Spontan Geburt nach Kaiserschnitt

CDanielle

Hallo, i ha bi mim Sohn en Kaiserschnitt gha ufgrund vu sinere Position (BEL) eigentli isches plannt gsi er isch denn glich 4 Tag vorem plannte Datum cho. I erwarte etz mis 2. Wunder, nur 17 Mönet spöter. Hets da inne öpper wo nacheme Kaiserschnitt, eher kurz drufab en spontan Geburt gha het und Erfahrig wet teile? Mir ratet leider viel vunere spontane Geburt ab, will ned sehr viel Zit dezwüschet isch.

Crystal

Hallo👋🏻 i ha zwar zwänzg Mönet drzwüsche gha aber o zersch ä KS u när ä spontani. Mi hei si eifach äs paar Mau gfragt öbi schmärzä bir Narbe heig, wüu haut d Gfahr isch das diä chönnt riise. Hani aber nie gha. Was seit de dini Froueärztin?

Bindli

Ich han 4 Jahr nachem Kaiserschnitt e spontani Geburt welle und hend all gseit, es seg möglich. Nach 27 Std. Wehe hets mini Kaiserschnitt Narbe verrisse und han denn en Not-Kaiserschnitt mit Vollnarkose gha, da mis Baby und ich in Lebensgfahr gsi sind. Mir hends zum Glück beidi ohni bliebendi Schäde überlebt. Ich wür das Risiko nie meh ii gah..

Malak

Ich han nach 20 Monet nachem KS en Spontangeburt ka. Han bis churz vor Geburt ned gwüsst öbi sell oder ned. Mir hends bide Untersuechige vor de Geburt immer im Ultraschall d Narbe sowiet möglich glueget und tatsächlich hend mi usnahmslos alli Ärtzt und Hebamme bestärkt zunere Spontangeburt.

Da mini Geburt sehr lang gange isch hend sie öbe ide Halbzyt namal mit Ultraschall glueget und i het mi sofort selle melde wenn was komisch isch. Aber alles guet gange und bin mega froh hani mi deför entschiede.

Bindli

@Malak: anschinend gseht mer im ultraschall nöd, wies mite narbe usgseht.. mir isches uf eimal schlecht gange und de hends im ultraschall nöd gse, dass d narbe am risse isch.

a_94

Hallo👋
I ha genau die glich situation ka
Mini tochter wege beckelag müse kaisershnitt mache und nach 17 mönet hani min sohn normalgeburt ufd welt brocht

I cha dir eis empfehle go eifach mit nere neutrali istellig döthi und seg i probiers
Und wenns nöd klappet kennsh kaisershnitt jo shoo, abr wenigstenz chash sege du heshs probiert.
Ileitigsmethode hesh halt nur ali natürlichi mittel, also viel treppe stiege, sharf esse, buch massiere, wehetee usw

Abr wenn du fest dra glaubsh denn chunt alles guet, positivi istellig ish swichtigste da gut dir und am baby viel kraft🥰

Hoffe ha dir chöme behilflich si, sus chash au per pn mi ashriebe und froge stelle

FG
Ayse

Nalan83

i ha not kaiserschnitt gha bi de erschti geburt und zweiehalb johr spöter hani kin sohn unbedingt normal wele ufd welt brenge wel ich kaiserschnitt horror finde. alles isch ok gsi narbe au, has den au versuecht uf normalem weg aber mini narbe isch am risse gsi und i ha den weder en notkaiserschnitt müesse mache leider. jetzt im nachhinein hani denkt hätti lieber vo afang a en kaiserschnitt gmacht hetti mr vieles erspart da es glich zum kaiserschnitt isch cho.

CDanielle

Danke für all eui erfahrige, @Nalan83 wieso hetsch im nachhinein lieber en plannte Kaiserschnitt gha? I denk mir ebe au chli dass is mega gern probiere wett au wenns de ned gad oder d Narbe risst.
Es isch ja eigentli bi jedere Geburt immer es Risko debi ob plannt, notfall Kaiserschnitt, spontan geburt etc.
min FA meint wenn Position, Plazenta etc. alles guet liet darfis definitiv probiere. I wet efach unbedingt das s Baby selber chunnt und I ned en plannte KS mue ha…

AnDu88

Ig ha nach mim erste KS au unbedingt normal welle probiere. Si het aber eifach nid welle cho, au 2 wuche nachem ET nid. De heimer probiert mit ileite. Leider hani au nach eim Tag wehe kei Geburtsvortschritt gha, MuMu immerno komplett zue und ganz hinde 🙈😂 guet i ha mehreri Konisatione gha, wäge dem isch bi mir dr MuMu au nid uf wäg de vernarbige, sehr wahrschinlech. Mir hei üs zäme mit de Ärzt de entschiede e Wehestopp z mache und am morge druf e KS z mache. Das het für mi absolut gstumme eso… die chlini het Wehe abbecho und het sich uf ihri Art ufd Geburt chönne vorbereite 🥰

Groan

Ich han au bim erste en „Notkaiserschnitt“ gha und han bim zweite unbedingt welle normal versueche. Hend denn müsse ileite, damit d’Wehe chömed und sisch denn usecho, dasi namal muen Kaiserschnitt mache. Aber für mich het so würkli gstumme, han au wele, dass die chli im Buch schochli durd Wehe vorbereitet isch (im beste Fall selber s‘go git). So hani s‘Gfühl gha sie wird ned eifach usem nüt usem Buch usegnoh. Aber weiss ned öb das de Babys öppis usmacht!

snowangel

Bim erste Sohn hani en Kaiserschnitt kah will er steckebliebe isch und sis herzli nüme so guet gschlage het. Es isch alles sehr schnell gange und ich has extrem hässlich gfunde das ganze willich mir zu sehr au ghofft ka han dassi e wassergeburt würd ha.

Bi de zweite Schwangerschaft nach 2 jahre bini is spital mite Ärzt go rede was sie mir würdet empfehle ob ich normal chönt entbinde oder isch es sicherer en Kaiserschnitt. Sie hend mich untersuecht und gseit de zweit Sohn isch damals grösser und dicker gsi als de erste sie hends nöd welle riskiere dass er au stecke bliebt und dass dnarbe ufrisst oder so öpis.
Mir hend denn en Termin festgstellt für de Kaiserschnitt das isch glaub de 21.7.2022 gsi. Aber am 6.7.2023 hani inde nacht liechti wehe ka und nach 24 stunde wo denn gmerkt ok wehe werded nöd weniger und sie sind stärker bini is spital det hani en wehestopper becho aber das hets nur stärker gmacht. Also hämmer denn entschiede de chline per Kaiserschnitt hole wie geplant. Es isch alles sooo entspannt abglofe, mir hend chli gschärtzlet und hends wükli sehr entspannt ka.
Ich ha de geplante Kaiserschnitt viel viel besser gfunde als de erste. Ich bi mental voll debi gsi und bim erste hani dete nur umeghüllt und ha nix verstande was lauft und wohi ich bracht wird wiso so viel ärzt um mich glofe sind es isch sehr sehr grussig gsi. Aber ebe bim geplante hanis sehr gnosse und ha ohni angst und sorge chöne id op.

Wuchebett isch au so viel besser glofe als de erste.