Reicht das Geld

sika

Hallo Zäme

Ich und min Partner denket immer meh über es Chind nache. Es isch scho länger es Thema bi eus..aber in letzter Ziit denki oft drüber nache, ob mir das überhauot Finanziell schaffe würde, will vill usem Umfeld rundume ständig verzellet, dass mer ja weiss ned wie vill uf de Siite muess ha bevor mer da ahfaht und au dernach..

Mir isch scho bewusst, dases sicher guet isch öbbis uf de Siite zha und dasmer au dernach meh brucht..

Aber ich ha denkt ich frag mal da inne nache, wie das bi euch so isch..villicht mögeder ja chlii verzelle wies bi euch finanziell ufgaht oder wie vill dass ihr monatlich so round about usgäbet für lebensmittel, babychram etc. Pp..

Liebs grüessli usem aargau👋

AnDu88

Ganz ehrlich… mir hend nur sehr wenig uf de Site gha (knapp das wome fürd Stüüre brucht) woni bi schwanger worde. Aber mir hei beidi e guete Lohn und i ha zu dere Zit 100% gschaffet. Es het guet glängt au mitem aschaffe vom mobiliar etc. guet mir hei au sehr vill gschenkt becho.
Mir hei de meh müesse luege woni bim zweite Chind nur no 40% gschaffet ha, aber de heimer aber scho alles gha vom grosse und nüt me gross müesse aschaffe.

Tanja87

Ich denke es chund ned drufah weviel Ersparnis das mer het. S Budgetiere wenn Chibd hesch isch de Schlüsselpunkt. Uf was legid ihr meh Wert ide Zuekunft? Mehrmals Reise im Jahr, es türs Auto, usw.
Es gid so viel Sache wo mer au Occasion chan aschaffe. Us Erfahrig chauft mer immer viel z viel, wo denn Baby gar ned wür bruche😁

snowangel

1 monat Bevor ich schwanger gworde bin hani ufghört rauche und statt 50 franke a zigi usgeh hani die 50 franke is kässeli tah endi wuche und min partner ebefalls. Endi Schwangerschaft hemer de ganze chinderzimmer zeugs vhöne chaufe und es het no förig kah.

Ich schaffe im moment nöd und ha so kei ikomme aber das geld langet eus mit zwei chinder und chönd au jedesjahr id ferie (nix luxuriöses aber immerno sehr schön!) Es git viel tauschmark wo chleider chasch bringe wo zchli sind und neus chasch hole, es git au vieli mamis da ine wo für en guete pris sache verchaufet oder sogar schenket. Mir hend sehr vieles gschenkt übercho und vieles vom erste sohn für de 2te no chöne bruche. De grösste ikauf ussert Lebensmittek machet mir in dütschlang dm. Wie Windle und milch und Reinigungsmittel. Mir hend en fixe monats budget und es wird nöd meh usgeh. Mir hend en essensplan für die ganz wuche eso chömer echt gschied ichaufe und es wird eso au kei esse weg grüehrt.
Mir tüend für vieles echli uf zite, ferie, arzt rechnige oder suscht falls mir öpis bruchet wo nöd zum monats budget ghört. Nix in grosser mengi alli in chli und mit de zit summiert sich das soo schnell... Ihr krieget das sicher here! Wenn ihr jetzt afanget endi wuche scho je 50 fr. Is kässeli tue hender endi Schwangerschaft sgeld für die wichtigsti sache wo en Neugeborene brucht.

Vieles isch aber au sehr unnötig wie marke kleider wo amene baby sowieso viel schnell chli wird. Das isvh me luxus für eltere ..
Genau so wie Schuhe, en neugeborene brucht kei nikes Schuhe sundern warmi Socke userrt me het das geld 💸 haha

Aber wie au spielsache. Mir hend sehr vieles ka wo er nie gern ka het... Nur unnötig umegstande..

minggi

Hallo, ich verstah dii sehr guet. Mache mier die überlegige jetz au, aber bi üs gahts ufs frag es 3. Kind oder nid🙈 ide erst ss hemer bedi voll gschaffet und hend es schöns polster gha. Babysache hemer fast alles occasion kauft oder gschenkt becho. Mier hend nachem erst chind, s elterhus chönne chaufe, so isch üses erschparte jetz weg. Mittlerwille hemer 2 kind und ich bin mami und schaffe nu 10%. Es isch nid viel, aber mier bruchets fast, wil mr susch nid viel chöntet ufd siite spare. Mier müend üs ez wieder es polster ufbaue und das stresst mi scho mängisch, defür hemer es tolls huus mit viel garte. Letscht summer simmer ide ferie gsi, das jahr gömmer glaub aber nid, da mier susch eifach mit spare au niene ane chömet. Ich han miis budget fürs esse chaufe und luege au susch dasi nid z viel geld usgibe, z.b indem ich picknick mitnime oder so. Mr hend nid viel aber es langet....

sika

Danke schomal für euchi Antwortene. Das het mich schomal chlii Beruhigt..😌

De meineder isch das scho einigermasse machbar mit öbber "normalverdiener" und öbber %ler bi eim chind🙈

•Elefäntli•

Hey Sika

Wenn öber 100% schaffet und 8000.- hei bringt oder 5000.- isch scho en massive unterschied 🫣

Ich han bis min Junior 6 gsi isch nö gschaffe bi Husfrau gsi und me händ extrem möse uf s gäld luege jede rappe zwei mol um traiä. Ferie hädmersich nö gad chöne leiste.
Jetzt wohni 30% Schaff gots üs würklech sehr guet wels genau da gsi isch wo üs gfählt häd zum mol sich was gönne 🫣

Ich han vieles vo minere schwöster öber cho a Kinderusstattig usw aber händ üs au mol was neus gleistet 😅.

Ich würds wieder so mache fö üs häds gstumme, wel mir gwüsst händ wenns e Kind gid denn hämer nöm dä luxus wie vorher mit zwei 100% Löhn.

AmBir

Git sones sprichwort: „Reich wird man nicht durch das, was man verdient, sondern durch das, was man nicht ausgibt.“
Als Bsp. eus langet de Lohn vom Maa ca 75k brutto. Ich wird erst go schaffe gah wenn die Chli 2-3 jährig isch - aktuell 18 Mönet. Mir hend es Auto, fahred immer id ferie (meistens air bnb), gönd mal go skifahre etc. Aber wie bereits erwähnt, das chan soo indiviuell si!

Juno

Mir sind beid bewusst vo hochprozentigem schaffe abe uf je 50% händ aber s glück e tolli gnossenschaftswohnig zha, mir bruched so dafür kei kita. chleider und eigentlich die ganz babyusstattig hämmer becho. schenked au selber vieles wiiter. Es git zb fb gruppe zum sache gratis becho und verschenken und au chleiderbörsene wome gueti sache für wenig Geld bechunnt. Ide Stadt gits au super gratis agebot zB in gz. mir mached ferie, (meist Airbnb)und gönd au mal go esse, bruched aber keis auto...mir wäged amigs eifach ab, was eus wichtig isch und lueged scho ufs Geld, müänd aber zum Glück uf nüt verzichte wo eus wichtig isch, für eus stimmt's voll.

enelaa94

Ganz ehrlich wenn mer stand jetzt keis Eigetum het oder e Gnosseschaftswohnig ischs unmöglich mit 1 Lohn durezcho.. usser dwohnig isch knapp 1000.- Es isch alles so tür worde nur scho wenn mer d'Fix Köste usrechnet. Min Ma schafft 100% het en sehr guete Lohn meh als de Durchschnitt und ich 30% aber die 30% machets no us endi Monet . Also würdemer es 2 welle, wärs schwer mitem schaffe und mit 1 Lohn ischs eifach sehr sehr knapp. Ich überlegs mer sehr sehr guet, ob nomal es Kind demnöchst wür in frag cho. Klar het mer alles vom 1 te etc.. aber fixköste werdet eifach immer höcher . Leider..

michellebabe

Mir hend au lang überlegt, bevors losgange isch. Finanziell isch es sicher en Umstellung, aber mitere guete Planig chame viel erreiche. Mir hend es Budget gmacht für Babychram, Lebensmittel und so. Isch ned immer easy, aber mit deziplin gehts.

Ginkgo

Hey :-) Ganz ehrlich mir hend uns nie Gedanke über s Thema Geld gmacht. Wo üsi Gross cho isch isch min Maa sogar no im Studium gsi (und ja sie isch plant gsi) und mir hend chum ersparts kah. Sitdem bini au nüme go schaffe. D Kita isch so tüür und Ahghörigi wo uf d Kids luege hend mir nid. Min Maa het e anständige Lohn und mir hend uns nie dra gwöhnt viel Geld zha. Mir wohne sit 18i zämme und es het immer glängt. Jetzt chunt bald üsi dritti Muus, mir hend e schöni/moderni 5.5 Zimmerwohnig, e grosses Auto und es fählt an nüd. Ich glaub üses "Geheimnis" isch secondhand, uslehne/tüschle, fertigprodukt vermeiden, minimalistisch lebe und mit de Kids als Hauptaktivität eifach immer usse goh. Chind müen nid tüür sy, vorallem nid in de erste Johre. Wenn de alli im Chindsgi und Schuel sind wirdi bestimmt au wieder chli go schaffe aber bis dert längts au so guet :-) Also wenn ihr euch es Würmli wünschet, wirds finanziell bestimmt go wenn ihrs machbar machet 👍🏼