Schimpfwörter bim 4 jährige

Crystal · 1. 12. 2021, 21:50

Wi machet dir das? Ignoriere? Jedes mau ds rächt wiise u sägä dasi das nid möcht ghöre? I wirde wahnsinnig u är isch no nid mau im kiga🙈

AnDu88 · 1. 12. 2021, 22:08

Chunnt au chli druf a was für schimpfwörter 😅
Bi üs seit dr gross (5i) öbbe mau „scheisse“ aber das ignorieri meistens. Ig säges jo au zwüschine 😬 Anderi schimpfwörter hetter bis jetz noni hei brocht.
Aber je fester dasme reagiert umso lustiger finde si das hani gmerkt. Aber erkläre dasme das nid gärn het und au dases verletzt usw. würdi uf jede fall.

Brineli · 2. 12. 2021, 07:34

Mini nonig mal drüü jährig het irgendwo „huere shit“ ufgläse! 😑Und sie seits sooo oft, ich chan das nöd ignoriere und sie findets mega lustig! 🥴Ich hoffe sie vergissts irgendwänn wieder! 😂

JennyHelin · 2. 12. 2021, 08:21

Mini wird im Januar 3 und seit ... wen sie gross gmacht hät (Mama ich ha gschiessä) 🤭🤣 ich wots ja ned verschönere aber isch ned so de Hammer wens anderi mit bechömed ..

Was sie au seit wenn sie sauer isch, isch : gott verdammi nomal oder ohh so scheisse ..

Aber vo wo sie das hät weissi ned.🥴
Aber ich due de ned so gross reagiere sonder säg eifach das das ned schön isch wenn sie das seit .. aber ich verstahn Sie das sie jetzt sauer isch.

Wenns de Persöndlich wird de säge was ... Sie höt mal amene Meitli gseit du dummi Chueh de hani natürli grad reagiert.

Anni · 2. 12. 2021, 21:35

Ich gseh das nöd so eng, aber bi ois ischs au nöd so „schlimm“ Bi mim 5 jährige hani müsse feststelle dases seehr uf de Chinzgi druf a chunt. Er het fründe wo i anderi chinzgis gönd und wörter benützed, die het min sohn no nie ghört… bi ihm ihm chinzgi ischs eher sträng und wüeschti wörter dörfeds nöd sege. Min sohn benützt au dihei kei , au weners noimed mal ghört het. di chliner wird jetz 4ri und ihres lieblingssimpfwort isch aktuell „du gaggi“ aber solang si das nur mir und mim maa seit…. bini au de meinig das schimpfe s leider nur interessanter macht.

samira. · 3. 12. 2021, 10:31

Also ich find das sehr schlimm wen es chind schimpfwörter benütz und verstah au nid wie weh das amene chline chind cha düre lah mini isch 6i und würd nie us ihrem muul öppis säge sie weiss das es bösi wörter sind au wen öpper das seiht seiht sie mir de und de het bösi wörter gseid sie seihts nid mal zum petzte vo andere chind und au wen mal em erwachsene eis use rütscht seiht sie vo selber me seiht das nid das isch es böses wort im kiga merki erst mal wie viel Erziehig vo ihrem chind egal isch chinder säge schimpfwörter und schlage anderi kinder und ka was also bitte erziehet euri chind aständig weil es isch schwer wen es guet erziehts chind sich de fragt das ish alles falsch was die mache und machets trotzdem und das chunt vo eh. Muetter wo 22 ish !

JennyHelin · 3. 12. 2021, 10:57

@samira.

Das isch scho grad chli fräch...
Sie hät ja nur gfraged wie reagiere !

Du chasch doch dini 6 Jährig ned mit andere jüngeri vergliche ?
Es chunt ja au uf Umfeld druff ah ?
KiGA und so ..

Wenn mini 3 Jährig seit das sie öppis scheisse findet da sie grad Sauer isch
Denn isch das eso das sind Ihri Gfühl.. klar säge ihre das das ned guet isch ...

Aber ih dem alter verstönd sie doch nanig so viel ...

Brineli · 3. 12. 2021, 14:01

@samira. Isch ja super das sis kind sooo mega guet erzoge wird. Die wird sicher NIE öpis schlimms oder böses mache! Nie klaue, nie lüge, etc..

Gnüsses!

Snuggles · 3. 12. 2021, 20:02

@Samira gwüssi sache hend mit „erziehig“(han müeh mit dem wort) nöd würklich viel ztue. Es git impulsiveri chind als anderi wo sache mached wie haue wo anderi nöd mached oder wörter ghöred wo anderi nöd ghöred und denn isch klar dass es wend usprobiere.
Mini tochter het letschtmal arschloch gseit, und jetzt isch sie weg dem nöd imne schlechtere umfeld und sorry aber wer het nonie i sim lebe scheisse gseit🤷🏻‍♀️

Würd dir rate d lüt nöd grad z verurteile wenn es chind öpis anders macht wie dis chind.vielicht sind die eltere scho am verzwiefle wils alles mögliche usprobiert hend.

samira. · 3. 12. 2021, 20:26

Ihr hend mich falsch verstande ich ha nur vo de schimpfwörter gredet nid vo allgemeini erziehig mis chind isch nid perfekt het au ihre kopf sie isch ja au ihri eigeni persönlichkeit dörf sie au sie

Ich meine einfach i dere welt wo so viel scheiss ablauft sötte chind doch no chind si und nid wie erwachseni rede oder schimpfwörter säge mini het au sho scheisse und und und gseid sie het ja au erst müesse lerne das es bösi wörter si im alter vo 2 öppe aber jetzt mittlerwile sit sie säge jetzt mal 4i isch seiht sie nüd meh so sache has ihre müese viel erkläre und wen me drüber lacht wirds halt verstärkt

samira. · 3. 12. 2021, 20:29

@JennyHelin Doch mit 3 verstöh kinder sho zimmlich viel find ich und jeder het i dem forum sis ahrächt uf frei meinig und es isch au nid ah bitrag eröffnerin gange sondern im allgemein ich ha kei mönsch direkt mit dem agriffe shüsh hätti näh verlinkt

samira. · 3. 12. 2021, 20:34

Min tip ah dich @Crystal viel rede erkläre und wens würk alltäglich isch halt so abmache wen sie/er eh tag lang kei schimpfwörter seiht giz vlt es chlises gschenkli , überaschig und ja es git schärfegrad vode schimpfwörter wen mal halt es scheisse use rüscht cha passiere üs passiert ja das au unbewusst es sött eifach nid zu gwöhnheit werde

Und wens halt würk mal es schlimms isch würd ich grad reagieren und dim chind das so erkläre wie du es als richtig empfindish

Crystal · 3. 12. 2021, 20:44

Danke samira, i ha di jtz nämläch grad wöue frage wi dus de gschafft hesch das dini tochter keni böse wörter meh seit. I ha nämläch scho ds gfüu das i mi bueb richtig erzieh u doch isch im momänt eifach dr wurm dinnä, äs isch aus u aui blöd, aui u aus isch schissdräck, jedä isch ä löu, so sache haut wo är ufgschnappet het u jtz pousälos vo sich git. Därum ja mini frag wi dirs machet wüu i drvo usga dases ä phase isch ( wo hoffäntläch schnäu vürbi geit ) i schämä mi nämläch we är im muki seit wi hüt das isch ä schissdräck🙈 u äbä nid nume we ihn öpis richtig vürruckt macht sondern eifach ä so🤷🏼‍♀️

samira. · 3. 12. 2021, 21:20

Ja es isch meistens eh Phase aber wen me halt nüd degliche macht wirds ebe zur gwohnheit und de bliebt die ganzi gschicht immer es brucht halt zit bis sie die flause us em kopf hend und wen er zb. öppis möcht seish im klar nai du bechunsh das jetzt nid weil das und das gseid / gmacht hesh isch halt mini Methode git ja ganz verschiedeni stile ide erziehig und ja zbelohnigs system isch bi üs eig am beste muesh es halt de würk mache weil wens belohnig nid chunt de fühlet sich chind au verarscht

Allgemein: die gruppe isch zum helfe (ha vlt grad min frust chli useglah vom allgemeine was ja paar falsch verstande hend )

JennyHelin · 3. 12. 2021, 21:52

@samira.
Ja da hani mi chli ahgriffä gfühlt ...

snowangel · 4. 12. 2021, 10:16

Ich cha mich sehr guet errinnere woni mal en schimpfwort uf spanisch gseit ha vor mineri Grossmuetter... (Coño)... Aaaayy ayyy.. hetti das lieber siglah 😂 cha mich nur erinnere wies eimal ufs mul klatscht het... (Isch bi eus normal, und ich ha. Kein schade davo.. alles guet.. würds jetzz au nöd mache das osch voe 20 jahre gsi und bi eus völli normal)
Haha aber grossmuetter het denn grad gseit wenn sie no eimal so es wort ghört, seit sie es am "Kuku" und de kuku i de dominikanische Republik isch eigentlich de glühwurm gmeint aber chinder hend denkt isch en art Monster..
eltere hend immee de Kuku grüeft sobald en schimpfwort gseit worde isch oder husufgab nöd gmacht gsi isch oder nöd gässe hend wenn ebe no sooo chli sind und nöd verstönd was es heisst es isch nöd guet dies und jenes mache.. etc etc...
Ich glaub da i de schwiz würd mer das nöd als guet gseh die methode... 😁 Aber ich finds nöd schlimm.. het glaub mite Kultur ztue..

AnDu88 · 4. 12. 2021, 10:44

@snowangel Uh nei, das würdi nie zueloh, dönt rächt heftig 🙈🙈 i weiss kulture sind verschide aber das geit gar nid 🙈
Bi mim Maa sinere Familie gits dr „kara adam“ das isch e Maa mit schwarze lange kleider ohni gsicht. Und de het me ihne so angst gmacht damit si folge und das fingi geit eifach nid 😔Mini chind sölle nid müesse angst ha vor irgendwelche gstalte nur will si nid das mache wo mir ine säge 😬

snowangel · 4. 12. 2021, 11:08

Haha ja das isch wükli sooo, finds nöd schlimm.. willich vlt eso ufgwachse bin.. aber würds mit min chline au nöd mache... Ich find das alles so interessant wie verschiede die Erziehig sind je nach Kultur..

Finds ebe no schwierig mit dene schimpfwörter.. es paar chinder findets ja no so provokativ wenn mami nei seit.. denn machets no schnell gern extra.

Ich glaub ich wür min chline wenn er mit so wörter wür cho ganz klar erkläre was das wort bedütet, dass es ihm bewusst isch was er da eigentlich gseit het..
Und denn sege das isch nöd schön wenn du das öperem seisch oder so en herzige bueb so en schlimme wort seit.. das macht mami sehr trurig oder du chasch damit die Person sehr trurig mache, oder sie Hend Schmerze im Herz will mer ihne so öpis schlimms seit...

Ich würds am afang eso probiere wenns nöd wür klappe denn würi strenger werde.

Wassi ebe so schwierig finde isch das hüt ztag alles als schlimm wahrgno wird...
Wenn schind is Zimmer schicksch denn meinets schnell ja du lahsch schind eso allei mite frust..es verstaht nüt und er wird es so nöd lerne oder machts nächst mal wieder er muess ja nur is zimmer.. det het er sini Spielsache und isch für ihn nöd schlimm..
Oder wenn ihn tuesch zemmeschisse isch es au phychische agriff.... Oder wenn ihn tuesch ignoriere bis er selber entschuldigung seit isch au nöd guet... Me findet iiiimmee öpis wo nöd guet isch i de erzihigsart vo öperem...

Deswege denki Schlussendlich kennt smami sis chind am beschte und weisst am beschte wie sie mit dem eigene chan umgah..

Ich üebe grad de strenge blick ohne wörter hahahah de het mini muetter bi mir immer gmacht. Und de het suuupeer klappt.. bis jetzt klappts ab und zue mit min chlin wenn er zbsp de papa haut oder sis esse am bode schmeisst luegi ihn mit ganz grossi und ernste blick ah.. denn luege er so wie.. "ouh ich ha öpis gmacht wo nöd guet isch" denn chunr er meistens zu mir und umarmt mis bei... Denn nimmisch ihn zu mir und sege das macht mer nöd das hani nöd gern.. und erkläre warum ich es nöd gern han.

Soorry mega vieel blablabla... 😂🙈

Depsy · 4. 12. 2021, 18:35

Ig ha ou scho e WC-Wörter-Röhre us WCröueli mit de Chind gmacht u die im Bad deponiert. Wenn sie es Schimpfwort gseit hei, hei sie i ds Badzimmer chönne ga, das so viu mau dür d‘Röhre i ds WC säge wie sie hei wöue u när we sie gfunde hei es isch gnue, heisi chönne spüele u wieder chönne cho. So si die Wörter nid per se verbote gsi (was ja ersch rächt cha spannend si), aber es isch o klar gsi, dass die Wörter wenn überhoupt nur dert häre ghöre u nid z.B a Tisch oder zu öperem süsch gseit wärde. Ds Interesse isch de so eher uf dere coole Röhre gsi, u sie hei Teils d‘Wörter gsunge oder gschroue u heis lustig gfunde, i ha se eifach la mache, isch ihne vo allei irgendwenn verleidet. Viellicht hiuft dir das 😊

Crystal · 4. 12. 2021, 20:26

Danke Depsy für di luschtigi idee

snowangel · 4. 12. 2021, 20:35

Wuah mega gueti idee Depsy, de merki mir danke 😂

Depsy · 5. 12. 2021, 20:45

Gärn, viu Erfoug ☺️

Celeste · 10. 08. 2022, 14:52

Depsy schrieb: »

Ig ha ou scho e WC-Wörter-Röhre us WCröueli mit de Chind gmacht u die im Bad deponiert. Wenn sie es Schimpfwort gseit hei, hei sie i ds Badzimmer chönne ga, das so viu mau dür d‘Röhre i ds WC säge wie sie hei wöue u när we sie gfunde hei es isch gnue, heisi chönne spüele u wieder chönne cho. So si die Wörter nid per se verbote gsi (was ja ersch rächt cha spannend si), aber es isch o klar gsi, dass die Wörter wenn überhoupt nur dert häre ghöre u nid z.B a Tisch oder zu öperem süsch gseit wärde. Ds Interesse isch de so eher uf dere coole Röhre gsi, u sie hei Teils d‘Wörter gsunge oder gschroue u heis lustig gfunde, i ha se eifach la mache, isch ihne vo allei irgendwenn verleidet. Viellicht hiuft dir das 😊

hahaha, das isch ja wohl di BESTI idee wo ich je zum thema erziehig ghört han 😃 und ich bin doch scho 13 jahr am chind erzieh! es isch kei straf, keis verbot, macht spass und isch ultra logisch; wenn mer uf's WC muss gaht mer ja au uf's WC. so guet he!! 💯

Kringel · 11. 08. 2022, 19:00

Das hend mir au so gmacht. Üsi Tochter 5.5j darf we si es Schimpfwort will sege wo si neu ghört het, mir is Ohr sege. De düemer luege ob das ok isch oder nid. Wenn nid darf sis nur no im Badzimmer sege wenn si dert allei isch.
Klappet guet.

Schimpfwörter bim 4 jährige

Kommentare

Hey & Hallo im Forum!

Quick-Links

Kategorien

Alles zu Schwangerschaft, Geburt & Baby

Triff Mamas und Papas in:

Verpasse keine Neuigkeiten:

Entdecke unsere Aktionen: