Wie mached ihr das mit de Tagesschlöfli?

Annika2023

Sali zäme

Mich würd interessiere wie ihr das mit de Tagesschlöfli mached vo eune Chind.

Lieged ihr immer mit e ane?
Bliebed ihr debii oder gönd er usem Zimmer?
Tür offe, Türe zue?
Was mached ihr alles i dere Ziit?

Mini Chli isch wie gseit 13 Wuche alt und mittlerwiile wett si nüm immer im Tragetuch schlafe. Was super isch für min Rücke denn het de au mal Pause.
Aber ich bi chli unsicher we ich das sell handhabe.

Bi gspannt uf euri Antworte

Mamelo

Wenn i s glöck gha ha das di allei pfuse, hani si anegleit gwartet bes si em tüfschlof send und de use, töre zue, babyphone ah ond ab go s gröbschte em hushalt mache ond de met chli glöck nochli memtime gnüsse.

Au am obe hemmer d töre emmer zue gmacht ond met em babyphone öberwacht

snowangel

Ich bi meistens am spaziere und er schlaft im kiwa. Falls i mal dihei bliebe schlaft er i de wippe ih und denn träg ich ihm is bettli aber er bliebt lieber i de wippe

Crystal

I bi aubä bi ihnä blibä bis si igschlafe si u när hani d Türe zue zogä bis ufnä chline Spaut das i sä ghört ha. We du mit härä ligsch besteit haut d „Gfahr“ das si nie meh ohni di näbä dranne cha ischlafe…i würds grad vo Afang a so mache wits de o immer wetsch ha…bim erschtä Ching isch är viu nachem stiuä ufem Stiuchüssi igschlafe, denn hani nä dert la si ud nöchi gnosse. Bim zwöite isch das nüm mügläch gsi u därum äbä i Stubäwagä züglät u im Zimmer la schlafe

Di Pousä isch aubä o mini Pousä gsi u i ha nüt gmacht i derä Zit☺️ bim erschtä Ching natürlech, nächhär hei d Schlafzitä nüm würklech zämä passt bis när nume no dr Mittagsschlaf isch gsi. U o denn isch das mini wouvürdienti Pousezit gsi, Hushaute chasch ja o süsch mau wes wach isch, häb di drfür o mau nüt ds mache, du heschäs süsch gnue sträng u o ä Pouse vürdient☺️

Groan

Ich begleite beid meistens in Schlaf, mengisch machedses elei, denne eher Türe zue und entweder Hushalt oder Pause für mich oder eine vo beidne isch wach. Sie schlafed entweder im Chinderwage vo underwegs oder denne i ihrem Bett im Chinderzimmer. Wos amel na chli gsi sind, hanis au im Stubewage bi mier gha. Eifach solang sie bi „Lärm“ vom Hushalt guet schlafed.

snowangel

Ich denke genau so wie crysta meega guet dasa das erwähnschl!! 😍 ich ha am afang immer sache welle erledige wos gschlafe hend denn hani schnell gmerkt neii ich Bruch die zit für mich und nutzes voll mit neui sprach lerne us oder suscht music. Ich gah aber au deswege jedetag go laufe willi eso wenn beidi im kiwa sitzet/schlafet chani Mini music lose.
Dihei lahni denn de grosse wenn de chline schlaft entweder bädele mit spielsache oder er derft denn mit kneti spiele oder zeichne. De grosse macht kei mittagsschlöfli me aber finds mega guet wenn er au Pause macht. Wenn er nonstop spielt ischer am 17/18 so müed das chan mega ahstrengend werde.

Würd das jedem mami au empfehle die zit für sich zneh 🎉

Eline22

Die erste drü monet hend mini chind det gschlafe wos igschlafe sind bi tagesliecht. Meistens kinderwage oder laufgitter. Bruchts anschienend damit sie en richtige tag/Nacht Rhythmus lerned. Nach drü monet im abdunklete zimmer. Meischtens türe offe, ussert die gross isch z lut xi den türe zue das sie nöd gweckt worde isch.
Ich nutz die zit zum hushalte aber mach au mal e pause. Da mini kind sit geburt sehr guet gschlafed hani keis bedütfnis zum anelige. Aber ja wenn sie das nöd wäred würi sicher au go schlafe.

_Flor

Mi Sohn schlaft sittere Wuche ändlech nid nume im Arm u i chane ablege.
Das heisst ischlafe tuet er entweder im Dondolo oder im Arm. (Es muess gschauklet wärde für i Schlaf z finde düre Tag) u wener nach 10 bis 15 Min Schlaf im Töifschlaf isch, chani ne ablege. Ner hani hurti 10 bis 15 Min für mi ner ischer scho wieder wach.
Entweder machi schnäu Verschnuufpouse oder ganz öppis chlises im Hushalt. Zu me chumi nid i dene 10 bis 15Min.

I bi iz am probiere, dass er nid nume bim Schoukle cha ischlafe, sondern o anders i Schlaf findet. Aber i la ihm di Zitt woner brucht, um das z lere. Bis denn begleitine i Schlaf u blibe bi ihm, wenn er das brucht.

Lauraannah

@_Flor Wie alt isch din chline? euse bueb 5mönet find au nur in schlaf wemmeren ide tragi treit oder bim stille.

_Flor

@Lauraannah
Ersch isch iz de 4 Mönet.

Gäu es paar Bebes bruche die Näächi u das schoukle. 😊🙈

aenn

Euse bueb isch 4,5 mönet, schlaft am morge und am nami unterwegs im tragi oder dehei im dondolo. Mittagspfus machi mit ihm im bett, wart bis er schlaft oder pfus e rundi mit. 🤗
D zimmertüre mached mir immer zue und weni usegah schalte ich s babyphone ah. Mir hend 2 chatze, die gumped immer ume und das würd ihn störe😅