs git leider so Phase wos weniger guet klappet mit stiuä…i wünsche dir dases schnäu vürbi geit u dirs wider chöit gniesse. Hesch no d Hebamme? Frag doch no si, si kennt öich viu besser aus mir hiä…u wett de wes würklech nid geit eifach abbrichsch mit stiuä? Ir Hoffnig das we si de würklech fescht hunger het si de scho richtig sugt? Zwöi/Drü Mau probiere u wenn nid, ufhöre u sä süsch probiere ds beruhige?

_Flor

Haha 😅🙈 Ou man, tuet das guet z läse, dass es anderne o so geit. 😬🙈
I bi am 14.7.23 Mami worde und dä Bitrag chönnt 1:1 vo mir si... Vor öppe 2 Wuche het mi Sohn o mit söttigem Verhalte agfange bim Stille. I bi fasch verzwiflet... Bi ner vor es paar Täg extra id Stillberatig, wöui dänkt ha, dassi äuä öppis fausch mache... Sie het mir ner gseit "hm.. komisch, auso sones Verhalte kenni vo Bebes i dem Alter nid..". U Tipps het sie mir eigentlech keni ka... 🙄 Drum stuuni, dass es hie es paarne so geit us bi aune öppe um di glichigi Zitt agfange het.. 😅

Bi üs duurets nume es paar Täg u ner isch wieder guet. Weiss o nid gnau wieso er das macht. Ha mi gachtet, ob er uf öppis reagiert woni isse.. aber da hani nüt usegfunde.. wener so tuet, tueni luege,ob er no es Görbsli het wo ihm stört u wener nümm wott trinke, lanis lassi u probiere wie du schribsch aues andere. Mängisch dänki, dass es evtl. d Müedigkeit isch, aber meistens hani ke Ahnig wieso er get so tuet.. i hoffe eifach, dass es wie geng nach es paar Täg düre isch. 😅🙈

Annika2023

Hoi zämä

Danke villmal für euri Nachrichte, das macht mir mega Muet.
Ich ha gester Abig no minere Stillberateri/ Hebamme gschriebe.

Sie het gseit dass wenn si zuenimmt und di nasse Windle passed ich mir kei Sorge sell mache.
Das i dem Alter s suuge ade Hand am Duume mega oft falsch verstande wird vo de Müettere. Dass ich si nid sell ahsetze und mal sell luege was si denn macht...

Die Nacht het sie au wieder dure gschlafe. S letzte Mal gstillt hani si ca am 22:00. Dänn hani si ide Nacht 3 bis 4 mal ghört dass si unruhig worde isch und am Dume gnucklet het, sie hät aber d Auge zue gha und isch nnid würkli ufgwacht. Drum hani de Drang sie z stille unterdrückt 😅🙈 und si hät bis am 06.40 Uhr gschlafe.
Au denn hani si meh oder minder gweckt.

Würkli Hunger hät si au dänn nid gha. Händ dänn nochli gspielt. Irgendwänn hanis denn aber im Chopf nüm ushalte und ha si ahgsetzt öppä am 07.15 Uhr. Di eini Brust hät si denn guet gleert.
Nacher hämmer nomol chli spillt bis si müed worde isch und ez schlummert si friedlich im Tuch.

Ich glaube dass ich meh Müe ha als d Annika und Angst si chönt nid gnueg zueneh oder dass mini Milchmengi zrugg gaht etc. 🤯

Annika2023

_Flor schrieb: »

Haha 😅🙈 Ou man, tuet das guet z läse, dass es anderne o so geit. 😬🙈
I bi am 14.7.23 Mami worde und dä Bitrag chönnt 1:1 vo mir si... Vor öppe 2 Wuche het mi Sohn o mit söttigem Verhalte agfange bim Stille. I bi fasch verzwiflet... Bi ner vor es paar Täg extra id Stillberatig, wöui dänkt ha, dassi äuä öppis fausch mache... Sie het mir ner gseit "hm.. komisch, auso sones Verhalte kenni vo Bebes i dem Alter nid..". U Tipps het sie mir eigentlech keni ka... 🙄 Drum stuuni, dass es hie es paarne so geit us bi aune öppe um di glichigi Zitt agfange het.. 😅

Bi üs duurets nume es paar Täg u ner isch wieder guet. Weiss o nid gnau wieso er das macht. Ha mi gachtet, ob er uf öppis reagiert woni isse.. aber da hani nüt usegfunde.. wener so tuet, tueni luege,ob er no es Görbsli het wo ihm stört u wener nümm wott trinke, lanis lassi u probiere wie du schribsch aues andere. Mängisch dänki, dass es evtl. d Müedigkeit isch, aber meistens hani ke Ahnig wieso er get so tuet.. i hoffe eifach, dass es wie geng nach es paar Täg düre isch. 😅🙈

Und we hesches gelöst?

_Flor

Ah krass 🤯🤯 so lang Pouse hätti o Mau gärn 😅🙈
Mi Sohn macht ir Nacht max 4h Pouse u das extrem sälte... 🫠 Mau chli länger am Stück schlafe vermisse extrem..

I has äbe gar nid glöst.. 😅🙈 nach 2 bis 3 Täg tuet er nümme.. u mängisch chunnt u geit das Verhalte wieder ... 🤷‍♀️

Annika2023

Okey, d.h wenns nid gaht denn lahsches sii mit versuche Stille und denn wartisch bisher wieder trinkt respektive probiers h es später nomal?
Ha ebe überleit gha zum Abpumpe und Fläsche geh aber ha denkt das isch eventuell au kontraproduktiv ke Ahnig...

Ha hüt grad öpert im Rückbildigskurs gha, ihres Baby isch 2 Wuche älter, wo jetzt scho am Zahne isch und ähnlichi Sache macht... Vilicht zahnt mini au scho??

CDanielle

Hoi Zäme gad chli müsse schmunzle wo i eui nachrichte gläse han, min chli isch etz wcho fast 15 Mönet aber i weiss no genau i ha genau s gliche Problem gha und ha mit meg sorge gmacht. Komisch findi dass d stillberatig seit dass sie das verhalte i dem alter nid kennt!? Es git bi vilne bebes mit 3./4. Monat so en Brustschimpfphase, da isch wills d umgäbig meh wahrnehmet…. Viel cha mir nid mache… nur immer brust wieder abüte… und wie viel scho gseit , solangs guet zuenähmet und suscht z friede sind isch das au gar keis problem…bi es paarne gaht da nut 1-2 täg bi andere chas au 2-3 wuche dure… bi eus isch so nach
1-2 wuche wieder guet gsi… milch isch au ned zrugg. Isch sehr ärglich aber i glaub wie d @Annika2023, mir hend meh müeh wie eusi chli e würmli 😅